គណបក្សប្រជាជនកម្ពុជា ជាគណបក្សមួយដែលកាន់អំណាចតាំងពីឆ្នាំ១៩៧៩ មកទល់បច្ចុប្បន្ន។ បើគិតចាប់ពីមានការបោះឆ្នោតជាសកលឆ្នាំ១៩៩៣ មក មានការបោះឆ្នោតចំនួន ៤លើករួចមកហើយ។ ក្នុងការបោះឆ្នោតទាំង ៤លើកនោះ គណបក្សប្រជាជនកម្ពុជា ចាញ់តែម្តងគត់ គឺនៅឆ្នាំ១៩៩៣។
ការបោះឆ្នោតក្រោយៗមកទៀត គណបក្សប្រជាជនកម្ពុជា បានទទួលជ័យជំនះជាបន្តបន្ទាប់ រហូតដល់ការបោះឆ្នោតឆ្នាំ២០០៨ គណបក្សប្រជាជនកម្ពុជា ឈ្នះទទួលបានអាសនៈចំនួន ២ភាគ៣ នៅក្នុងរដ្ឋសភា ដែលមានសមាជិក ១២៣រូប។ បើពិនិត្យមើលព្រឹត្តិការណ៍កន្លងទៅ រួមនិងយន្តការ និងបរិយាកាសនៃការបោះឆ្នោតនាបច្ចុប្បន្ននេះ ការបោះឆ្នោតលើកទី៥ នៅថ្ងៃទី២៨ កក្កដា ឆ្នាំ២០១៣ ខាងមុខនេះ គណបក្សប្រជាជនកម្ពុជា អាចនឹងមានលទ្ធភាពទទួលជ័យជំនះទៀត។
តើកត្តាអ្វីខ្លះដែលអាចធ្វើឲ្យគណបក្សប្រជាជនកម្ពុជា អាចឈ្នះទៀតបាន?
ការឈ្នះនៅក្នុងពេលបោះឆ្នោតនីមួយៗ វាមានកត្តាកំណត់ជាច្រើន ដែលជំរុញឲ្យគណបក្សនយោបាយដែលចូលរួមប្រកួតនោះ បានទទួលជ័យជំនះ។ ដើម្បីបានទទួលជ័យជំនះក្នុងការបោះឆ្នោត គណបក្សនយោបាយដែលចូលរួម ត្រូវមានការគាំទ្រពីអ្នកចូលរួមបោះឆ្នោត។ អ្នកតាមដានវិភាគបញ្ហាសង្គម និងនយោបាយមួយចំនួន បានលើកឡើងថា វិធីធ្វើឲ្យប្រជាពលរដ្ឋគាំទ្រ មានច្រើនយ៉ាងណាស់ ប៉ុន្តែមានវិធីខ្លះប្រព្រឹត្តទៅដោយយុត្តិធម៌ ត្រឹមត្រូវ និងវិធីខ្លះ មិនត្រឹមត្រូវឡើយ ដោយមានការទិញទឹកចិត្ត និងបំភ័យខ្លះៗផង។
តើគណបក្សនយោបាយធ្វើដូចម្តេច ដើម្បីបានទទួលការគាំទ្រពីអ្នកបោះឆ្នោត?
ចម្លើយលើរឿងនេះមានច្រើន ប៉ុន្តែនៅពេលនេះសុំលើកយកតែកត្តាសំខាន់ៗមួយចំនួនប៉ុណ្ណោះ មកនិយាយ។ នៅក្នុងការបោះឆ្នោត បើគណបក្សនយោបាយណាមួយមានធនធានទ្រព្យសម្បត្តិច្រើន ហើយអាចចំណាយលើការឃោសនា និងផ្តល់ជូនជារង្វាន់ទាក់ទាញបានច្រើននោះ គឺគណបក្សនយោបាយនោះបានទទួលការគាំទ្រមួយចំណែកធំហើយ។ កត្តាមួយទៀត គឺបើគណបក្សនយោបាយណាមានលទ្ធភាពជួលប្រព័ន្ធឃោសនាផ្សព្វផ្សាយអំពីសកម្មភាពរបស់ខ្លួន និងគោលនយោបាយសំខាន់របស់ខ្លួនបានជ្រួតជ្រាបដល់ប្រជាពលរដ្ឋបានច្រើននោះ ក៏ជាចំណែកមួយទទួលជ័យជំនះមួយទៀតដែរ។ មានកត្តាមួយទៀត ដែលបានធ្វើឲ្យគណបក្សនយោបាយចូលរួមប្រកួតក្នុងការបោះឆ្នោត បានទទួលការគាំទ្រពីអ្នកបោះឆ្នោតដែរ គឺការកសាងសមិទ្ធផលនានាក្នុងនាមគណបក្សនយោបាយ នៅតាមមូលដ្ឋាន ខេត្ត ខណ្ឌ ស្រុក ភូមិ នានា ដូចជា ផ្លូវថ្នល់ សាលារៀន ស្ពាន វត្តអារាម មន្ទីរពេទ្យ ជីកស្រះទឹក ជីកអណ្តូង និងសង់ផ្ទះឲ្យជនក្រីក្រ ជាដើម។
ចំពោះគណបក្សប្រជាជនកម្ពុជា ការមានធនធានទ្រព្យសម្បត្តិដើម្បីចំណាយក្នុងការទាក់ទាញរកសំឡេងឆ្នោតគាំទ្រ គឺមានហើយ។ ការគ្រប់គ្រង និងមានឥទ្ធិពលជាមួយប្រព័ន្ធឃោសនាជាច្រើន ក៏មានដែរ ដូចជា មានទូរទស្សន៍មួយចំនួនមាននិន្នាការគាំទ្រគណបក្សប្រជាជនកម្ពុជា រួចទៅហើយ ដោយមិនប្រកាសជាចំហ តែស្ថានីយទូរទស្សន៍ដែលគេដឹងថាមានការគាំទ្រជាចំហនោះ មានដូចជា ស្ថានីយទូរទស្សន៍បាយ័ន ដែលមានកូនស្រីលោកនាយករដ្ឋមន្ត្រី ហ៊ុន សែន គ្រប់គ្រង និងទូរទស្សន៍អប្សរា ជាដើម។ ចំពោះកាសែតបោះពុម្ពក៏មានច្រើន វិទ្យុផ្សាយសំឡេងអេហ្វអ៊ឹម (FM Radio) ក៏មានច្រើនដរ។ ចំពោះការកសាងសមិទ្ធផលនានានៅតាមជនបទ ខេត្ត ខណ្ឌ ស្រុក ភូមិ ក៏មានដែរ គឺគេឃើញមានសាលារៀន ដាក់ឈ្មោះលោកនាយករដ្ឋមន្ត្រី ហ៊ុន សែន និងមន្ត្រីជាន់ខ្ពស់គណបក្សប្រជាជនកម្ពុជា មួយចំនួនទៀត។
ក្រៅពីចំណុចទាំងអស់នេះ គណបក្សប្រជាជនកម្ពុជា ដែលបានកាន់អំណាចជាយូរមកហើយ មានការគាំទ្រពីសមាជិកក្នុងកងកម្លាំងប្រដាប់អាវុធ មាន ប៉ូលិស ប៉េអិម ទាហាន ជាច្រើននាក់ថែមទៀត រួមទាំងក្រុមអ្នកកំប្លែងមួយចំនួនផងដែរ។ ត្រង់ចំណុចនេះ គេសង្កេតឃើញថា មានមេទាហាន និងប៉ូលិសធំៗមួយចំនួន ជាសមាជិកជាន់ខ្ពស់គណបក្សប្រជាជនកម្ពុជា។ នេះជាចំណុចមួយដែលបង្ហាញថា អំណាចរបស់គណបក្សប្រជាជនកម្ពុជា មានច្រើន ដើម្បីអនុវត្តន៍ជាក់ស្តែងក្នុងជីវភាពសង្គមប្រចាំថ្ងៃ។
នៅមានចំណុចមួយទៀត គឺគណបក្សប្រជាជនកម្ពុជា មានទំនាក់ទំនងល្អជាមួយគណៈកម្មាធិការជាតិរៀបចំការបោះឆ្នោត (គ.ជ.ប) ដែលជាអ្នករៀបចំការបោះឆ្នោត និងកាត់សេចក្តីចំពោះការតវ៉ានានា ទាក់ទងភាពមិនប្រក្រតីក្នុងការបោះឆ្នោត និងជាអ្នកប្រកាសលទ្ធផលការបោះឆ្នោតទៀតផង។
បើរាប់តាមកត្តានានាដែលអាចធ្វើឲ្យគណបក្សនយោបាយទទួលជ័យជំនះក្នុងការបោះឆ្នោតនេះ គឺគណបក្សប្រជាជនកម្ពុជា មានរួចទៅហើយ។ ដូច្នេះ គណបក្សប្រជាជនកម្ពុជា មានលទ្ធភាពច្រើនណាស់ក្នុងការឈ្នះក្នុងពេលបោះឆ្នោតនាខែកក្កដា ខាងមុខនេះ។
នៅមានកត្តាមួយទៀតដែរ ដែលអំណោយផលឲ្យគណបក្សប្រជាជនកម្ពុជា ដើម្បីទទួលបានជ័យជំនះក្នុងការបោះឆ្នោតឆ្នាំ២០១៣ នេះ គឺមេបក្សប្រឆាំងលោក សម រង្ស៊ី ស្ថិតនៅក្រៅប្រទេស មិនអាចចូលរួមឈរឈ្មោះ និងធ្វើសកម្មភាពស្វែងរកសំឡេងឆ្នោតគាំទ្របាន។ ការស្ថិតនៅក្រៅប្រទេសរបស់លោក សម រង្ស៊ី ដោយសារតុលាការកម្ពុជា បានកាត់ទោសឲ្យរូបលោកជាប់ពន្ធនាគារជាង ១០ឆ្នាំ ហើយចោទប្រកាន់ពីបទដកតម្រុយបង្គោលព្រំដែនកម្ពុជា-វៀតណាម បរិហារកេរ្តិ៍ បង្ហោះផែនទីក្លែងក្លាយ ប៉ុន្តែការចោទប្រកាន់នេះត្រូវបានគណបក្សប្រឆាំងប្រទេសមួយចំនួន ចាត់ទុកថា ជារឿងនយោបាយ និងអំពាវនាវឲ្យរដ្ឋាភិបាលលុបបទចោទ។
ប៉ុន្តែ ការកាន់កាប់គ្រប់គ្រងអំណាចក្នុងរយៈពេលយូររបស់គណបក្សប្រជាជនកម្ពុជា ក៏បានបង្កឲ្យមានការមិនសប្បាយចិត្តច្រើនគួរសមដែរ នៅក្នុងចំណោមប្រជាពលរដ្ឋទូទៅ។
បញ្ហាទាំងនោះមានជាអាទិ៍ ប្រាក់ខែមន្ត្រីរាជការនៅមានកម្រិតទាប អំពើពុករលួយកើតមាននៅច្រើនកន្លែង ការបង្កើតបក្ខពួក ប្រើអំណាចដោយរំលោភកើតមានគួរសមដែរ ដោយមានពាក្យប្ដឹងមួយចំនួនទាក់ទងមន្ត្រី ឬសាច់ញាតិមន្ត្រីគណបក្សប្រជាជនកម្ពុជា បានរំលោភកាន់កាប់ដីអ្នកស្រុក និងមានការកាត់ក្តីរបស់ចៅក្រមតុលាការមិនយុត្តិធម៌ និងបញ្ហាទំនាស់ព្រំដែនជាដើម។
ប៉ុន្តែ រឿងទាំងនេះមិនអាចធ្វើឲ្យគណបក្សប្រជាជនកម្ពុជា ចាញ់ឆ្នោតបានឡើយនៅក្នុងបរិបទសង្គមកម្ពុជា បច្ចុប្បន្ននេះ ពីព្រោះ ការផ្ដួលរំលំរបបប្រល័យពូជសាសន៍ខ្មែរក្រហម និងការប្រកាន់របបសេដ្ឋកិច្ចទីផ្សារសេរី និងរបបនយោបាយពហុបក្ស នៅតែជាចំណុចលេចធ្លោរបស់គណបក្សប្រជាជនកម្ពុជា ដែលគណបក្សនយោបាយផ្សេងទៀតគ្មាន គួបផ្សំជាមួយប្រជាពលរដ្ឋខ្មែរជាអ្នកគោរព និងកាន់ព្រះពុទ្ធសាសនាផងនោះ អ្នកបោះឆ្នោតភាគច្រើនគេនៅតែចងចាំថា គណបក្សប្រជាជនកម្ពុជា ជាអ្នកជួយពួកគេឲ្យបានរួចចាកផុតពីការស្លាប់នៅក្នុងរបបខ្មែរក្រហម ដែលកាន់អំណាចចាប់ពីឆ្នាំ១៩៧៥ ដល់១៩៧៩។
ដូច្នេះ បើតាមមើលទៅ គឺគណបក្សប្រជាជនកម្ពុជា ទំនងជាឈ្នះឆ្នោតនៅក្នុងការបោះឆ្នោតនាខែកក្កដា ខាងមុខនេះ នៅកម្ពុជា។ គ្រាន់តែថា ឈ្នះក្នុងកម្រិតណា គេមិនទាន់អាចទាយទុកបាននៅឡើយទេ ពីព្រោះគណបក្សនយោបាយមិននៅក្នុងរដ្ឋាភិបាល នៅកម្ពុជា បច្ចុប្បន្ន កំពុងតែរួមគ្នាដើម្បីស្វែងរកសំឡេងឆ្នោតគាំទ្រពីប្រជាពលរដ្ឋ តាមយុទ្ធវិធីផ្ទាល់របស់គណបក្សខ្លួនដែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។