មន្ត្រីជាន់ខ្ពស់គណបក្សប្រឆាំង និងជាប្រធានគណៈកម្មការទី៧ គឺគណៈកម្មការអប់រំយុវជន និងកីឡា ធម្មការ និងសាសនា វប្បធម៌ និងទេសចរណ៍នៃរដ្ឋសភា លោក យ៉ែម បុញ្ញឫទ្ធិ បញ្ជាក់ថា ដើម្បីលើកស្ទួយវិស័យវប្បធម៌ឲ្យរុងរឿងទៅបាន លុះណារដ្ឋាភិបាលត្រូវបង្កើនថវិកាសម្រាប់ក្រសួងវប្បធម៌។ ការលើកឡើងនេះ ធ្វើឡើងភ្លាមៗ បន្ទាប់ពីលោក ហ៊ុន សែន ជំរុញអ្នកមានលុយកាក់សហការគ្នាអភិវឌ្ឍន៍ និងអភិរក្សវប្បធម៌ជាតិ ដើម្បីទាក់ទាញភ្ញៀវទេសចរអន្តរជាតិ និងទុកជាមរតកសម្រាប់ក្មេងជំនាន់ក្រោយ។
លោកនាយករដ្ឋមន្ត្រី ហ៊ុន សែន ថ្លែងក្នុងពិធីទិវាវប្បធម៌ជាតិលើកទី១៨ នាព្រឹកថ្ងៃទី៣ ខែមីនា អំពាវនាវឲ្យអ្នកមានទ្រព្យធនទាំងអស់ចូលរួមលើកស្ទួយវប្បធម៌ជាតិឲ្យថ្កុំថ្កើង។ ទន្ទឹមនឹងនេះ លោកជំរុញឲ្យម្ចាស់ផលិតកម្មនានា ត្រូវយកចិត្តទុកដាក់ដល់សិល្បករគ្រប់រូប ដើម្បីឲ្យពួកគេអាចមានលទ្ធភាពរស់នៅក្នុងសង្គមបានសមរម្យ។
ប្រធានបទទិវាវប្បធម៌ជាតិឆ្នាំ២០១៦ នេះ មិនខុសពីឆ្នាំ២០១៥ ទេ គឺយុវជនដើម្បីវប្បធម៌ជាតិក្នុងគោលបំណងជំរុញឲ្យយុវជនដែលជាទំពាំងស្នងឫស្សីចូលរួមក្នុងការអភិវឌ្ឍន៍ និងអភិរក្សវប្បធម៌ជាតិ។ លោក ហ៊ុន សែន ស្នើឲ្យរក្សាប្រធានបទនេះនៅដដែលសម្រាប់ទិវាវប្បធម៌ជាតិបន្តទៀត ដើម្បីឲ្យយុវជនចូលរួមយ៉ាងសកម្មក្នុងការលើកស្ទួយវប្បធម៌ ដែលជាដូងព្រលឹងជាតិ ហើយពឹងលើកម្លាំងយុវជនជាអ្នកបន្តវេន ត្រូវបញ្ជ្រាបវប្បធម៌ជាតិដល់កុមារ និងយុវជន៖ «ការគោរពទិវានេះនឹងជំរុញលើកទឹកចិត្តដល់ក្រសួង ស្ថាប័ន វិស័យឯកជន សង្គមស៊ីវិល បងប្អូនជនរួមជាតិ រួមគ្នាផ្សព្វផ្សាយពីវប្បធម៌ សម្បត្តិវប្បធម៌ជាតិដ៏ល្អផូរផង់ និងបេតិកភណ្ឌជាតិដ៏សំបូរបែប»។
ក្រសួងវប្បធម៌ និងវិចិត្រសិល្បៈ បានបង្កើតឡើងជាផ្លូវការនៅខែតុលា ឆ្នាំ១៩៩៧។ ក្រសួងវប្បធម៌ និងវិចិត្រសិល្បៈ មានអគ្គនាយកដ្ឋានពីរ និងសាកលវិទ្យាល័យភូមិន្ទសិល្បៈ មួយដែលមានមហាវិទ្យាល័យក្រោមចំណុះចំនួន ៥ និងមជ្ឈមណ្ឌលវិទ្យាសាស្ត្រស្រាវជ្រាវវប្បធម៌មួយ។
ប្រធានគណៈកម្មការទី៧ គឺគណៈកម្មការអប់រំយុវជន និងកីឡា ធម្មការ និងសាសនា វប្បធម៌ និងទេសចរណ៍ លោក យ៉ែម បុញ្ញឫទ្ធិ មានប្រសាសន៍ថា ការលើកស្ទួយវិស័យវប្បធម៌ អភិរក្ស និងអភិវឌ្ឍន៍ទៅបានលុះណារដ្ឋាភិបាលខ្លួនឯងត្រូវយកចិត្ត និងបង្កើនថវិកាសម្រាប់ក្រសួងវប្បធម៌។ លោកអះអាងថា ក្រសួងព័ត៌មានដើរតួនាទីសំខាន់ក្នុងការផ្សព្វផ្សាយវប្បធម៌ជាតិ ដើម្បីបញ្ជ្រាបដល់យុវជនគ្រប់ស្រទាប់។
លោក ហ៊ុន សែន បន្ថែមថា ការលើកស្ទួយ និងការផ្សព្វផ្សាយមានសារសំខាន់ក្នុងការទាក់ទាញភ្ញៀវទេសចរអន្តរជាតិឲ្យចូលមកទស្សនានៅកម្ពុជា។ លោកបង្ហាញរបាយការណ៍ថា កាលពីឆ្នាំ២០១៥ ភ្ញៀវទេសចរមកទស្សនាកម្ពុជា ចំនួន ៤,៧លាននាក់ ដែលធ្វើឲ្យកម្ពុជា មានចំណូលពីវិស័យនេះប្រមាណ ១៧% នៃផលិតផលសរុប។
អនុប្រធានគណៈកម្មការសេដ្ឋកិច្ច ហិរញ្ញវត្ថុ ធនាគារ និងសវនកម្មនៃរដ្ឋសភា លោក សុន ឆ័យ ពន្យល់ថា ការលើកស្ទួយវប្បធម៌ជាតិក្រៅពីទាញយកចំណូលពីភ្ញៀវទេសចរនោះ គឺអ្នកដឹកនាំមានតួនាទីសំខាន់ក្នុងការធ្វើជាគំរូគេពីក្រមសីលធម៌ វប្បធម៌ គោរពគ្នា ដូចជាការប្រើពាក្យសម្ដីមិនប្រមាថគ្នាទៅវិញទៅមកជាដើម។ ការធ្វើរបៀបនេះ ទើបជាគំរូសម្រាប់យុវជនជំនាន់ក្រោយ។
លោក សុន ឆ័យ លើកឡើងថា ដើម្បីរក្សាប្រពៃណីវប្បធម៌ជាតិឲ្យល្អប្រសើរឡើង គឺក្រសួងធម្មការ និងកិច្ចការសាសនា និងក្រសួងវប្បធម៌ មានតួនាទីសំខាន់ក្នុងការជំរុញឲ្យវប្បធម៌ជាតិរីកចំរើន និងអភិរក្សឲ្យវប្បធម៌ជាតិនៅគង់វង្សបាន ប៉ុន្តែបែរជាក្រសួងទាំងពីរនេះ រដ្ឋាភិបាលមិនសូវយកចិត្តទុកដាក់ទៅវិញ៖ «ក្រសួងវប្បធម៌ វិចិត្រសិល្បៈ ទៅជាបំបែកការងារនៃការគ្រប់គ្រងទៅឲ្យអាជ្ញាធរអប្សរាវិញ។ ទឹកប្រាក់ច្រើនលានណាស់ ថវិកាក្នុងមួយឆ្នាំៗ ជាង ២០លានដុល្លារសហរដ្ឋអាមេរិក។ ថវិកានេះបើយកមកអភិវឌ្ឍន៍ក្រសួងនេះវិញ គឺល្អណាស់»។
ក្រសួងវប្បធម៌ និងវិចិត្រសិល្បៈ មានមុខងារ និងភារកិច្ចដូចជា ប្រតិបត្តិនយោបាយការពារថែរក្សា និងលើកតម្លៃបេតិកភណ្ឌវប្បធម៌ជាតិ និងសម្បត្តិវប្បធម៌ទូទៅរបស់កម្ពុជា។ គ្រប់គ្រងបណ្ដារមណីយដ្ឋាន បុរាណវិទ្យា នរវិទ្យា និងប្រវត្តិវិទ្យា ផ្តុំឡើងវិញ និងលើកតម្កើងបណ្ដាតម្លៃវប្បធម៌ និងជំនឿទំនៀមទម្លាប់ប្រពៃណីរបស់សង្គមជាតិ បំផុសការបង្កើតស្នាដៃផ្សព្វផ្សាយ និងអភិវឌ្ឍន៍សកម្មភាពវប្បធម៌។ ក្រៅពីនេះ គឺគ្រប់គ្រងសាកលវិទ្យាល័យភូមិន្ទវិចិត្រសិល្បៈ ក្នុងការបណ្ដុះបណ្ដាលសិល្បករ តន្ត្រី ស្ថាបត្យករ បុរាណវិទូ និងអ្នកជំនាញផ្សេងៗទៀត ដែលសហការជាមួយក្រសួងអប់រំយុវជន និងកីឡា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។