លោកស្រី ខារ៉ល រ៉តលី (Carol Rodley) ឯកអគ្គរដ្ឋទូតសហរដ្ឋអាមេរិកប្រចាំកម្ពុជា មានប្រសាសន៍ថា រាល់គ្រប់សវនាការនិងការកាត់ក្តី មិនថាសវនាការកាត់ទោសអ្នកនយោបាយ ឬសវនាការទៅលើពលរដ្ឋសាមញ្ញនោះទេ លោកស្រីបានតាមដានមិនដែលឲ្យចន្លោះឡើយ។
លោកស្រី រ៉តលី មិនបានធ្វើអត្ថាធិប្បាយលើការសម្រេចក្តីរបស់តុលាការខេត្តស្វាយរៀងលើករណីលោក សម រង្ស៊ី បែបណានោះទេ ប៉ុន្តែលោកស្រីគ្រាន់តែបញ្ជាក់ខ្លីថា រាល់គ្រប់សវនាការទាំងអស់គួរធ្វើឡើងឲ្យមានតម្លាភាពនិងត្រឹមត្រូវ។
លោកស្រី រ៉តលី បញ្ជាក់ឲ្យដឹងតាមរយៈអ្នកបកប្រែភាសាដូច្នេះ ៖ «យើងបានតាមដានដំណើរការកាត់ក្ដីនេះយ៉ាងជាប់លាប់ ហើយមិនមែនតែដំណើរការកាត់ក្ដីដែលពាក់ព័ន្ធនឹងអ្នកនយោបាយ និងអ្នកមានមុខមាត់ទេ គឺដំណើរការកាត់ក្ដីផ្សេងៗទៀត គឺដំណើរការកាត់ក្ដីទាំងអស់គួរតែត្រូវមានលក្ខណៈតម្លាភាព មានលក្ខណៈយុត្តិធម៌និងត្រឹមត្រូវ»។
លោកស្រី រ៉តលី បានថ្លែងយ៉ាងដូច្នេះគឺនៅក្រោយមួយថ្ងៃបន្ទាប់ពីតុលាការខេត្តស្វាយរៀងបានកាត់ក្តីឲ្យលោក សម រង្ស៊ី ជាប់ពន្ធនាគារចំនួន ២ឆ្នាំរួចមក។
លោក សម រង្ស៊ី ប្រធានគណបក្សសមរង្ស៊ី កាលពីថ្ងៃទី២៧ ខែមករាកន្លងទៅ ត្រូវបានតុលាការខេត្តស្វាយរៀងកាត់ទោសកំបាំងមុខដាក់ពន្ធនាគាររយៈពេល ២ឆ្នាំ និងពិន័យជាប្រាក់ជាច្រើនលានរៀលទៀត ក្រោមបទចោទថា បានបំផ្លិចបំផ្លាញទ្រព្យសម្បត្តិសាធារណៈ និងញុះញង់ឲ្យមានការរើសអើងពូជសាសន៍។ ការកាត់ទោសនេះធ្វើឡើងនៅគ្រាដែលលោក សម រង្ស៊ី រួមជាមួយប្រជាពលរដ្ឋរស់នៅស្រុកចន្ទ្រា ខេត្តស្វាយរៀង មួយចំនួនទៀត បានដកបង្គោលតម្រុយព្រំដែនលេខ១៨៥ រវាងប្រទេសកម្ពុជានិងវៀតណាម កាលពីខែតុលា ឆ្នាំ២០០៩។
លោកស្រីឯកអគ្គរដ្ឋទូតអាមេរិកមិនបានគិតថា ករណីលោក សម រង្ស៊ី ជារឿងនយោបាយនោះទេ ក៏ប៉ុន្តែប្រសិនបើបណ្តឹងចោទប្រកាន់នេះបានឡើងទៅដល់តុលាការសាលាឧទ្ធរណ៍ជាបន្តទៀត ហើយការសម្រេចក្តីរបស់តុលាការសាលាឧទ្ធរណ៍អាចប្រព្រឹត្តទៅមានភាពយុត្តិធម៌ និងមានតម្លាភាពនោះ វាជាសញ្ញាល្អមួយ។
លោកស្រី ខារ៉ល រ៉តលី បានមានប្រសាសន៍ថា ៖ «ខ្ញុំគិតថា ប្រសិនបើរឿងក្ដីនេះបន្តទៅឧទ្ធរណ៍ទៀត ហើយប្រសិនបើសាលាឧទ្ធរណ៍ហ្នឹងអាចប្រព្រឹត្តទៅនៅក្នុងលក្ខណៈតម្លាភាព យុត្តិធម៌ ហើយនិងត្រឹមត្រូវ»។
លោក សម រង្ស៊ី បានចាត់ទុកការកាត់ទោសឲ្យជាប់ពន្ធនាគារ ២ឆ្នាំ និងប្រជាពលរដ្ឋ ២នាក់ទៀតក្នុងម្នាក់ ១ឆ្នាំ ថា មិនមែនជារឿងធំដុំទេ ប៉ុន្តែរឿងអាជ្ញាធរកាត់ដីឲ្យបរទេសទៅវិញទេដែលជារឿងធំដុំនោះ៕