ស្ត្រីឈ្មោះ មាស ស្រី អាយុ៣៨ឆ្នាំ រស់នៅភូមិកោះក្បានកណ្ដាល ដែលត្រូវបានគេបោះបង្គោលឈើតម្រុយសម្រាប់កំណត់បង្គោលព្រំដែនលេខ១៨៥ ចំដីស្រែរបស់គាត់កាលពីពេលកន្លងទៅ មានការសង្ស័យចំពោះសកម្មភាពរបស់មន្ត្រីទាំងពីររូបនោះកាលពីថ្ងៃសៅរ៍។
អ្នកស្រី មាស ស្រី បានបញ្ជាក់ថា ៖ «បើលោកឯងធ្វើការត្រឹមត្រូវ លោកឯងមិនមកវាស់លួចលាក់អ៊ីចឹងទេ លោកឯងប្រាប់ប្រជាជនឲ្យដឹងហើយ ព្រោះលោកឯងចង់ធ្វើការអី ចង់ធ្វើការស្ងាត់ៗ ហើយសុទ្ធតែលួចលាក់គ្នាទៀត ដល់កន្លែងណាសំខាន់លោកឯងសុទ្ធតែស៊ីញ៉ូគ្នា»។
អ្នកស្រី មាស ស្រី ក៏បានឲ្យដឹងផងដែរថា អ្នកស្រីបានប៉ះសម្ដីខ្លះជាមួយមន្ត្រីវាស់វែងព្រំដែន ៖ «គេបានឡើងជិះម៉ូតូ គេថាឲ្យខ្ញុំ គេបានចង្អុលមុខខ្ញុំ គេថា "មីងឯងគេអត់ដោះស្រាយឲ្យទេ បើប្រជាជនបាត់បង់ដីថ្មើរហ្នឹងគេដោះស្រាយឲ្យ បើស្រុកមីងឯងមួយគេមិនដោះស្រាយឲ្យទេ ព្រោះមីងឯងតស៊ូខ្លាំងពេក មីងឯងប្ដឹងខ្លាំងពេក" គេថាឲ្យខ្ញុំអ៊ីចឹងណា៎! ហើយខ្ញុំប្ដឹងខ្លាំងណាស់រាល់ថ្ងៃហ្នឹង គេតាមសង្កេតខ្ញុំគ្រប់ពេលគ្រប់វេលា ទៅផ្លូវណាៗគេដឹងទាំងអស់... ខ្ញុំមិនខ្លាចនឹងប្ដឹងទេ...»។
លោក ឈិន សុវ៉េត អាយុ៣៨ឆ្នាំ ជាកសិករនៅភូមិកោះក្បានកណ្ដាលដែរ បានប្រាប់ថា លោកមិនយល់ពីសកម្មភាពនិងបំណងរបស់ក្រុមមន្ត្រីទាំងនោះទេ។
លោក ឈិន សុវ៉េត បានឲ្យដឹងថា ៖ «វ៉ៃៗម៉េចក៏មិនប្រាប់ប្រជាជនឲ្យដឹង ព្រោះប្រជាជនគ្នាមិនដែលបានរៀនសូត្រអីផង។ គ្នាងឿងឆ្ងល់ ឃើញគេធ្វើចម្លែកៗអ៊ីចឹង ចេះតែមានការងឿងឆ្ងល់ ចេះតែនិយាយ ចេះតែស្ដីទៅណា៎!»។
លោក ពៅ ភាព ជំទប់ទី២នៃឃុំសំរោង បានអះអាងថា មន្ត្រីវាស់វែងព្រំដែនមិនដែលទាក់ទងឬសហការជាមួយអាជ្ញាធរឃុំឡើយ ហើយលោកថា លោកមិនយល់ទេនូវទង្វើរបស់មន្ត្រីកាលពីថ្ងៃសៅរ៍នោះ។
លោក ពៅ ភាព បានថ្លែងថា ៖ «គេធ្វើអីអ៊ីចឹងគេអត់ដែលនិយាយ ឬផ្សព្វផ្សាយជាព័ត៌មានចេញថា គេធ្វើវាស់អ៊ីចេះៗទៅខុស ឥឡូវថាត្រូវកែតម្រូវអីយ៉ាងម៉េចៗ គេអត់បានឲ្យឮ ឲ្យដឹងអីទាំងអស់! គេដើរហ្នឹង ដើររបៀបក្មេងទៅបំពុលសត្វអ៊ីចឹងណា៎ ដើរតាមវាលស្រែហ្នឹង សរសេរកត់ៗយកអ៊ីចឹងណា៎»។
អភិបាលស្រុកចន្ទ្រា លោក ជា យាង បានមានប្រសាសន៍ថា លោកមិនបានជ្រាបអំពីការដែលថា មានមន្ត្រីវាស់វែងព្រំដែនបានចុះធ្វើការកាលពីថ្ងៃទី២៨ វិច្ឆិកានោះទេ។
កាលពីថ្ងៃទី២៦ វិច្ឆិកា មន្ត្រីមួយក្រុមនៃទីស្ដីការគណៈរដ្ឋមន្ត្រី រួមទាំងកម្លាំងការពារព្រំដែនផង សរុបមានចំនួនរាប់សិបនាក់ បានចុះទៅពិនិត្យនិងថតជាខ្សែវីដេអូត្រង់ចំណុចដែលមេបក្សប្រឆាំង លោក សម រង្ស៊ី បានដកបង្គោលតម្រុយកំណត់ព្រំដែនចេញពីដីស្រែរបស់ប្រជាកសិករខ្មែរកាលពីថ្ងៃទី២៥ តុលា កន្លងទៅ។
ដោយឡែក នៅថ្ងៃទី២៦ វិច្ឆិកា អ្នកយកព័ត៌មានវិទ្យុអាស៊ីសេរី ព្រមទាំងសកម្មជនការពារសិទ្ធិមនុស្សអាដហុកមួយរូបផង មិនត្រូវបានអនុញ្ញាតឲ្យចូលទៅជិតឬថតសកម្មភាពរបស់ក្រុមមន្ត្រីទាំងនោះឡើយ៕