Opens in new windowក្រសួងព័ត៌មាន នៅថ្ងៃទី២៥ ខែកញ្ញា បានសម្រេចបិទការចាក់ផ្សាយភាពយន្តបរទេសនៅតាមកញ្ចក់ទូរទស្សន៍ទាំងអស់ក្នុងប្រទេសកម្ពុជា ចាប់ពីចន្លោះម៉ោង ៧ ដល់ម៉ោង ៩យប់ ដើម្បីចូលរួមលើកស្ទួយវប្បធម៌ និងអត្តសញ្ញាណភាពយន្តខ្មែរ។
រដ្ឋមន្ត្រីក្រសួងព័ត៌មាន បានឲ្យដឹងតាមរយៈសេចក្តីជូនដំណឹងថា វិធានការនេះនឹងត្រូវអនុវត្តចាប់ពីថ្ងៃទី១ ខែវិច្ឆិកា ឆ្នាំ២០១៥ តទៅ។ លោកថា ចាប់ពីម៉ោង ៧ ដល់ម៉ោង ៩យប់ ម្ចាស់ស្ថានីយទូរទស្សន៍ទាំងអស់ ត្រូវតែចាក់ផ្សាយវណ្ណកម្មខ្មែរ ដូចជាខ្សែភាពយន្ត និងវីដេអូខ្មែរ តន្ត្រីសម័យបុរាណ កម្មវិធីកម្សាន្តផ្សេងៗ និងកម្មវិធីកីឡា ជាដើម។ លោកថា វិធានការនេះ ក្នុងគោលបំណងចូលរួមលើកតម្កើងមោទនភាពជាតិ និងវប្បធម៌ខ្មែរ។
សេចក្តីជូនដំណឹងនោះ ក្រសួងព័ត៌មាន ក៏បានអំពាវនាវឲ្យម្ចាស់ឧបត្ថម្ភទូរទស្សន៍ គួរជួយលើកស្ទួយផលិតកម្មក្នុងស្រុក ហើយម្ចាស់ស្ថានីយទូរទស្សន៍ទាំងអស់ ត្រូវគោរពតាមសេចក្តីជូនដំណឹងនេះឲ្យមានប្រសិទ្ធភាព។ ជាងនេះទៀត លោករដ្ឋមន្ត្រីក៏ព្រមានថា បើស្ថានីយទូរទស្សន៍ណាល្មើសទៅនឹងការសម្រេចរបស់ក្រសួងព័ត៌មាន ក្រសួងនឹងធ្វើការដកអាជ្ញាប័ណ្ណស្ថានីយទូរទស្សន៍ទាំងនោះ។
កាលពីពេលថ្មីៗនេះ ក្រសួងព័ត៌មាន ក៏ធ្លាប់សម្រេចមិនអនុញ្ញាតឲ្យផ្សព្វផ្សាយផលិតផលគ្រឿងស្រវឹងចាប់ពីម៉ោង ៦ ដល់ម៉ោង ៨យប់នៅលើកញ្ចក់ទូរទស្សន៍ទាំងអស់ផងដែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។