ពលរដ្ឋជាច្រើនរយគ្រួសារក្នុងភូមិត្រពាំងកន្តោល ឃុំជីខលើ ស្រុកស្រែអំបិល ខេត្តកោះកុង បានអះអាងថា រោងចក្រផលិតស្ករអំពៅរបស់លោកឧកញ៉ា លី យ៉ុងផាត់ បានបង្ហូរទឹកដែលមានសារធាតុគីមីកាលពីពេលថ្មីៗនេះ ធ្វើឲ្យងាប់ត្រីរាប់ពាន់ក្បាលអណ្ដែតត្រៀបត្រានៅក្នុងអូរនិងត្រពាំង បណ្តាលឲ្យប៉ះពាល់ដល់ជីវភាពរស់នៅប្រចាំថៃ្ងរបស់ប្រជាពលរដ្ឋនៅទីនោះ។
អាជ្ញាធរមូលដ្ឋានដែលបានដឹងរឿងនោះបានសន្យាថា នឹងដោះស្រាយនាពេលឆាប់ៗនេះ។
ប្រជាពលរដ្ឋឈ្មោះ គង់ សុង នៅក្នុងភូមិត្រពាំងកន្តោល ឃុំជីខលើ ស្រុកស្រែអំបិល ខេត្តកោះកុង បានថែ្លងប្រាប់វិទ្យុអាស៊ីសេរីថា ៖ «គេបង្ហូរទឹកមកធ្លាក់ចូលក្នុងត្រពាំង។ ឥឡូវត្រីធម្មជាតិដែលប្រជាជនធ្លាប់បានទទួលផលពីត្រីហ្នឹង ឃើញថា សព្វថ្ងៃនេះកំពុងតែងាប់»។
សុខ សេរី ៖ បង្ហូរពីពេលណា? គង់ សុង ៖ ពួកខ្ញុំដឹងកាលពីយប់មិញរហូតដល់ថ្មើរហ្នឹង។ សុខ សេរី ៖ តើត្រីងាប់ហ្នឹងនៅទន្លេ នៅបឹងឬនៅស្ទឹង? គង់ សុង ៖ នៅតាមអូរហើយត្រពាំង។
សុខ សេរី ៖ ក្រុមហ៊ុនណា? គង់ សុង ៖ (ក្រុមហ៊ុន) របស់ឧកញ៉ា លី យុងផាត់។ ចាប់ពីថ្ងៃនេះតទៅឃើញថា ត្រីងាប់ ទទួលផលលំបាកកាន់តែខ្លាំងទៅៗ វាបាត់បង់ម្ហូប។
តំណាងប្រជាពលរដ្ឋម្នាក់ទៀតឈ្មោះ ជូ សុខ បានថែ្លងថា ៖ «សំណូមពរដល់រដ្ឋាភិបាលជួយកែតម្រង់កុំឲ្យមានបញ្ហាស្លាប់ដល់ត្រីប្រជាពលរដ្ឋ។ វាងាប់អស់ទាំងត្រីផ្ទក់ ត្រីអណ្ដែង»។
នៅមិនទាន់មានសេចក្តីប្រតិកម្មណាមួយនៅទ្បើយទេពីតំណាងរោងចក្រផលិតស្ករអំពៅ របស់លោកឧកញ៉ា លី យ៉ុងផាត់ នោះ។
លោក ឆាយ វុធ ជាមេឃុំជីខលើ ខេត្តកោះកុង ដែលបានដឹងរឿងខាងលើនេះ បានមានប្រសាសន៍ថា លោកនឹងចាត់ការដោះស្រាយរឿងនេះនាពេលឆាប់ៗនេះហើយ។
លោក ឆាយ វុធ បានបញ្ជាក់ថា ៖ «ឥឡូវហ្នឹងខ្ញុំបានទទួលព័ត៌មានពីមេភូមិ ហើយខ្ញុំឲ្យមេភូមិចុះទៅពិនិត្យបណ្ដោះអាសន្នសិន។ ស្អែកខ្ញុំនឹងទាក់ទងជាមួយខាងបរិស្ថានចុះទៅមើលជាមួយអភិបាលស្រុក»។
លោកស្រី ជាប សុធាវី មន្រ្តីសម្របសម្រួលនៃអង្គការការពារសិទ្ធិមនុស្ស អាដហុក នៅក្នុងខេត្តព្រះសីហនុ ដែលបានទទួលព័ត៌មាននេះ បានមានប្រសាសន៍ថា ៖ «ឲ្យខាងអាជ្ញាធរនិងខាងជំនាញដែលពាក់ព័ន្ធហ្នឹង មេត្តាជួយត្រួតពិនិត្យទៅលើជាតិគីមីដែលហូរចេញពីកន្លែងរបស់ក្រុមហ៊ុន»។
ប្រភពបានឲ្យដឹងថា រោងចក្រផលិតស្ករអំពៅនោះបានចាប់ផ្តើមដំណើរការតាំងពីឆ្នាំ២០០៨មក នៅក្នុងភូមិកន្តោល ឃុំជីខលើ ស្រុកស្រែអំបិល ខេត្តកោះកុង។
ការបង្ហូរចេញនូវទឹកមានសារធាតុពុលខាងលើនេះបានសម្លាប់ត្រីជាច្រើនពាន់ក្បាល នៅក្នុងអូរនិងត្រពាំង ដែលជាប្រភពទឹកប្រើប្រាស់របស់ប្រជាពលរដ្ឋជាច្រើនរយគ្រួសារនៅទីនោះ។ ក្រៅពីនេះប្រជាពលរដ្ឋមិនហ៊ានឲ្យគោក្របីរបស់ពួកគាត់ផឹកទឹកនៅទីនោះទៀតទ្បើយ នាពេលនេះ៕