សាកសពសកម្មជនគណបក្សសង្គ្រោះជាតិម្នាក់ នៅឃុំយាង ដែលមានចម្ងាយជាង ២០គីឡូម៉ែត្រ ភាគខាងជើងឆៀងខាងលិចពីទីរួមស្រុកពួក ត្រូវគេប្រទះឃើញនៅក្បែរផ្លូវលំ ឆ្ងាយពីភូមិ កាលពីថ្ងៃទី៦ ខែឧសភា កន្លងទៅ។ ទាំងសមត្ថកិច្ចនិងអង្គការសិទ្ធិមនុស្សក្រៅរដ្ឋាភិបាល ដែលបានទៅពិនិត្យសាកសព បានសន្និដ្ឋានថា វាជាអំពើឃាតកម្មទៅលើសកម្មជននៃគណបក្សប្រឆាំងរូបនោះ នៅពេលដែលគាត់កំពុងដើរដាក់អង្គុបកណ្ដុរនៅតាមវាលស្រែ។
អង្គការសិទ្ធិមនុស្សលីកាដូ (LICADHO) មានគម្រោងនឹងជួបជាមួយគ្រួសារសកម្មជនគណបក្សសង្គ្រោះជាតិម្នាក់ ដែលជនមិនស្គាល់មុខសម្លាប់នៅឃុំយាង ស្រុកពួក ជាថ្មីទៀតនៅថ្ងៃទី១២ ខែឧសភា ដើម្បីស្វែងរកពន្លឺនៃអំពើឃាតកម្ម ថាតើបណ្ដាលមកពីមូលហេតុអ្វីពិតប្រាកដ?
អ្នកស៊ើបអង្កេតរបស់អង្គការសិទ្ធិមនុស្សលីកាដូ ខេត្តសៀមរាប គឺអ្នកស្រី ឈុយ វ៉ាន់ថា។ អ្នកស្រីមានប្រសាសន៍កាលពីរសៀលថ្ងៃច័ន្ទ ទី១១ ខែឧសភា ថា អ្នកស្រីនិងក្រុមការងារនឹងចុះទៅឃុំយាង ស្រុកពួកម្ដងទៀត នៅថ្ងៃទី១២ ខែឧសភា ដើម្បីជួបជាមួយគ្រួសារលោក សេង ណាក់ ជាសកម្មជននៃគណបក្សសង្គ្រោះជាតិ ដែលត្រូវបានគេសម្លាប់។ អ្នកស្រី ឈុយ វ៉ាន់ថា បញ្ជាក់ថា បុរសឈ្មោះ សេង ណាក់ អាយុ ៤៣ឆ្នាំ ត្រូវបានអ្នកភូមិប្រទះឃើញដេកស្លាប់នៅក្បែរផ្លូវឆ្ងាយពីភូមិកាលពីថ្ងៃទី៦ ខែឧសភា កន្លងទៅ។ តាមការពិនិត្យសាកសពអាចសន្និដ្ឋានថា សកម្មជនគណបក្សនយោបាយរូបនោះត្រូវគេធ្វើឃាត៖ «វាជាអំពើឃាតកម្មហើយតាមស្លាកស្នាមប្រវែងប្រហែល ៧សង់ទីម៉ែត្រត្រូវជ្រៅទៅក្នុងក្បាលនោះទៀត ហើយស្នាមនោះ មានមុខចូលដូចច្រាញៗ ប្រៀបដូចជាគ្រាប់កាំភ្លើងច្នៃបាញ់ប៉ះ»។
លោក សេង ណាក់ គឺជាអតីតសកម្មជននៃគណបក្សហ៊្វុនស៊ិនប៉ិច នៅឃុំយាង។ ប៉ុន្តែកាលពីការបោះឆ្នោតក្រុមប្រឹក្សាឃុំ-សង្កាត់ ឆ្នាំ២០១២ កន្លងទៅ លោកបានចាកចេញពីគណបក្សហ្វ៊ុនស៊ិនប៉ិចទៅឈរឈ្មោះជាបេក្ខជនក្រុមប្រឹក្សាឃុំលំដាប់លេខរៀងទី២ ឱ្យគណបក្ស សម រង្ស៊ី។ កាលណោះលោក សេង ណាក់ មិនបានជាប់ជាក្រុមប្រឹក្សាឃុំទេ ហើយលោកក៏បានក្លាយខ្លួនទៅជាសកម្មជននៃគណបក្សសង្គ្រោះជាតិរហូតមក។
មន្ត្រីប៉ូលិសក៏សន្និដ្ឋានដូចអង្គការសិទ្ធិមនុស្សដែរថា តាមការពិនិត្យលើសាកសពរបស់លោក សេង ណាក់ គឺបានបន្សល់ទុកស្លាកស្នាមខ្លះឱ្យដឹងថា ជាអំពើឃាតកម្ម។
អធិការនគរបាលស្រុកពួក លោក ទេព ពុំសែន មានប្រសាសន៍ថា បើទោះបីជាសាកសពមានបន្សល់ទុកស្នាមអំពើឃាតកម្មក៏ដោយ ក៏លោកមិនទាន់សន្និដ្ឋានថា ការសម្លាប់នោះ គឺជារឿងស្អប់ខាងនយោបាយទេ ពីព្រោះតែសមត្ថកិច្ចមិនទាន់រកឃើញឯកសារ ឬក៏ភស្តុតាងណាមួយដើម្បីបញ្ជាក់ថា ជននោះគឺជាសកម្មជនគណបក្សនយោបាយឡើយ។
ចំណែកឯការសម្លាប់ពាក់ព័ន្ធនឹងរឿងអ្វីច្បាស់លាស់នោះ លោកអធិការមិនទាន់ហ៊ានបញ្ជាក់ទេ ពីព្រោះករណីនេះ កំពុងស្ថិតក្នុងការស៊ើបអង្កេត៖ «ខ្ញុំជម្រាបជូនថា ម៉ោងនេះយើងកំពុងស្រាវជ្រាវរកឃាតក បើកាលណាតែយើងសន្និដ្ឋានសាច់រឿងមានន័យថា យើងដឹងរឿង»។
ទោះយ៉ាងណាអនុប្រធានក្រុមការងារគណបក្សសង្គ្រោះជាតិ ខេត្តសៀមរាប លោក សុខ គឹមសេង បានជំរុញឱ្យសមត្ថកិច្ចត្រូវតែធ្វើការស៊ើបអង្កេតឱ្យហ្មត់ចត់ ដើម្បីចាប់ឃាតកយកមកផ្ដន្ទាទោសឱ្យបាន បើទោះបីជាករណីឃាតកម្មនេះ ពាក់ព័ន្ធនឹងរឿងនយោបាយ ឬក៏មិនពាក់ព័ន្ធក៏ដោយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។