ក្នុងសេចក្តីថ្លែងការណ៍ ២ទំព័រនៅថ្ងៃច័ន្ទ ទី២១ ខែធ្នូ លោកគ្រី ស្តូហ្វ ប៉េស៊ូ តំណាងឧត្តមស្នងការសហប្រជាជាតិទទួលបន្ទុកសិទ្ធិមនុស្ស (OHCHR) ប្រចាំប្រទេសកម្ពុជា បានសម្ដែងការរន្ធត់ចិត្តយ៉ាងខ្លាំងដែលកម្ពុជាជាប្រទេសដែលបានផ្តល់សច្ចាប័នលើអនុសញ្ញាស្តីពីជនភៀសខ្លួនឆ្នាំ១៩៥១ និងមានកាតព្វកិច្ចតាមផ្លូវច្បាប់ ពិនិត្យការស្នើសុំជ្រកកោនរបស់ជនជាតិអ៊ុយហ្គរ៍ ២០នាក់ បែរជាផ្លាស់ប្តូរជំហរយ៉ាងឆាប់រហ័សរបស់ខ្លួន ដែលបានធានាអះអាងនៅមុនការបញ្ជូនជនភៀសខ្លួនអ៊ុយហ្គរ៍ទាំងនោះថា កម្ពុជានឹងត្រួតពិនិត្យធ្វើសំណុំបែបបទផ្តល់សិទ្ធិជ្រកកោនដល់ជនភៀសខ្លួនអ៊ុយហ្គរ៍ទាំងនោះ។
ការផ្លាស់ប្តូរជំហរដ៏ឆាប់រហ័សរបស់កម្ពុជានៅចុងសប្តាហ៍កន្លងមកនេះ ត្រូវបានបង្ហាញយ៉ាងច្បាស់ថា កម្ពុជាស្ថិតក្រោមការគាបសង្កត់ពីប្រទេសចិន ទើបបណ្តាលឲ្យកម្ពុជាចាត់ទុកជនជាតិអ៊ុយហ្គរ៍ទាំង ២០នាក់នោះ ថាជាជនអន្តោប្រវេសន៍ខុសច្បាប់ទៅវិញ។
សេចក្តីថ្លែងការណ៍ដដែលបន្តថា ការបញ្ជូនជនជាតិអ៊ុយហ្គរ៍ ២០នាក់ត្រឡប់ទៅវិញនេះ នាំឲ្យមានកង្វល់រឹតតែខ្លាំងឡើងថែមទៀតនៅក្នុងប្រទេសមួយ ដែលធ្លាប់ទទួលរងការធ្វើទុក្ខបុកម្នេញខ្លាំងក្នុងអំឡុងពេលសង្គ្រាម និងនៅក្នុងរបបខ្មែរក្រហម ហើយដែលកម្ពុជាដឹងច្បាស់បំផុតអំពីតម្លៃនិងភាពសំខាន់ចាំបាច់របស់ជនភៀសខ្លួន ជាពិសេសកម្ពុជាដែលមានប្រជាពលដ្ឋរបស់ខ្លួនរាប់ម៉ឺននាក់បានត្រូវសង្គ្រោះជីវិត ដោយប្រព័ន្ធការពារជនភៀសខ្លួនអន្តរជាតិនេះ។
លោក គ្រីស្តូហ្វ ប៉េស៊ូ តំណាងឧត្តមស្នងការសហប្រជាជាតិទទួលបន្ទុកសិទ្ធិនៅកម្ពុជា បានបញ្ជាក់ផងដែរថា រដ្ឋាភិបាលកម្ពុជាត្រូវមានឆន្ទៈក្នុងការគោរពការសន្យារបស់ខ្លួនចំពោះកិច្ចគាំពារដល់ជនភៀសខ្លួន គោរពគោលការណ៍សំខាន់ស្តីពីការមិនបញ្ជូនជនភៀសខ្លួនត្រឡប់វិញ និងការទប់ទល់នឹងសម្ពាធពីប្រទេសខាងក្រៅដែលមានអំណាចជាង ហើយបន្ថែមពីនេះប្រទេសខាងក្រៅដោយរាប់ទាំងប្រទេសចិនផង ត្រូវគោរពការប្តេជ្ញាតាមផ្លូវច្បាប់អន្តរជាតិរបស់កម្ពុជាក្រោមអនុសញ្ញាទាំងឡាយដែលកម្ពុជាបានផ្តល់សច្ចាប័ន។
លោក គ្រីស្តូហ្វ ប៉េស៊ូ បន្តថា ការបញ្ជូនជនភៀសខ្លួនអ៊ុយហ្គរ៍ត្រឡប់ទៅវិញនេះបានបង្កើតឲ្យមានទម្លាប់ជាអកុសលមួយ មិនមែនតែនៅកម្ពុជាប៉ុណ្ណោះទេ ប៉ុន្តែវាអាចកើតមានទូលំទូលាយជាងនេះ។ យន្តហោះដែលបានចាកចេញទៅកាលពីយប់ថ្ងៃសៅរ៍កន្លងមកនេះ ពោរពេញដោយក្តីអាម៉ាសនិងបង្ហាញថា សេរីភាពចាកផុតពីការខ្វះខាតនិងការភ័យខ្លាចបានក្លាយជាតូចចង្អៀតថែមទៀតនៅក្នុងផ្នែកមួយនៃពិភពលោកនេះ។
រហូតមកដល់ពេលនេះ គេនៅមិនទាន់ឃើញមានប្រតិកម្មណាមួយពីរដ្ឋាភិបាលកម្ពុជាជុំវិញសេចក្តីថ្លែងការណ៍ថ្កោលទោសខាងលើនេះនៅឡើយទេ។
សហភាពអឺរ៉ុបព្រួយបារម្ភពីស្ថានភាពរបស់ជនអ៊ុយហ្គរ៍២០នាក់
ចំណែកសហភាពអឺរ៉ុបវិញ នៅថ្ងៃច័ន្ទម្សិលមិញនេះក៏បានចេញសេចក្តីថ្លែងការណ៍មួយផងដែរសម្ដែងការព្រួយបារម្ភយ៉ាងខ្លាំងអំពីស្ថានភាពរបស់ជនជាតិអ៊ុយហ្គរ៍ ២០នាក់នោះ ដែលត្រូវបានដឹកត្រឡប់ទៅប្រទេសចិនវិញ។
ក្នុងសេចក្តីថ្លែងការណ៍នោះដែរ ប្រធានសហភាពអឺរ៉ុបបានទទូចសុំឲ្យរដ្ឋាភិបាលចិនគោរពនូវសិទ្ធិរបស់ជនជាតិអ៊ុយហ្គរ៍ ហើយរាល់សកម្មភាពដែលធ្វើឡើងគឺត្រូវធានាឲ្យមានតម្លាភាពនិងដោយស្របច្បាប់។
ចិនចុះហត្ថលេខាផ្ដល់ជំនួយដល់កម្ពុជា និងសរសើរជុំវិញការបញ្ជូនជនជាតិអ៊ុយហ្គរ៍
កាលពីថ្ងៃច័ន្ទម្សិលមិញនេះ ប្រទេសចិនបានចុះហត្ថលេខាផ្តល់ជំនួយនិងប្រាក់កម្ចីដល់កម្ពុជាដែលមានទឹកប្រាក់ជាង ១ពាន់លានដុល្លារអាមេរិក ព្រមទាំងសរសើរដល់រដ្ឋាភិបាលកម្ពុជាដែលសម្រេចចិត្តចាប់បញ្ជូនជនជាតិអ៊ុយហ្គរ៍កាន់សាសនាអ៊ិស្លាមចំនួន ២០នាក់ត្រឡប់ទៅប្រទេសចិនវិញ។
ប្រភពព័ត៌មាន អាអេហ្វប៉េ (AFP) ឲ្យដឹងថា លោក ខៀវ កាញារីទ្ធ អ្នកនាំពាក្យរាជរដ្ឋាភិបាលខ្មែរនិងជារដ្ឋមន្ត្រីក្រសួងព័ត៌មាន បានមានប្រសាសន៍ថា រដ្ឋាភិបាលកម្ពុជានិងចិនបានព្រមព្រៀងគ្នាថា នឹងបន្តពង្រឹងទំនាក់ទំនងនៃប្រទេសទាំងពីរ និងពង្រីកសហប្រតិបត្តិការនូវលើគ្រប់វិស័យទាំងអស់ ហើយថា រដ្ឋាភិបាលចិនក៏បានសម្ដែងការអរគុណចំពោះការជួយជ្រោមជ្រែងរបស់រដ្ឋាភិបាលខ្មែរដែលបានបញ្ជូនជនជាតិអ៊ុយហ្គរ៍ ២០នាក់នោះ ដែលតាមច្បាប់ក្នុងប្រទេសចិនគឺជាឧក្រិដ្ឋករ។
សូមរំឭកជូនថា ទង្វើរបស់រដ្ឋាភិបាលខ្មែរនេះត្រូវបានគេមើលឃើញថាបានធ្វើឡើងនៅទន្ទឹមដែលលោកអនុប្រធានាធិបតីចិន ស៊ី យិនពីង (Xi Jinping) បានមកទស្សនកិច្ចប្រទេសកម្ពុជាចំនួន ៣ថ្ងៃ ចាប់ពីថ្ងៃទី២០ ដល់ទី២២ ធ្នូ៕