ស្រ្តីឈ្មោះ ជា ស្រីលក្ខណ៍ អាយុ១៩ឆ្នាំ រស់នៅភូមិត្រពាំងព្រីង ឃុំពពេល ឲ្យដឹងថា គាត់សន្លប់ក្រោយពីប៉ូលិសបានទាញគាត់ទម្លាក់ពីម៉ូតូ ក្រោយពេលប៉ូលិសបានយកដំបងឆក់វាយទៅលើប្តី។
រហូតមកទល់ពេលនេះមិនទាន់ដឹងថា កូនក្នុងពោះមានសុខភាពដូចម្ត៉េចទេ។
ស្រ្ដីឈ្មោះ ជា ស្រីលក្ខណ៍ បានឲ្យដឹងដូច្នេះ ៖ «ម៉ូតូខ្ញុំមិនទាន់ឈប់ស្រួលបួលផង ប៉ូលិសយកដំបងទៅឆក់ប្ដីខ្ញុំ ហើយប៉ូលិសមួយទៀតទាញដៃខ្ញុំពីលើម៉ូតូ។ ដួលចំក្បាល ខ្ញុំសន្លប់អត់ដឹងខ្លួនផង។ ទាញកន្រ្តាក់ខ្លាំងដែរ បោកលើចិញ្ចើមថ្នល់ចំក្បាលបែកបន្តិច កន្លែងលើស្លឹកត្រចៀក។ ឥឡូវនៅឈឺដៃ លើកឡើងលើអត់កើតផង។ កូននៅបម្រាស់ដែរ ប៉ុន្តែពេលបម្រាស់ឈឺដែរ បន្តិចទៀតបានគេយកទៅពិនិត្យឲ្យ»។
បុរសជាប្តីឈ្មោះ ម៉េង សារឿន បានឲ្យដឹងថា នៅថ្ងៃសុក្រ ទី២០ ខែវិច្ឆិកា គាត់ឌុបប្រពន្ធទៅមើលស្រែ ហើយបង្ហួសទៅពិនិត្យផ្ទៃពោះ ដោយគាត់ទើបមានកូនដំបូងត្រូវតាមដានសុខភាព។ លោកថា នៅពេលម៉ូតូវាងស្ពានដែកក្បែរស្ពានស្លាគូ នៅខាងជើងវត្តចមពល នគរបាលចរាចរណ៍បានឃាត់ម៉ូតូឲ្យឈប់។ ប៉ូលិសបានមកចាប់ដៃម៉ូតូ ហើយយកដំបងឆក់វាយក្បាលគាត់ រួចប៉ូលិសម្នាក់ទៀតទាញដៃប្រពន្ធគាត់ទម្លាក់ពីម៉ូតូឲ្យសន្លប់។
លោក ម៉េង សារឿន បាននិយាយឲ្យដឹងដូច្នេះ ៖ «វាចាប់សុំលុយ ខ្ញុំឈប់ហើយប៉ុន្តែម៉ូតូនៅរត់បន្តិចៗ ហើយវាវ៉ៃខ្ញុំតែម្ដង។ ខ្ញុំដួលម៉ូតូទៅប៉ូលិសចាប់ទាញដៃប្រពន្ធខ្ញុំទម្លាក់ពីលើម៉ូតូ ហើយនាងក៏ដួលបោកមួយចំហៀងខ្លួនទៅ»។
ប្រជាជនច្រើនទៀតដែលបានឃើញហេតុការណ៍បានអះអាងថា សមត្ថកិច្ចបានធ្វើកំណត់ហេតុថា ស្រ្តីដែលសន្លប់នោះបានរងគ្រោះថ្នាក់ចរាចរណ៍ ដែលមិនបង្កដោយប៉ូលិសចរាចរណ៍នោះទេ។ ពួកគាត់បានបដិសេធនឹងរបាយការណ៍នោះ ៖ «ធ្លាក់ហ្នឹងប៉ូលិសជាអ្នកបង្ក»។
ប្រធានសហគមន៍ត្រពាំព្រីង លោក ឡាយ ឃ្លី បានឲ្យដឹងថា គាត់បានដាក់ពាក្យបណ្តឹងទៅអធិការដ្ឋាននគរបាលស្រុកត្រាំកក់ ជំនួសគ្រួសារវ័យក្មេងដែលរងគ្រោះនោះ ដោយគាត់បានឃើញសកម្មភាពបង្កគ្រោះថ្នាក់នោះផ្ទាល់ភ្នែក គឺកើតចេញពីសមត្ថកិច្ចចរាចរណ៍ដែលចាប់ដៃម៉ូតូ និងប្រើដំបងវាយទៅលើបុរសជាប្តី បង្ខំឲ្យឈប់ដើម្បីផាកពិន័យមិនពាក់មួកសុវត្ថិភាព ហើយបានទាញទម្លាក់ប្រពន្ធគេធ្លាក់មកដីធ្វើឲ្យសន្លប់ ៖ «ខ្ញុំអាងសាក្សីច្រើនណាស់ បើថាគេយ៉ាងម៉េចៗ ខ្ញុំតវ៉ាទៅលើទៀត»។
អធិការរងស្រុកត្រាំកក់ លោក អ៊ួន សុខុម មានប្រសាសន៍ថា ក្រុមការងារសណ្តាប់ធ្នាប់កំពុងរៀបចំឯកសារ រួមទាំងបណ្តឹងពលរដ្ឋបញ្ជូនទៅស្នងការខេត្តតាកែវ ឲ្យដោះស្រាយ។
លោក អ៊ួន សុខុម មានប្រសាសន៍ដូច្នេះ ៖ «ខ្ញុំអត់ទាន់ហ៊ានថាយ៉ាងម៉េចដែរទេ ព្រោះមិនមែនជាអ្នកនៅក្រោមឱវាទរបស់ខ្ញុំទេ អ្នកហ្នឹងជាកម្លាំងរបស់ខេត្ត»។
ក្រុមការពារសិទ្ធិមនុស្សខេត្តតាកែវ បានឲ្យដឹងថា ពួកគេកំពុងតាមដានរឿងនេះ។
នៅថ្ងៃច័ន្ទ ទី២៣ វិច្ឆិកា ស្រ្តីដែលបានរងគ្រោះតាំងពីព្រឹកថ្ងៃសុក្រ ទី២០ វិច្ឆិកានោះ កំពុងត្រូវក្រុមគ្រូពេទ្យនៃមន្ទីរពេទ្យខេត្តតាកែវ បញ្ជូនទៅពិនិត្យផ្ទៃពោះរកផលប៉ះពាល់ទារកក្នុងផ្ទៃ៕