តំណាងរាស្ត្រគណបក្សសមរង្ស៊ីមណ្ឌលកំពង់ធំ បានឲ្យដឹងនៅថ្ងៃទី១៣ មីនាថា លោកនឹងយកពាក្យបណ្ដឹងប្រជាពលរដ្ឋចំនួនបួនខែត្រ ដែលរស់នៅតំបន់ព្រៃឡង់ ដាក់ជួនប្រធានរដ្ឋសភា និងលោកនាយករដ្ឋមន្ត្រី ហ៊ុន សែន នៅដើមសប្ដាហ៍ក្រោយនេះ ដើម្បីសុំឲ្យអន្តរាគមន៍ទៅក្រុមហ៊ុនវៀតណាមបញ្ឈប់កាប់បំផ្លាញព្រៃឡង់តទៅទៀត ដែលធ្វើឲ្យប៉ះពាល់ដល់ជីវភាពប្រជាពលរដ្ឋ។
លោក ម៉ែន សុថាវរិន្រ្ទ តំណាងរាស្ត្រគណបក្សប្រឆាំង ប្រចាំខែត្រកំពង់ធំ បានមានប្រសាសន៍ថា ក្នុងនាមលោកជាអ្នកតំណាងរាស្ត្រ និងប្រជាពលរដ្ឋ បានគ្រោងនឹងដាក់ពាក្យបណ្ដឹងទៅប្រធានសភា និងលោកនាយករដ្ឋមន្ត្រីនេះ ដោយសារតែគ្មានអ្នកណាអាចដោះស្រាយបញ្ហា ដែលក្រុមហ៊ុនវៀតណាមកំពុងតែកាប់បំផ្លាញព្រៃឡង់នេះបានទេ ដែលធ្វើឲ្យប៉ះពាល់ការរស់នៅរបស់ប្រជាពលរដ្ឋ ៖ "ខួចបរិស្ថាន ខួចព្រៃឡង់អីទាំងអស់ ហើយខ្ញុំនឹងសរសេរលិខិតទៅសម្ដេចនាយក មានតែសម្ដេចនាយកទេ ដែលអាចដោះស្រាយបញ្ហានេះបាន"។
កាលពីថ្ងៃទី១១ មីនា កន្លងទៅ មជ្ឈមណ្ឌលសិទ្ធិមនុស្សកម្ពុជា បានរៀបចំវេទិកាសាធារណៈមួយ នៅក្នុងឃុំមានរិទ្ធ ស្រុកសណ្ដាន់ ខែត្រកំពង់ធំ ដែលមានអ្នកតំណាងរាស្ត្រមកពីគណបក្សចំនួន៤ ចូលរួម គឺគណបក្សសមរង្ស៊ី គណបក្សសិទ្ធិមនុស្ស គណបក្សនរោត្តមរណឫទ្ធិ និងគណបក្សហ្វ៊ុនស៊ិនប៉ិច ព្រមទាំងអភិបាលរងខែត្រកំពង់ធំ និងមន្ត្រីមួយចំនួនទៀត។ នៅខណៈនោះ លោក មែន សុថាវរិន្រ្ទ បានអះអាងថា លោកបានចូលទៅមើលរោងម៉ាស៊ីនអារឈើនៅក្នុងស្រុកសណ្ដាន់នោះ តែត្រូវបានសមត្ថកិច្ចមិនឲ្យលោកចូលទៅមើលនោះទេ ដោយពួកគេបានការពារក្រុមហ៊ុនទៅវិញ។
អភិបាលរងខែត្រកំពង់ធំ លោក អ៊ុត សំអន បានមានប្រសាសន៍នៅថ្ងៃទី១៣ មីនានេះថា បានជារដ្ឋាភិបាលបានផ្ដល់ដីសម្បទានសេដ្ឋកិច្ចឲ្យក្រុមហ៊ុនវៀតណាម ស៊ីអរស៊ីខេ (CRCK) អភិវឌ្ឍន៍ដាំដើមកៅស៊ូនៅក្នុងស្រុកសណ្ដាន់នោះ ដោយសាររដ្ឋាភិបាលចង់អភិវឌ្ឍន៍នៅនឹងកន្លែង និងចង់កែប្រែទម្លាប់រស់នៅរបស់ប្រជាពលរដ្ឋ ដែលកន្លងមកពឹងលើតែអនុផលព្រៃឈើនោះ។ លោក អ៊ុត សំអន បានបញ្ជាក់ថា ការដាក់ពាក្យបណ្ដឹងរបស់ប្រជាពលរដ្ឋនេះ ជាសិទ្ធិរបស់ប្រជាពលរដ្ឋ។
ការលើកឡើងរបស់អភិបាលរងខែត្រដូច្នេះ តំណាងសហគមន៍ជនជាតិភាគតិចកួយ ដែលរស់នៅអាស្រ័យលើអនុផលព្រៃឈើតាំងពីជីដូនជីតារបស់ពួកគេមកហើយនោះ បានមានប្រតិកម្មថា រដ្ឋាភិបាលបានផ្ដល់ដីសម្បទានសេដ្ឋកិច្ចឲ្យក្រុមហ៊ុននេះ កំពុងតែរុញច្រានឲ្យអ្នកភូមិធ្លាក់ពីម្ចាស់ព្រៃទៅជាអ្នកស៊ីឈ្នួលគេវិញ ហើយកូនចៅរបស់ពួកគេទៅមុខទៀត តើពួកគេពឹងលើអ្វីទៀត ប្រសិនបើព្រៃឈើត្រូវបានគេកាប់បំផ្លាញអស់នោះ។
លោក ឈៀង វុទ្ធី បានលើកឡើងថា ប្រជាពលរដ្ឋចំនួនបួនខែត្រ មានខែត្រកំពង់ធំ ខែត្រព្រះវិហារ ខែត្រក្រចេះ និងខែត្រស្ទឹងត្រែងដែលរស់នៅតំបន់ព្រៃឡង់កំពុងប្រមូលស្នាមដៃ ដើម្បីដាក់ពាក្យបណ្ដឹងទៅប្រធានរដ្ឋសភា និងលោកនាយករដ្ឋមន្ត្រីតាមរយៈតំណាងរាស្ត្រគណបក្សប្រឆាំងនោះ ៖ "វាមិនថាព្រៃស្រោងទាំងស្រុងទេ ហើយមួយផ្នែកទៀត ការកាប់ព្រៃអានាធិបតេយ្យខ្លះ ដែលជាមិនមានការគ្រប់គ្រងហ្មត់ចត់ អ៊ីចឹងវាជាបញ្ហាមួយដែរ"។
ព្រៃឡង់ដែលមានឈ្មោះជាភាសាជនជាតិកួយ មានន័យថា «ព្រៃរបស់យើងទាំងអស់គ្នា» ស្ថិតនៅភាគខាងជើងប្រទេស គឺជាព្រៃស្រោងធំបំផុតនៅតំបន់អាស៊ីភាគអាគ្នេយ៍ មានទំហំ ៣.៦០០គីឡូម៉ែត្រក្រឡា ជាប់ខេត្តចំនួន៤ គឺខេត្តក្រចេះ ស្ទឹងត្រែង កំពង់ធំ និងព្រះវិហារ។ ហើយប្រជាពលរដ្ឋប្រមាណ ២០ម៉ឺននាក់កំពុងរស់នៅអាស្រ័យផលនៃអនុផលព្រៃឈើនេះ។
លោក អ៊ុត សំអន បានឲ្យដឹងទៀតថា នៅក្នុងខែត្រកំពង់ធំ នៅក្នុងខែត្ររបស់លោក មានក្រុមហ៊ុនក្នុងស្រុកនៅក្រៅស្រុកប្រមាណ ២០ក្រុមហ៊ុន ដែលទទួលបានដីសម្បទានសេដ្ឋកិច្ចពីរដ្ឋាភិបាលក្នុងចំណោមក្រុមហ៊ុនទាំងនោះ ទទួលបានដីទំហំចន្លោះ ១ពាន់ហិកតារ ដល់ជិត ១ម៉ឺនហិកតារ អភិវឌ្ឍន៍ដាំដើមកៅស៊ូ និងដើមប្រេងខ្យល់៕