តំណាងប្រជាពលរដ្ឋបានថ្លែងឲ្យដឹងថា អ្នកភូមិចំនួន ៤០០គ្រួសារបានដាក់ពាក្យបណ្ដឹងជាផ្លូវការទៅមេឃុំព្រែកស្លែងហើយ នៅព្រឹកថ្ងៃច័ន្ទ ទី៥ ខែមេសា ដើម្បីឲ្យអាជ្ញាធរឃុំបញ្ឈប់គ្រឿងចក្ររបស់ក្រុមហ៊ុនហេងអភិវឌ្ឍន៍ ឲ្យឈប់ឈូសឆាយដីដែលកំពុងមានជម្លោះនៅឃុំព្រែកស្លែង ដោយទាមទារឲ្យដោះស្រាយគ្នាជាមុនសិន។
បុរសម្នាក់ដែលអះអាងថា ជាតំណាងប្រជាពលរដ្ឋឈ្មោះ ញែប អឿង បានមានប្រសាសន៍ថា លោកបានយកពាក្យបណ្ដឹងទៅដាក់នៅសាលាឃុំព្រែកស្លែងរួចហើយ ប៉ុន្តែមិនជួបមេឃុំទេ គឺក្រុមប្រឹក្សាឃុំជាអ្នកទទួលពាក្យបណ្ដឹងនោះ។ លោកបន្តថា នៅថ្ងៃទី៥ ខែមេសានេះ អ្នកភូមិនៅតែបន្តទៅទប់ស្កាត់គ្រឿងចក្ររបស់ក្រុមហ៊ុនមិនឲ្យឈូសឆាយដីនោះទេ។
លោក ញែប អឿង បានឲ្យដឹងដូច្នេះ ៖ «មានគ្រឿងចក្រហើយមិននេះទៀត... មានតែប្ដឹងទៅខាងផ្នែកអង្គការច្បាប់ ព្រោះប្ដឹងទៅគ្រប់ក្រសួងស្ថាប័នអស់ហើយ ហើយគេអត់ដោះស្រាយ»។
លោក ញែប អឿង បានឲ្យដឹងថា នៅមានប្រជាពលរដ្ឋចំនួន ៣០០គ្រួសារផ្សេងទៀតដែលកំពុងចុះទៅទប់ស្កាត់ត្រាក់ទ័រកុំឲ្យឈូសដី គ្រោងនឹងដាក់ពាក្យប្ដឹងមកសាលាឃុំទៀតដែរ។
ដីដែលមានទំនាស់រវាងប្រជាពលរដ្ឋជាមួយក្រុមហ៊ុនហេងអភិវឌ្ឍន៍នោះ មានចំនួន ២០០ហិកតា ស្ថិតនៅក្នុងឃុំព្រែកស្លែង ស្រុកកណ្ដាលស្ទឹង ខែត្រកណ្ដាល។
មេឃុំព្រែកស្លែង លោកស្រី មាស សុខែម មិនបានធ្វើការអធិប្បាយនៅថ្ងៃទី៥ ខែមេសា ជុំវិញការដាក់ពាក្យបណ្ដឹងរបស់អ្នកភូមិនេះទេ។ ប៉ុន្តែលោកស្រីមេឃុំ ក៏ដូចជាតំណាងក្រុមហ៊ុនហេងអភិវឌ្ឍន៍ បានបំភ្លឺកាលពីថ្ងៃទី៤ ខែមេសា ថា ប្រជាពលរដ្ឋចំនួន ១៤គ្រួសារនៅឃុំព្រែកស្លែង បានលក់ដីឲ្យក្រុមហ៊ុនក្នុង១ហិកតា១តម្លឹងមាស រីឯអ្នកភូមិផ្សេងទៀតពុំមានដីនៅតំបន់ទំនប់៩៤ និងទំនប់៩៦ទេ គឺជាដីរបស់អ្នកភូមិនៅឃុំផ្សេងទៀតដែលបានលក់ឲ្យក្រុមហ៊ុនអស់រួចហើយ។
តំណាងប្រជាពលរដ្ឋដដែល លោក ញែប អឿង បានបំភ្លឺថា កាលពីឆ្នាំ២០០៥ អ្នកភូមិនៅឃុំព្រែកស្លែងចំនួន ១៥គ្រួសារ បានជួលគេកាប់ឆ្ការព្រៃអស់ថ្លៃចំនួន ៣០ម៉ឺនរៀលក្នុងមួយហិកតា បន្ទាប់មកនៅឆ្នាំដដែល ក្រុមហ៊ុនហេងអភិវឌ្ឍន៍បានសុំខ្ចីដីរបស់អ្នកភូមិចំនួន ១៥គ្រួសារនោះធ្វើកសិកម្មដាំពោត ដោយសងថ្លៃជួលគេកាប់ឆ្ការព្រៃចំនួន ៣០ម៉ឺនរៀលវិញ។ អ្នកភូមិមិនបានលក់ដីឲ្យក្រុមហ៊ុនទេ ប៉ុន្តែផ្ទុយទៅវិញ ក្រុមហ៊ុនបានអះអាងថា គេទិញដីពីប្រជាពលរដ្ឋ។
ប្រជាពលរដ្ឋនៅឃុំព្រែកស្លែង បានចាប់ផ្ដើមធ្វើការតវ៉ានៅកន្លែងដីជម្លោះតាំងពីថ្ងៃសុក្រ ទី២ ខែមេសាកន្លងមក រហូតដល់ថ្ងៃទី៤ មេសា ពុំមានដំណោះស្រាយណាមួយនោះអ្នកភូមិបាននាំគ្នាឡើងមកសាលាឃុំ ដោយបិទផ្លូវជាតិលេខ២ នៅទល់មុខសាលាឃុំព្រែកស្លែង។
មន្ត្រីឃ្លាំមើលសិទ្ធិមនុស្សជាន់ខ្ពស់នៃសមាគមអាដហុក លោក ចាន់ សុវ៉េត បានបញ្ជាក់ថា ក្រោយពីអ្នកភូមិជាច្រើនរយនាក់បានបិទផ្លូវជាតិលេខ២ប្រមាណ៣ម៉ោង កាលពីថ្ងៃទី៤ ខែមេសា អាជ្ញាធរស្រុកសហការនឹងអាជ្ញាធរខែត្រ បានទៅបំបែកហ្វូងអ្នកភូមិ ហើយបានប្រើអំពើហិង្សាមកលើអ្នកភូមិ ព្រមទាំងចាប់ខ្លួនប្រជាពលរដ្ឋបានប្រមាណ ១០នាក់ ប៉ុន្តែអ្នកភូមិមួយចំនួនត្រូវបានដោះលែងវិញភ្លាមៗ នៅសល់ ៧នាក់ ហើយដល់ម៉ោង ១០និង៤៥នាទីយប់ថ្ងៃទី៥ មេសា ទើបគេដោះលែងអ្នកភូមិទាំង ៧នាក់នោះវិញ។
លោក ចាន់ សុវ៉េត មានប្រសាសន៍ថា ៖ «អាជ្ញាធរខ្លួនឯងហ្នឹងគឺធ្វើសកម្មភាពមិនប្រក្រតី ធ្វើសកម្មភាពដោយលួចលាក់ អាជ្ញាធរខ្លួនឯងធ្វើមិនឲ្យប្រជាពលរដ្ឋហ្នឹងទុកចិត្ត»។
លោក ចាន់ សុវ៉េត បានបញ្ជាក់ថា ចំពោះបញ្ហាជម្លោះដីនេះ អាជ្ញាធរឃុំបានគេចវេះក្នុងការដោះស្រាយជូនប្រជាពលរដ្ឋ ហើយថា បញ្ហាដែលឈានដល់ការបិទផ្លូវជាតិលេខ២នោះ ដោយសារតែអាជ្ញាធរឃុំមិនចេញមុខដោះស្រាយជូនប្រជាពលរដ្ឋ ដែលប្រជាពលរដ្ឋគ្មានជម្រើសអ្វីផ្សេងនោះ៕