លោក សយ សុភាព មានប្រសាសន៍ថា លោកមិនទាន់បានទទួលលិខិតពីក្រសួងព័ត៌មាននៅឡើយទេ គ្រាន់តែលោកបានដឹងតាមរយៈសារព័ត៌មានក្នុងស្រុកថា ក្រសួងព័ត៌មានបានផ្តល់អាជ្ញាប័ណ្ណនៃការបង្កើតស្ថានីយវិទ្យុយោងតាមលិខិតស្នើសុំរបស់លោកដែលបានដាក់ជូនក្រសួងនេះជាងពីរខែមក។
លោក សយ សុភាព ថ្លែងដូច្នេះថា ៖ «អ្វីដែលជាបញ្ហាក្នុងសង្គម ហើយអ្វីដែលជាបញ្ហានៅថ្ងៃមុខ គឺយើងគិតអំពីបញ្ហាហ្នឹង អ៊ីចឹងយើងធ្វើវិទ្យុនេះ គឺយើងត្រូវតែមានតួនាទីមើលឲ្យបានវែងឆ្ងាយ គិតឲ្យបានគ្រប់ជ្រុងជ្រោយដើម្បីសង្គមជាតិរបស់យើង។ គំនិតរបស់ខ្ញុំគឺថា ឲ្យខ្មែរស្គាល់ខ្លួនឯង កាលណាស្គាល់ខ្លួនឯងហើយ ស្គាល់តម្លៃប្រទេសជាតិហើយ»។
លោក សយ សុភាព បានបញ្ជាក់ប្រាប់អំពីគោលបំណងនៃការបើកស្ថានីយវិទ្យុនេះថា គឺដើម្បីបម្រើសង្គមនិងមិនបម្រើគណបក្សនយោបាយណាមួយនោះទេ។ ការបង្កើតវិទ្យុនេះទៀត គឺពុំមានការឧបត្ថម្ភពីស្ថាប័នណាមួយនោះទេ ហើយវិទ្យុនេះនឹងដាក់ឈ្មោះថា វិទ្យុសំឡេងដើមអំពិល។
លោក សយ សុភាព មានប្រសាសន៍បន្ថែមថា ៖ «កាសែតខ្មែរកើតឡើងនៅឆ្នាំ១៩៣៦ ថ្ងៃ១៩ ធ្នូ គឺកូនខ្មែរជាអ្នកបង្កើត ឥឡូវនេះ ខ្ញុំជាក្មេងជំនាន់ក្រោយ យកខួបកំណើតហ្នឹងយកមកគោរព ហើយខ្ញុំចង់បញ្ជាក់ថា យើងខ្ញុំមិនចង់ទទួលឥទ្ធិពលប្រាក់ពីបរទេស ឬពីបក្សនយោបាយណាទេ ប៉ុន្តែលុយនេះបានមកពីការសន្សំរបស់ពួកខ្ញុំដែលធ្វើការ»។
តំណាងរាស្រ្តគណបក្សប្រឆាំង លោក សុន ឆ័យ មានប្រសាសន៍ថា កន្លងមក គណបក្សសមរង្ស៊ីក៏ធ្លាប់បានស្នើសុំបង្កើតស្ថានីយវិទ្យុពីក្រសួងព័ត៌មានដែរ ប៉ុន្តែត្រូវបានក្រសួងនេះបដិសេធ។ ហើយក្រោយមកទៀត ក៏បានស្នើសុំជាលក្ខណៈឯកជនផងដែរ នៃការបង្កើតស្ថានីយវិទ្យុនេះ ប៉ុន្តែគឺនៅតែខាងក្រសួងប្រាប់វិញថា អស់រលកធាតុអាកាសឬអស់ហ្រេ្វកង់នោះហើយ។
លោក សុន ឆ័យ បានបញ្ជាក់ថា ស្រាប់តែនៅពេលនេះ ក្រសួងបានផ្តល់អាជ្ញាប័ណ្ណជូនអ្នកគ្រាំទ្រគណបក្សប្រជាជនកម្ពុជាទៅវិញ ហើយថា នេះជារឿងអយុត្តិធម៌ ៖ «អ្វីដែលសំខាន់ជាងនេះ គឺក្រសួងមិនបានទទួលខុសត្រូវចំពោះពាក្យសម្ដីដែលធ្លាប់ឆ្លើយបដិសេធពីមុនមកថា អត់មានហ្រេ្វកង់សម្រាប់ឲ្យ ពេលនេះបែរជាមាន បានន័យថា ការភូតភរបែបនេះធ្វើឲ្យបាត់បង់កិត្តិយសដល់ក្រសួងរបស់រដ្ឋាភិបាល»។
រដ្ឋមន្រ្តីនៃក្រសួងព័ត៌មាន លោក ខៀវ កាញារីទ្ធ មិនបានធ្វើការអត្ថាធិប្បាយជុំវិញបញ្ហាខាងលើទេ ដោយលោកប្រាប់ថាជាប់រវល់។
សូមជម្រាបថា លោក សយ សុភាព បានឲ្យដឹងទៀតថា លោកក៏មិនទាន់ដឹងថា កម្លាំងផ្សាយនៃវិទ្យុដែលនឹងបង្កើតថ្មីនេះមានកម្លាំងប៉ុន្មានគីឡូវ៉ាត់នោះដែរ ប៉ុន្តែលោកថា ទោះជាក្រសួងអនុញ្ញាតជូនកម្លាំងផ្សាយប៉ុន្មានគីឡូវ៉ាត់ក៏ដោយ ក៏លោកទទួលយកដែរ។
លោក សុន ឆ័យ បានលើកឡើងទៀតដែរថា រដ្ឋាភិបាលកម្ពុជាជារដ្ឋាភិបាលខ្មែរទាំងអស់គ្នា ហើយរដ្ឋាភិបាលគួរតែផ្តល់សិទ្ធិស្មើគ្នានៃការបង្កើតស្ថានីយវិទ្យុនេះ ប៉ុន្តែការផ្តល់អាជ្ញាប័ណ្ណជូនអ្នកគាំទ្រគណបក្សប្រជាជន ដូច្នេះជារឿងលម្អៀងមួយ៕