ការឃាត់ខ្លួនជនបរទេសទាំង ៥នាក់នោះ ដោយសារនគរបាលមូលដ្ឋានបានឃើញពួកគេចូលរួមបាតុកម្មជាមួយកម្មករខ្មែរជាង ២.០០០នាក់ នៅថ្ងៃដដែល នៅរោងចក្រ អ៊ី ហ្គាមេន (E-Garment) នៅខេត្តកណ្ដាលនោះ ដែលជាករណីចម្លែកមួយមិនធ្លាប់មានកន្លងមក។ ជនបរទេសទាំងនោះនឹងអាចប្រឈមនឹងការបណ្ដេញចេញពីប្រទេសកម្ពុជា ដោយសារបញ្ហានេះ។
សមត្ថកិច្ចនគរបាលកម្ពុជា នៅស្រុកស្អាង ខេត្តកណ្ដាល កំពុងរៀបចំឯកសារនានាដើម្បីសុំគោលការណ៍ពីរដ្ឋមន្ត្រីក្រសួងមហាផ្ទៃ លោក ស ខេង និងជាឧបនាយករដ្ឋមន្ត្រី ដើម្បីបណ្ដេញជនជាតិបរទេសទាំង ៥នាក់នោះពីប្រទេសកម្ពុជា។
មន្ត្រីជាន់ខ្ពស់ក្រសួងមហាផ្ទៃ បានបញ្ជាក់ថា សកម្មភាពរបស់ជនបរទេសទាំង ៥នាក់ចូលរួមបាតុកម្មនោះ គឺផ្ទុយពីច្បាប់អន្តោប្រវេសន្តនៃប្រទេសកម្ពុជា។
អ្នកនាំពាក្យក្រសួងមហាផ្ទៃ លោកឧត្ដមសេនីយ៍ឯក ខៀវ សុភ័គ បានមានប្រសាសន៍ប្រាប់វិទ្យុអាស៊ីសេរី នៅថ្ងៃទី៦ ខែមីនា ថា សកម្មភាពរបស់ជនបរទេសទាំង ៥រូបនោះ មិនអាចទទួលយកបានទេ ដោយសារតែគាត់មកជ្រៀតជ្រែកកិច្ចការងារផ្ទៃក្នុងកម្ពុជា។
លោក ខៀវ សុភ័គ៖ «សមត្ថកិច្ចរបស់យើងបានមានភស្តុតាង និងរូបថតគ្រប់គ្រាន់នូវជនបរទេសទាំង ៥រូប គាត់បានចូលរួមយ៉ាងសកម្មនៅក្នុងពិធី នៅក្នុងការធ្វើកូដកម្មរបស់កម្មករយើង មានកាន់មេក្រូស្រែកនៅទីនោះ ដើម្បីបំផុសចលនាកូដកម្មហ្នឹង ហើយយើងចាត់ទុកថា នេះជាអំពើមួយមិនគប្បីចំពោះព្រះរាជាណាចក្រកម្ពុជាយើង ដែលមានជនបរទេសចូលមកបំផុសបំផុល ឬក៏លើកទឹកចិត្តវាមិនត្រឹមត្រូវទេ។ កន្លែងហ្នឹងហើយសមត្ថកិច្ចរបស់យើងបានធ្វើការឃាត់ខ្លួនគាត់ ដើម្បីសាកសួរព័ត៌មានក្រោយពេលដែលគាត់ចប់ចូលរួមកាន់មេក្រូជាមួយកម្មការិនីរបស់យើងហ្នឹង។ យើងក៏បានសួរនាំគាត់ គាត់គ្មានលិខិតឆ្លងដែននៅក្នុងដៃ អ៊ីចឹងហើយបានថា សកម្មភាពរបស់ជនបរទេសទាំង ៥រូបនោះ មិនត្រឹមតែមកជួយទេ គឺថាមកបំផុសចលនាអាចបង្កអសន្តិសុខ និងសណ្ដាប់ធ្នាប់សាធារណៈនៅកម្ពុជាយើង»។
ជនបរទេសទាំង ៥រូបនោះ គឺមានស្ត្រី ៤នាក់ និងបុរសម្នាក់មកពីប្រទេសន័រវ៉េ (Norway), ប្រទេសអង់គ្លេស (England) ប្រទេសហុឡង់ដ៍ (Netherlands) ប្រទេសបែលហ្ស៊ិក (Belgium) ប្រទេសអូទ្រីស (Austria)។ ពួកគេចូលមកប្រទេសកម្ពុជា តាំងពីថ្ងៃទី២៨ ខែកុម្ភៈ កន្លងមកនេះ។
ជាមួយគ្នានេះ ប្រធានសហភាពការងារកម្ពុជា លោក អាត់ ធន់ បានមានប្រសាសន៍ថា ជនបរទេសទាំង ៥រូបនោះ បានចូលមកកម្ពុជា ដើម្បីចូលរួមក្នុងកិច្ចប្រជុំអន្តរជាតិមួយ ប៉ុន្តែគាត់បានឆ្លៀតពេលទៅទស្សនាកូដកម្មតវ៉ារបស់កម្មការិនីជាង ២ពាន់នាក់ នៅរោងចក្រ អ៊ី ហ្គាមេន នោះ។
លោកបានអះអាងថា ពួកគាត់មិនបានធ្វើអ្វីខុសច្បាប់ទេ៖ «គាត់ទៅមើលកម្មករធម្មតាហ្នឹង អត់មានពាក់ព័ន្ធអ្វីខុសច្បាប់ទេ ដោយសារតែគាត់ធ្វើការងារជាអង្គការមួយឈ្មោះថា International Solidarity Movement (ចលនាសាមគ្គីភាពអន្តរជាតិ) ដែលគេបានធ្វើការនៅប្រទេសជាច្រើននៅលើពិភពលោកហ្នឹង។ គាត់មកនេះ គឺក្នុងនាមទស្សនកិច្ចផង មកដើរលេងផង ហើយស្របពេលដែលយើងមានកូដកម្មហ្នឹង គាត់ទៅមើលកម្មករធម្មតាហ្នឹង។ ខ្ញុំគិតថា មិនមានហេតុផលអ្វីណាសម្រាប់បណ្ដេញពួកគាត់ទៅទេ។ អ្នកខ្លះត្រូវទៅថ្ងៃហ្នឹងក៏មានដែរ។ គាត់មិននៅអ្វីយូរទៀត ពីព្រោះកម្មវិធីគាត់ត្រូវចប់ហើយ»។
ទោះយ៉ាងណា ជនជាតិបរទេសទាំងនោះនៅមានសេរីភាពធម្មតាក្នុងប្រទេសកម្ពុជា នៅឡើយ ក្រោយពីនគរបាលបានដោះលែង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។