លោក ធន សារាយ ប្រធានសមាគមការពារសិទ្ធិមនុស្សអាដហុក មានប្រសាសន៍បន្ទាប់ពីជំនួបរវាងក្រុមអង្គការសង្គមស៊ីវិល និងលោក ស៊ូយ៉ា ស៊ូប៊ែឌី ថា បញ្ហាធំៗដែលក្រុមអង្គការសង្គមស៊ីវិលកំពុងមានការព្រួយបារម្ភ មានដូចជាបញ្ហាប្រព័ន្ធតុលាការកម្ពុជា បញ្ហាសិទ្ធិមនុស្ស ការបោះឆ្នោត និងការបណ្តេញចេញជាដើម។ លោកថា បញ្ហាទាំងនេះនៅមានភាពខ្វះចន្លោះ និងនៅមានភាពយឺតយ៉ាវក្នុងការដោះស្រាយជូនប្រជាពលរដ្ឋ ហើយបញ្ហាប្រព័ន្ធតុលាការក៏មិនទាន់អាចផ្តល់ភាពយុត្តិធម៌ដល់ប្រជាពលរដ្ឋបានគួរជាទីពេញចិត្តនៅឡើយដែរ។
លោក ធន សារាយ មានប្រសាសន៍បន្ថែមទៀតថា ៖ «ដូចជាបញ្ហារឿងប៉ះពាល់ដល់ដីរបស់ប្រជាពលរដ្ឋអីហ្នឹង គឺថា សុំឲ្យមានការដោះស្រាយឲ្យល្អប្រសើរ ហើយឲ្យបានឆាប់រហ័សជូនដល់ប្រជាពលរដ្ឋដែលគ្នាប៉ះពាល់អីហ្នឹង ហើយប្រព័ន្ធយុត្តិធម៌ក៏គួរកែលម្អថា ចំណុចណាខ្លះដែលអាចលើកបាន ដែលយើងឃើញទាំងអស់គ្នាថា វាមានការខ្វះខាត ដូចជាការដែលកាត់សេចក្ដីនានា មិនទាន់បានល្អប្រសើរអីអ៊ីចឹង អាហ្នឹងដែលប្រជាពលរដ្ឋនៅមិនទាន់បានពេញចិត្តពេញថ្លើម»។
នៅក្នុងដំណើរទស្សនកិច្ចរបស់លោកនាឱកាសនេះ ត្រូវបានអ្នកតំណាងរាស្ត្រគណបក្សនយោបាយ និងក្រុមអង្គការសង្គមស៊ីវិលបានស្វាគមន៍ ហើយបានកត់សម្គាល់ថា អនុសាសន៍របស់លោក ស៊ូយ៉ា ស៊ូប៊ែឌី ដាក់ជូនរដ្ឋាភិបាលកាលពីដំណើរទស្សនកិច្ចរបស់លោកកាលពីលើកទី៣នោះ រដ្ឋាភិបាលមិនទាន់បានអនុវត្តឲ្យល្អប្រសើរនៅឡើយ។
អ្នកតំណាងរាស្ត្រគណបក្ស សម រង្ស៊ី លោក យឹម សុវណ្ណ មានប្រសាសន៍ថា នៅឆ្នាំ២០១១នេះ ស្ថានភាពរំលោភសិទ្ធិមនុស្សនៅកម្ពុជា នៅតែកើតមានឥតឈប់ឈរ ហើយថា បេសកកម្មនេះមានសារសំខាន់ណាស់ ដើម្បីជួយជំរុញទៅរដ្ឋាភិបាលឲ្យពង្រឹងការគោរពសិទ្ធិមនុស្ស ប្រព័ន្ធយុត្តិធម៌នៅកម្ពុជា ដែលកំពុងមានការប្រឈមជាច្រើន។
លោកបន្តថា ៖ «យើងឃើញថា នៅមានកង្វះខាត មានភាពកម្សោយខ្លាំង ដោយយើងគិតថា រដ្ឋសភាធ្វើតែតាមបញ្ជារបស់រដ្ឋាភិបាលតែប៉ុណ្ណឹងទេ ដូច្នេះយើងចង់ឲ្យមានគោលការណ៍គោរពលទ្ធិប្រជាធិបតេយ្យ ឲ្យបានពិតប្រាកដ ដោយយើងធ្វើយ៉ាងម៉េចឲ្យស្ថាប័នសភានេះមានអំណាចគ្រប់គ្រាន់ក្នុងការត្រួតពិនិត្យបំពេញតួនាទីភារកិច្ចឲ្យបានត្រឹមត្រូវ និងមានប្រសិទ្ធភាព»។
ឆ្លើយតបបញ្ហានេះ លោក ទិត សុធា ទីប្រឹក្សារាជរដ្ឋាភិបាល និងជាអ្នកនាំពាក្យអង្គភាពព័ត៌មាន និងប្រតិកម្មរហ័សនៃទីស្ដីការគណៈរដ្ឋមន្ត្រី មានប្រសាសន៍មិនទទួលស្គាល់ចំពោះបញ្ហានេះទេ។ លោកថា ការលើកឡើងទាំងអស់ រដ្ឋាភិបាលបានកំពុងខិតខំធ្វើកំណែទម្រង់ជាបណ្តើរៗហើយ។ លោកបញ្ជាក់ថា បេសកកម្មរបស់លោក ស៊ូយ៉ា ស៊ូប៊ែឌី នៅពេលនេះ គួរតែផ្តោតលើការរំលោភសិទ្ធិ ដែលធ្វើឡើងមកលើប្រជាជនកម្ពុជា ដោយការឈ្លានពានពីប្រទេសថៃវិញ។
លោក ទិត សុធា បញ្ជាក់ដូច្នេះ ៖ «បញ្ហាកំណែទម្រង់ប្រព័ន្ធតុលាការ និងកំណែទម្រង់ប្រព័ន្ធយុត្តិធម៌នៅកម្ពុជានោះ គឺរាជរដ្ឋាភិបាលកម្ពុជា បាននិងកំពុងដំណើរការយ៉ាងសកម្មហើយ ជាក់ស្ដែងគឺយើងបានឃើញហើយ គឺនៅពេលកន្លងមកនេះ គឺព្រះរាជអាជ្ញាមួយរូបនៅឯខេត្តពោធិ៍សាត់ ត្រូវបានឃាត់ខ្លួន និងចាត់ការទៅតាមនីតិវិធីច្បាប់ជាច្រើនដែលកំពុងធ្វើ ហើយនេះក៏ជាការងារដែលរាជរដ្ឋាភិបាលកំពុងយកចិត្តទុកដាក់»។
ប្រធានគណបក្សសិទ្ធិមនុស្ស លោក កឹម សុខា មានប្រសាសន៍ថា លោក ស៊ូយ៉ា ស៊ូប៊ែឌី ក៏មានគម្រោងជួបពិភាក្សាជាមួយលោក នៅថ្ងៃទី២១ និង ២២ កុម្ភៈ ខាងមុខនេះដែរ។
លោកបន្តថា ក្នុងជំនួបនោះ លោកនឹងលើកយកបញ្ហាសំខាន់ៗមកជជែកពិភាក្សា មានដូចជាបញ្ហាសិទ្ធិមនុស្ស និងការបោះឆ្នោត បញ្ហារំលោភដីធ្លីដែលមិនទាន់មានដំណោះស្រាយ សេរីភាពបញ្ចេញមតិ ការចូលរួមរបស់ប្រជាពលរដ្ឋនៅតាមជនបទជាមួយគណបក្សប្រឆាំងនៅមានការរឹតត្បិតខ្លាំង និងបញ្ហាសេចក្ដីព្រាងច្បាប់គ្រប់គ្រងអង្គការសមាគមជាដើម។
សេចក្ដីប្រកាសព័ត៌មានរបស់ឧត្ដមស្នងការអង្គការសហប្រជាជាតិ ទទួលបន្ទុកសិទ្ធិមនុស្ស ចេញកាលពីថ្ងៃទី៩ ខែកុម្ភៈ បានឲ្យដឹងថា បេសកម្មរបស់លោក ស៊ូយ៉ា ស៊ូប៊ែឌី មានគោលដៅពិនិត្យតាមដានលើអនុសាសន៍របស់លោក ស្ដីពីមុខងាររបស់តុលាការ ធ្វើការវាយតម្លៃលើភាពរីកចម្រើន ដែលសម្រេចបានលើការដកបទបរិហារកេរ្តិ៍ចេញពីបទល្មើសព្រហ្មទណ្ឌ និងការបង្កើតនូវយន្តការអចិន្ត្រៃយ៍មួយសម្រាប់កិច្ចសន្ទនារវាងរដ្ឋាភិបាល និងសង្គមស៊ីវិល ព្រមទាំងសិក្សាលើការងាររបស់អង្គនីតិប្បញ្ញត្តិនៅក្នុងបរិបទនៃការវាយតម្លៃជាបន្តបន្ទាប់របស់លោកលើស្ថាប័នគ្រឹះនានា ដែលដើរតួនាទីក្នុងការលើកស្ទួយ និងការពារសិទ្ធិមនុស្ស។
សេចក្ដីប្រកាសដដែលបានឲ្យដឹងទៀតថា នៅក្នុងអំឡុងទស្សនកិច្ចរបស់លោក ស៊ូយ៉ា ស៊ូប៊ែឌី អ្នកជំនាញការឯករាជ្យដែលត្រូវបានតែងតាំងដោយក្រុមប្រឹក្សាសិទ្ធិមនុស្ស ដើម្បីធ្វើការវាយតម្លៃ និងរាយការណ៍អំពីស្ថានភាពសិទ្ធិមនុស្សនៅកម្ពុជា នឹងចូលរួមពិភាក្សាផងដែរលើសេចក្ដីព្រាងច្បាប់ស្ដីពីសមាគម និងអង្គការមិនមែនរដ្ឋាភិបាល។ លោក ស៊ូយ៉ា ស៊ូប៊ែឌី ក៏នឹងពិនិត្យមើលលើបញ្ហាទំនាស់ដីធ្លី និងការបណ្ដេញប្រជាពលរដ្ឋចេញពីលំនៅផងដែរ។
លោក ស៊ូយ៉ា ស៊ូប៊ែឌី គ្រោងនឹងជួបជាមួយអាជ្ញាធររបស់រដ្ឋាភិបាលនានា អង្គនីតិប្បញ្ញត្តិ ក្រុមសង្គមស៊ីវិល បក្សនយោបាយ តំណាងនានានៃទីភ្នាក់ងារអង្គការសហប្រជាជាតិម្ចាស់ជំនួយ និងក្រុមអ្នកការទូតនានា។
លោក កុយ គួង អ្នកនាំពាក្យក្រសួងការបរទេស មានប្រសាសន៍ប្រាប់វិទ្យុអាស៊ីសេរី នៅថ្ងៃពុធ ទី១៦ ខែកុម្ភៈថា នៅក្នុងដំណើរទស្សនកិច្ចជាផ្លូវការមកកម្ពុជា លើកទី៤ របស់លោក ស៊ូយ៉ា ស៊ូប៊ែឌី នេះ ក៏ត្រូវបានរៀបចំឲ្យមានកិច្ចជំនួបមួយរវាងលោកនាយករដ្ឋមន្ត្រីប្រទេសកម្ពុជា និងមន្ត្រីរដ្ឋាភិបាលជាន់ខ្ពស់មួយចំនួនជាមួយលោក ស៊ូយ៉ា ស៊ូប៊ែឌី ផងដែរ។ ក៏ប៉ុន្តែខ្លឹមសារសំខាន់ដែលត្រូវលើកយកទៅជជែកពីបញ្ហាអ្វីនោះ លោកពុំអាចបញ្ជាក់ប្រាប់បាននោះទេ។
លោក កុយ គួង មានប្រសាសន៍ដូច្នេះ ៖ «បាទ! គ្រាន់ថា លោកបំពេញបេសកកម្មពីថ្ងៃ១៥ ដល់ថ្ងៃ២៤ ហ្នឹង មកដល់ពេលនេះ ខ្ញុំគ្រាន់តែបញ្ជាក់ថា នឹងមានជួបសម្ដេចតេជោ សម្ដេចនាយករដ្ឋមន្ត្រី នៅព្រឹកថ្ងៃ (១៧ កុម្ភៈ) ម៉ោង៩ នៅទីស្ដីការ ហើយបន្ទាប់ពីនោះ មានជួបឯកឧត្ដម ជាម យៀប និងឯកឧត្ដម ឱម យ៉ិនទៀង»។
សេចក្ដីប្រកាសព័ត៌មានរបស់ឧត្ដមស្នងការអង្គការសហប្រជាជាតិ ទទួលបន្ទុកសិទ្ធិមនុស្ស បញ្ជាក់ថា សេចក្ដីសង្កេតពីបេសកកម្មនេះ នឹងដាក់បញ្ចូលក្នុងរបាយការណ៍របស់អ្នករាយការណ៍ពិសេស ដើម្បីដាក់ជូនសម័យប្រជុំលើកទី១៨ របស់ក្រុមប្រឹក្សាសិទ្ធិមនុស្សនៃអង្គការសហប្រជាជាតិ៕