ប្រជានេសាទនៅខេត្តកំពត បានឲ្យដឹងនៅថ្ងៃទី២១ ខែសីហា ថា ក្រុមគ្រួសារអ្នកនេសាទជាច្រើនរយគ្រួសារនៅក្នុងឃុំចំនួន ៤ ក្នុងស្រុកកំពត កំពុងតែរងនូវផលលំបាកក្នុងមុខរបរនេសាទត្រី ក្តាម និងបង្គា បានតិចតួចណាស់ក្នុងមួយថ្ងៃៗ ដោយសារមានទូកនេសាទវៀតណាមតែងតែចូលមកឆក់ត្រី និងប្រើប្រាស់ឧបករណ៍នេសាទខុសច្បាប់ក្នុងទ្រង់ទ្រាយធំនាពេលយប់។
គ្រួសារអ្នកនេសាទទាំងនោះ គឺនៅក្នុងឃុំចំនួន ៤ មានឃុំកោះតូច ឃុំស្រែកោះ ឃុំកែប និងឃុំត្រពាំងល្ពៅ ក្នុងស្រុកកំពត ខេត្តកំពត។ ទូកនេសាទវៀតណាម ឬហៅថា ទូកគូរនោះ តែងតែចូលមកនេសាទត្រី ក្តាម និងបង្គានៅក្នុងដែនសមុទ្រកម្ពុជាដោយខុសច្បាប់នៅពេលយប់ រហូតដល់ភ្លឺ ដោយប្រើឧបករណ៍អួនក្រឡាញឹក និងឧបករណ៍ឆក់ជាដើម។ គេបានចូលមកក្នុងមួយយប់ៗចំនួន ១០ទូក។
គ្រួសារអ្នកនេសាទបានបន្ទោសថា អាជ្ញាធរជលផលខេត្តមិនបានអើពើនឹងបញ្ហានេះទេ នៅពេលដែលមានការតវ៉ាពីប្រជាពលរដ្ឋកន្លងមក។
ប្រជាពលរដ្ឋជាអ្នកនេសាទឈ្មោះ ស្មា លីម អាយុ ៤០ឆ្នាំ នៅក្នុងភូមិស្រែ ឃុំស្រែកោះ ស្រុកកំពត ខេត្តកំពត បានថ្លែងប្រាប់វិទ្យុអាស៊ីសេរីតាមទូរស័ព្ទនៅថ្ងៃទី២១ ខែសីហា ថា ៖ «កាលពីវាមិនទាន់ចូល យើងអាចរកក្នុងមួយថ្ងៃបានបង្គា ៤-១០គីឡូក្រាមអីអ៊ីចឹង! ឥឡូវក្នុងមួយយប់ រក ១គីឡូមិនចង់បានផង! អត់ចង់បានអីទេ ចង់បានតែកុំឲ្យទូកអូសគូរវៀតណាម វាចូលមកលុកលុយអ៊ីចឹងពេក! ប្រជាជន ឬប្រជាពលរដ្ឋ អ្នកនេសាទតូចតាចហ្នឹង គ្នាដាច់ហើយ!»។
គ្រួសារអ្នកនេសាទទាំងនោះបានធ្វើញត្តិ និងស្នាមផ្ដិតមេដៃចំនួន ៣០០គ្រួសារ ទៅ ៤០០គ្រួសារ ប្ដឹងទៅអាជ្ញាធរខេត្តកំពត កាលពីសប្ដាហ៍កន្លងទៅថ្មីៗនេះ ប៉ុន្តែនៅមិនទាន់មានចម្លើយនៅទ្បើយទេ។
ប្រជាពលរដ្ឋជាអុ្នកនេសាទឈ្មោះ កែវ អ៊េល អាយុ ៤៦ឆ្នាំ នៅក្នុងឃុំស្រែកោះ ស្រុកកំពត ខេត្តកំពត បានថ្លែងថា ៖ «នេសាទសព្វថ្ងៃនេះ គឺប៉ះពាល់ ដោយសារតែទូកអូសគូវៀតណាមចូលមកទឹកដីកម្ពុជា។ គេប្រើឧបករណ៍ទំនើប ឧបករណ៍ឆក់ ហើយអូសគូមួយយប់ៗ យកអស់!»។
វិទ្យុអាស៊ីសេរីមិនទាន់អាចទាក់ទងប្រធានមន្ទីរជលផលខេត្តកំពតបាននៅឡើយទេ ដើម្បីសុំសេចក្ដីប្រតិកម្មទៅនឹងការអះអាងរបស់គ្រួសារអ្នកនេសាទខាងលើនេះ។
ប្រធានរដ្ឋបាលជលផលនៃក្រសួងកសិកម្ម រុក្ខាប្រមាញ់ និងនេសាទនៃប្រទេសកម្ពុជា គឺលោក ណៅ ធួក បានមានប្រសាសន៍បំភ្លឺថា ការអះអាងរបស់ក្រុមអ្នកនេសាទខាងលើនេះ មិនមែនសុទ្ធតែជាការពិតនោះទេ។
លោក ណៅ ធួក បានបញ្ជាក់ថា ៖ «ខ្ញុំទទួល ប៉ុន្តែវាក៏មិនដល់ប៉ុណ្ណឹងពេកដែរណា៎! យើងដាក់គ្នាយើងឲ្យនៅមើលដែរ ប៉ុន្តែដែនទឹកហ្នឹងនៅជាប់គ្នា។ ប៉ុន្តែគាត់ចេះតែថា មានទូកវៀតណាមចូលអីអ៊ីចឹង! យើងមិនអនុញ្ញាតទេ បើចូលក៏មានតិចតួចណាស់!»។
ប្រទេសកម្ពុជាកំពុងតែបិទរដូវនេសាទខុសច្បាប់ ចាប់តាំងពីដើមខែមិថុនា រហូតដល់ខែតុលាខាងមុខនេះ ដោយហាមឃាត់មិនឲ្យមានការនេសាទខុសច្បាប់ទ្រង់ទ្រាយធំ ដូចការប្រើប្រាស់អួនក្រឡាញឹក ឧបករណ៍ឆក់ត្រី និងគ្រឿងផ្ទុះជាដើម ដើម្បីធ្វើផលត្រីមានចំនួនច្រើននៅឆ្នាំ២០១០នេះ៕