នៅក្នុងគេហទំព័ររបស់វិទ្យុអាស៊ីសេរី អ្នកចូលអានអត្ថបទណាអាចបញ្ចេញយោបល់របស់ខ្លួនទៅលើរឿងនោះបាន។
អត្ថបទដែលមានចំណងជើងថា «ភរិយាលោកនាយករដ្ឋមន្ត្រីចោទវិទ្យុអាស៊ីសេរីថាលំអៀង» ដែលចុះផ្សាយតាំងពីថ្ងៃទី៧ ខែវិច្ឆិកា ឆ្នាំ២០១១ មកនោះ ទទួលបានការបញ្ចេញមតិយោបល់ច្រើនបង្គួរ។
គិតមកទល់នឹងរាត្រីថ្ងៃព្រហស្បតិ៍ ទី១០ ខែវិច្ឆិកា នេះ មានអ្នកបញ្ចេញមតិទៅលើអត្ថបទនេះ ចំនួនជាង ៥០នាក់ហើយ។ ក្រៅតែពីបញ្ចេញមតិទៅលើសាច់រឿងរបស់វិទ្យុអាស៊ីសេរី អ្នកអានជួនកាលក៏បញ្ចេញមតិប្រឆាំង ឬក៏គាំទ្រគ្នាឯងដែរ។
អ្នកចូលរួមបញ្ចេញមតិទាំងនេះ ភាគច្រើនមិនដាក់ឈ្មោះទេ។ បើដាក់ឈ្មោះវិញ ក៏ពួកគាត់ប្រើរហស្សនាមប្លែកៗដែរ។ ពួកគាត់ចូលអាន និងបញ្ចេញយោបល់ពីគ្រប់ជ្រុងជ្រោយទាំងអស់លើពិភពលោក គឺអោយតែគាត់មានម៉ាស៊ីនកុំព្យូទ័រដែលមានភ្ជាប់ប្រព័ន្ធអ៊ិនធឺណិត គាត់អាចចូលរួមបញ្ចេញមតិបាន។
អត្ថបទរបស់វិទ្យុអាស៊ីសេរីនោះ មានដកស្រង់ប្រសាសន៍របស់អ្នកស្រីប្រធានកាកបាទក្រហមកម្ពុជា ដែលរិះគន់វិទ្យុអាស៊ីសេរីថា បានផ្សាយព័ត៌មានកាន់ជើងបក្សនយោបាយដែលមិនកាន់អំណាច ឬបក្សប្រឆាំងនោះ។
អ្នកអានម្នាក់ដែលមិនបញ្ចេញឈ្មោះ បានសរសេរថា៖ "កាកបាទក្រហមមានតួនាទីបំរើប្រជារាស្ត្រគ្រប់ស្រទាប់វណ្ណៈនៅពេលប្រជារាស្ត្រមានអាសន្ន... គឺជួយសម្រួលបន្ទុកខ្លះពេលដែលប្រជារាស្ត្រខ្វះខាត...។ កាកបាទក្រហមគ្មានតួនាទីឃោសនានយោបាយនោះទេ"។
អ្នកអានម្នាក់ទៀតបន្ទរពីខេត្តកំពត មកថា៖ "មើលរូបថតចុះ!គ្មានពួកកាកបាទក្រហមណាមួយស្គមសោះ... រីឯប្រជាជនតាមជនបទឡើងស្គមម្នាក់ៗ"។
លោកអ្នកអានម្នាក់ទៀតដែលដាក់ឈ្មោះខ្លួនឯងថា គ្លីនតុន សរសេរថា លោកគាំទ្រ ១០០% ចំពោះប្រសាសន៍របស់អ្នកស្រីប្រធានកាកបាទក្រហម អ្នកស្រី ប៊ុន រ៉ានី ហ៊ុន សែន ដែលថា វិទ្យុអាស៊ីសេរីផ្សាយកាន់ជើងបក្សប្រឆាំង និងក្រុមខូច។
មតិមួយទៀតដែលសរសេរជាភាសាអង់គ្លេស បានបញ្ចេញយោបល់ថា៖ "ថ្នាក់ដឹកនាំកាកបាទក្រហមគួរយល់អំពីតួនាទីរបស់ខ្លួន ហើយគួរកុំសរសើរបក្សនយោបាយមួយ ហើយបង្អាប់បក្សនយោបាយផ្សេង"។
លោកម្នាក់មិនបញ្ចេញឈ្មោះ ដាក់ជាសំណួរថា៖ "ខ្ញុំឆ្ងល់ណាស់ ហេតុអីបានដើរហួសពីនាទីខ្លួន? ដាក់សំណួរហើយ លោកក៏បកស្រាយថា៖ "ដែលថា ហួសនាទីខ្លួននោះ គឺកាកបាទក្រហមមិនមានតួនាទីជាអ្នកនយោបាយទេ គឺមាននាទីទទួលអំណោយ និងចែកអំណោយតែប៉ុណ្ណោះ ហេតុអ្វីបានជាកាកបាទក្រហមខ្មែរដើរជាអ្នកនយោបាយទៀត"។
លោកបញ្ជាក់ថា៖ "នេះគឺមិនល្អទាល់តែសោះ សម្រាប់កម្ពុជា គឺមិនមានតួនាទីច្រើនសម្រាប់មនុស្សម្នាក់នោះទេ ឬមួយខឹងពេកដែលគេថា ត្រូវនោះ ដូច្នេះក៏ភ្លេចខ្លួន ឫក៏មិនដឹង"។
អ្នកបញ្ចេញមតិម្នាក់ទៀតដែលដាក់ឈ្មោះថា សេរីភាព ពីភ្នំពេញ សរសេរថា៖ "លោកស្រីមិនបានយល់ភាពខុសគ្នារវាងរដ្ឋាភិបាល និងគណបក្សប្រជាជន គឺចង់និយាយថា រដ្ឋាភិបាលទទួលជំនួយពីប្រទេសចិន មកជួយជនរងគ្រោះទឹកជំនន់ មិនមែនបក្សប្រជាជនទេ"។
មតិមួយទៀតដែលដាក់ឈ្មោះថា កាលីហ្វ័រនៀ និងឡងប៊ិច បានសរសេរថា មាសសុទ្ធមិនគួរខ្លាចភ្លើងទេ។ លោកបញ្ជាក់ថា ក្នុងនាមជាប្រទេសប្រកាន់របបលទ្ធិប្រជាអធិបតេយ្យ អ្នកដឹកនាំល្អមិនត្រូវខ្លាចការរិះគន់ទេ ហើយត្រូវបើកឲ្យមានសេរីភាពក្នុងការនិយាយស្ដី និងការបញ្ចេញមតិ។
លោកម្នាក់ដាក់ឈ្មោះថា ក្តា ពីភ្នំពេញ បានសរសេរថា កាកបាទក្រហមមិនត្រូវមានលំអៀងទេ។ រីឯទូរទស្សន៍ជាតិកម្ពុជា (ទទក) មិនត្រូវលំអៀង និងមិនត្រូវបម្រើបក្សណាទេ ចុះហេតុអ្វីក៏ផ្សាយតែពីរឿងបក្សប្រជាជន? រីឯរឿងប្លន់យកដីប្រជាជន និងរឿងបំផ្លាញព្រៃឈើ ហេតុអ្វីបានជា ទទក មិនផ្សាយឲ្យប្រជាជនលោកបានជ្រាបទូទាំងប្រទេសផង?
ទាក់ទងការបញ្ចេញមតិទៅនឹងឯករាជភាពសារព័ត៌មាននេះដែរ សារមួយទៀតសរសេរជាភាសាអង់គ្លេស ដាក់ឈ្មោះថា ហ្ជច (George) បានសរសើរថា វិទ្យុអាស៊ីសេរី កម្មវិធីផ្សាយភាសាខ្មែរ គឺផ្សាយតែព័ត៌មានពិត និងព្រឹត្តិការណ៍ពិតមិនលំអៀងទៅបក្សនយោបាយណាទេ។ ក៏ប៉ុន្តែនៅឃ្លាបញ្ចប់របស់សារបញ្ចេញមតិនេះ បានអះអាងថា នាយកវិទ្យុអាស៊ីសេរី ផ្សាយជាភាសាខ្មែរជាអ្នកគាំទ្រគណបក្សប្រជាជន ហើយមានទំនាក់ទំនងយ៉ាងជិតស្និទ្ធជាមួយរដ្ឋាភិបាលភ្នំពេញទៀតផង។
សារមួយទៀតសរសេរថា មានតែវិទ្យុអាស៊ីសេរីទេដែលផ្សាយគ្របដណ្ដប់ប្រធានបទច្រើន ដូចជា ផ្សាយអំពីព័ត៌មានសេដ្ឋកិច្ច សង្គមកិច្ច នយោបាយ សុខភាព ជាពិសេសផ្សាយព្រឹត្តិការណ៍ប្រចាំថ្ងៃ ដែលបានផ្ដល់ចំណេះដឹងដល់ប្រជាពលរដ្ឋមិត្តអ្នកស្ដាប់បានច្រើន និងជាព័ត៌មានអាចទុកចិត្ត និងជឿជាក់បាន៕