អ្នកតំណាងរាស្ត្រគណបក្សសង្គ្រោះជាតិ និងក្រុមយុវជនស្ម័គ្រចិត្ត ៥នាក់ ត្រូវកងសន្តិសុខរបស់អាជ្ញាធរខណ្ឌដូនពេញ និងរាជធានីភ្នំពេញ បណ្ដេញចេញពីទីលានប្រជាធិបតេយ្យ ក្នុងពេលពួកគេទៅផ្សព្វផ្សាយពីថវិកាដែលបានមកពីមូលនិធិ ជា វិជ្ជា អតីតប្រធានសហជីពសេរីកម្មករ។
អ្នកស្រី មូរ សុខហួរ អ្នកតំណាងរាស្ត្រគណបក្សសង្គ្រោះជាតិ ថ្លែងនៅថ្ងៃទី១ មេសា ថា អ្នកស្រីបានដឹកនាំយុវជនចំនួន ៥នាក់ ជាយុវជនស្ម័គ្រចិត្តទៅទីលានប្រជាធិបតេយ្យក្នុងបំណងផ្សព្វផ្សាយពីថវិកាដែលបានមកពីមូលនិធិ ជា វិជ្ជា ដែលសប្បុរសជនមកពីក្រៅប្រទេសផ្ញើមកសម្រាប់ជួយដល់អ្នករបួស និងអ្នកស្លាប់ដោយការបង្ក្រាបរបស់កងកម្លាំងរដ្ឋាភិបាលក្នុងពេលតវ៉ាដំឡើងប្រាក់ខែកម្មករនៅក្បែររោងចក្រយ៉ាកជីន និងផ្លូវវ៉េងស្រេង កាលថ្ងៃទី២ និងថ្ងៃទី៣ មករា ឆ្នាំ២០១៤ ប៉ុន្តែការផ្សព្វផ្សាយនេះត្រូវបានកងសន្តិសុខរបស់អាជ្ញាធរដែនដីបណ្ដេញចេញ និងដកទូរស័ព្ទក្រុមយុវជនរបស់គាត់ទៀតផង។
អ្នកស្រីបន្តថា កងសន្តិសុខនោះបានបណ្ដេញពួកគាត់ដោយថាការជួបជុំនេះគឺខុសច្បាប់៖ «ខ្ញុំចុះទៅពីឡានប្រហែលជា ៥នាទី មានឡានសន្តិសុខ ២ហ្នឹងមកដល់ភ្លាម ពេលមិនយូរទេប្រហែលជា ៥នាទីក្រោយមកមាន ២ឡានមកទៀត ពាក់ឯកសណ្ឋានខុសគ្នាបន្តិចហើយ។ ខ្ញុំក៏ដើរទៅពាក់កណ្ដាលទីលានដើម្បីនិយាយអំពីហ្នឹង ហើយមកប្រាប់ខ្ញុំថា ខ្ញុំធ្វើហ្នឹងខុសច្បាប់ហើយ។ ខ្ញុំថា ធ្វើខុសច្បាប់ ខុសច្បាប់អំពីអី? ផ្ទុយទៅវិញ គឺសម្លុតនិងរុញច្រានយុវជនដែលទៅជាមួយខ្ញុំ ហើយប្រជាពលរដ្ឋដែលឈរមើលចាំថតទាំងប៉ុន្មានហ្នឹង សម្លុតគំរាមកំហែងរហូតទៅដល់យកទូរស័ព្ទរបស់ក្រុមការងារយុវជន ហើយប្រជាពលរដ្ឋដែលខំឈរថតទាំងប៉ុន្មាន គឺគេមិនឲ្យថតគំរាមកំហែងសម្លុតខ្លាំងណាស់»។
អ្នកស្រី មូរ សុខហួរ បានបន្តថា ថវិកាដែលបានមកពីមូលនិធិ ជា វិជ្ជា ដែលសប្បុរសជនផ្ញើមកពីក្រៅប្រទេសជាង ១ម៉ឺនដុល្លារនោះ គឺមួយចំនួនអ្នកស្រីបានបញ្ជូនទៅដល់អ្នករងរបួស និងសាច់ញាតិអ្នកស្លាប់ហើយ។ អ្នកស្រីបញ្ជាក់ថា ក្រៅអំពីការផ្សព្វផ្សាយមូលនិធិនេះ អ្នកស្រីក៏បានអំពាវនាវឲ្យមានការដោះលែងមនុស្ស ២១នាក់ ដែលកំពុងជាប់ពន្ធនាគារដែលកងកម្លាំងរដ្ឋាភិបាលចាប់ខ្លួនក្នុងពេលបង្ក្រាបតវ៉ាដំឡើងប្រាក់ខែដែរ ទើបមានការហាមឃាត់និងបណ្ដេញពួកគាត់ចេញនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។