សកម្មភាពបាញ់ថ្នាំពណ៌លើដើមឈើ និងកាប់ឈើនៅក្នុងតំបន់អាងស្តុកទឹកនេះ ធ្វើឲ្យប្រជាពលរដ្ឋក្នុងមូលដ្ឋានព្រួយបារម្ភ និងមានគម្រោងធ្វើការតវ៉ាជាថ្មីទៅអាជ្ញាធរពាក់ព័ន្ធសុំឲ្យផ្ដល់ចំលើយស្ដីពីសំណងផលប៉ះពាល់ជាក់លាក់ដល់ប្រជាពលរដ្ឋមុនធ្វើការសាងសង់ទំនប់។
ប្រជាពលរដ្ឋរស់នៅភូមិស្រែគរ ឃុំស្រែគរ ស្រុកសេសាន គឺលោក សៀក មេគង្គ។ លោកបានបញ្ជាក់ថា ចាប់ពីចុងខែធ្នូ ឆ្នាំ២០១១ រហូតបច្ចុប្បន្ន ព្រៃឈើសហគមន៍អភិរក្សក្នុងតំបន់អាងស្តុកទឹកចំនួនជាង ១០ហិកតារហើយត្រូវកម្មករជនជាតិវៀតណាម ជាង ៣០នាក់ អមដោយកងនគរបាលស្រុក ៣នាក់ និងមន្ត្រីព្រៃឈើម្នាក់កាប់រាន និងដើរបាញ់ថ្នាំពណ៌លើដើមឈើមានមុខកាត់ពី ២០សង់ទីម៉ែត្រឡើង ដើម្បីកាប់យកឈើ។
លោកបន្តថា ជនជាតិវៀតណាម ដែលគេប្រើប្រាស់សម្រាប់កាប់ឈើនោះ មិនចេះនិយាយភាសាខ្មែរទេ ពួកគេនិយាយភាសាឡាវ ប្រាប់អ្នកភូមិពីគម្រោងកាប់រានព្រៃយកឈើនេះ។ ក្នុងនោះដែរក្រុមនគរបាលខ្មែរអ្នកការពារក្រុមកម្មករវៀតណាម ក៏ប្រាប់អ្នកភូមិឲ្យត្រៀមចាកចេញពីតំបន់នោះ ដើម្បីសំអាតផ្ទៃអាងទឹក៖ «ចរចាគ្នាកាលពីឆ្នាំ២០០៨ ២០០៩ ២០១០ ថា ម្ចាស់គម្រោងថា ហេដ្ឋារចនាសម្ព័ន្ធឲ្យ ហើយមានវត្តអារាម ទីលំនៅឲ្យជាក់លាក់ពិតប្រាកដទើបសំអាតអាងទឹកហ្នឹងណា! ស្រាប់តែវៀតណាម ចូលមករំលំឡើងរាបល្វឹងល្វើយអស់រលីងហើយ»។
មេឃុំស្រែគរ លោក ធី ញ៉ឺង បានអះអាងដែរថា ក្រុមសមត្ថកិច្ចអ្នកដឹកនាំកម្មករចូលមកកាប់រានព្រៃយកឈើនោះ មិនបានផ្ដល់ដំណឹងឬបង្ហាញឯកសារទាក់ទងគម្រោងសំអាតផ្ទៃអាងស្តុកទឹកនោះដល់អាជ្ញាធរឃុំបានដឹងនោះឡើយ។
លោកបញ្ជាក់ថា ប្រជាពលរដ្ឋបានស្នើសុំជាច្រើនលើកទៅអាជ្ញាធរពាក់ព័ន្ធ ដើម្បីផ្តល់ដំណោះស្រាយពីសំណងផលប៉ះពាល់ជាក់លាក់ឲ្យប្រជាពលរដ្ឋ ប៉ុន្តែមិនបានលទ្ធផល៖ «ខ្ញុំកំពុងគិតជាមួយសហគមន៍ធ្វើម៉េចយ៉ាងហ្នឹងអត់ដឹងឯកភាពពីខាងណាមកផង។ ខ្ញុំបន្ទោសស្រុក ម៉េចមិនឲ្យខ្ញុំដឹងផង»។
ក្រុមហ៊ុនចំនួនពីរ គឺក្រុមហ៊ុនអេឡិចទ្រិចស៊ីធី វៀតណាម (Electricity Vietnam) និងក្រុមហ៊ុន រ៉ូយ៉ាល់ ហ្គ្រុប (Royal Group) កាលពីចុងខែមេសា ឆ្នាំ២០១១ បានចុះកិច្ចព្រមព្រៀងសាងសង់ទំនប់វារីអគ្គិសនីសេសានក្រោមពីរ ក្នុងគម្រោងទឹកប្រាក់ជាង ៨០០លានដុល្លារពីឆ្នាំ២០១០ ដល់ឆ្នាំ២០១៤ បន្ទាប់ពីរាជរដ្ឋាភិបាលបានឯកភាពទៅនឹងរបាយការណ៍វាយតម្លៃហេតុប៉ះពាល់បរិស្ថានចុងក្រោយនឹងបញ្ចប់សម្រាប់គម្រោងនេះ។
វិទ្យុអាស៊ីសេរីនៅថ្ងៃច័ន្ទ ទី២៣ ខែមករា ឆ្នាំ២០១២ មិនអាចទាក់ទងអភិបាលស្រុកសេសាន គឺលោក ប៊ូ កែវសុវណ្ណ និងអភិបាលខេត្តស្ទឹងត្រែង លោក ឡួយ សូផាត ដើម្បីបញ្ជាក់ពីសេចក្ដីរាយការណ៍របស់អ្នកភូមិបានទេ ដោយអ្នកទទួលទូរស័ព្ទលោកទាំងពីរបញ្ជាក់ថា លោកជាប់រវល់។
យ៉ាងនេះក្ដី ប្រភពមន្ត្រីក្រសួងឧស្សាហកម្ម រ៉ែ និងថាមពលមួយរូបសុំមិនបញ្ចេញឈ្មោះ បានបញ្ជាក់ថា គម្រោងសាងសង់ទំនប់វារីអគ្គិសនីសេសានក្រោមពីរ កំពុងឋិតក្នុងកិច្ចពិភាក្សាថ្នាក់ជាតិ មិនទាន់មានសេចក្ដីសម្រេចណាមួយឲ្យធ្វើការសាងសង់ ឬសំអាតផ្ទៃអាងស្តុកទឹកនោះនៅឡើយ។
អ្នកសម្របសម្រួលអង្គការទន្លេបី គឺលោក មៀច មាន។ លោកបានចាប់អារម្មណ៍ថា រាជរដ្ឋាភិបាលគួរចាត់វិធានការសំខាន់ គឺដោះស្រាយសំណងជាក់លាក់ដល់ប្រជាពលរដ្ឋស្របតាមវិធានការដាក់ចេញរបស់ម្ចាស់គម្រោងអនុវត្តសម្រាប់ការតាំងទីលំនៅឡើងវិញរបស់អ្នកភូមិ៖ «រហូតមកដល់ពេលនេះ យើងមិនទាន់បានដឹងឮថា តើក្រុមហ៊ុនចាប់ផ្ដើមពិភាក្សាទាក់ទងសំណងជាមួយសហគមន៍នៅពេលណាទេ ខាងអាជ្ញាធរខេត្ត ក៏ដូចជាខាងរាជរដ្ឋាភិបាលមានចំណាត់ការបែបណា?»។
ទិន្នន័យប៉ាន់ប្រមាណក្នុងរបាយការណ៍វាយតម្លៃហេតុប៉ះពាល់បរិស្ថានចុងក្រោយនឹងបញ្ចប់គម្រោងសាងសង់ទំនប់វារីអគ្គិសនីសេសានក្រោមពីរ មានប្រជាពលរដ្ឋ ១.៥៧៩គ្រួសារ ក្នុងភូមិចំនួន ៧ ក្នុងឃុំចំនួន ៤ ក្នុងស្រុកសេសាន ត្រូវផ្លាស់ប្ដូរទីលំនៅទៅទីតាំងផ្សេង និងមានហេតុប៉ះពាល់ផ្នែកបរិស្ថានសំខាន់ៗ រួមមាន បាត់បង់ព្រៃឈើជម្រកសត្វព្រៃជាង ៣ម៉ឺនហិកតារ ដីកសិកម្ម ១.២១៦ហិកតារ៕