សេចក្តីប្រកាសព័ត៌មានរបស់ការិយាល័យអ.ស.បនៅកម្ពុជា មិនបានឲ្យដឹងថា មានទឹកប្រាក់ចំនួនប៉ុន្មាននឹងត្រូវប្រើប្រាស់ក្នុងកិច្ចសហការ៥ឆ្នាំទៅមុខទៀតនោះទេ តែកន្លងមកនៅក្នុងប្រតិបត្តិការរបស់អ.ស.បនៅកម្ពុជា បានចំណាយប្រចាំឆ្នាំប្រហែល១០០លានដុល្លារអាមេរិកក្នុងមួយឆ្នាំៗ។
អ.ស.បប្រចាំនៅប្រទេសកម្ពុជា គឺជាក្រុមដែលធំជាងគេបំផុត ហើយមានភ្នាក់ងារឯកទេសអ.ស.បចំនួន២៣អង្គភាព ដែលធ្វើសកម្មភាពដែលមានមូលនិធិនិងកម្មវិធីជាច្រើនជាមួយនឹងបុគ្គលិកជិត១.០០០នាក់ ដែលកំពុងអនុវត្តកម្មវិធីនៅគ្រប់ខេត្តក្រុងទូទាំងប្រទេស។
នៅក្នុងសេចក្តីប្រកាសព័ត៌មានរបស់អ.ស.ប នៅថ្ងៃទី២៦ ខែមករា បានសសេរថា អ.ស.បនៅក្នុងប្រទេសកម្ពុជាបានផ្តល់នូវធនធានសមត្ថភាពបច្ចេកទេសក្នុងវិស័យទូលំទូលាយមួយ ដោយរាប់ទាំងវិស័យជាច្រើនដូចជា សុខភាព អប់រំ ជនចំណាកស្រុក ជំងឺអេដស៍ អភិបាលកិច្ចល្អ សិទ្ធិមនុស្ស កសិកម្ម ជំងឺរីករាលដាល ជំងឺផ្តាសសាយបក្សី ការជួញដូរមនុស្ស ពាណិជ្ជកម្ម ការថែរក្សាវប្បធម៌ ការបង្ការការប្រើប្រាស់គ្រឿងញៀននិងសន្តិសុខស្បៀងជាដើម។
នៅក្នុងសេចក្តីប្រកាសព័ត៌មាននោះបានសរសេរទៀតថា នេះគឺជាការផ្សាភ្ជាប់ជាមួយនឹងយុទ្ធសាស្ត្រចតុកោណរបស់រដ្ឋាភិបាលកម្ពុជាក្នុងដំណាក់កាលទីពីរនិងផែនការយុទ្ធសាស្ត្រអភិវឌ្ឍន៍ជាតិ ដែលបានស្ថាបនាទៅលើសមិទ្ធផលនិងភាពរីកចម្រើននៅទសវត្សរ៍កន្លងទៅនិងនៅលើជំហររបស់អ.ស.ប ដែលជាដៃគូជឿទុកចិត្តនិងអព្យាក្រឹតរបស់រដ្ឋាភិបាលនិងប្រជាជនកម្ពុជា៕