អង្គការសង្គមស៊ីវិលផ្នែកបរិស្ថាន បញ្ជាក់ថា ពួកគេបានពឹងពាក់ក្រុមមេធាវីសិង្ហបុរី ឲ្យជួយសិក្សា និងស៊ើបអង្កេតជុំវិញភាពមិនប្រក្រតីទាក់ទងនឹងការនាំចូលខ្សាច់ពីកម្ពុជា របស់រដ្ឋាភិបាលសិង្ហបុរី។ ពួកគេបញ្ជាក់ថា បើសិនជាមានភស្តុតាងគ្រប់គ្រាន់ ពួកគេនឹងប្ដឹងផ្តល់ករណីនេះទៅតុលាការសិង្ហបុរី ព្រោះខ្សាច់ដែលប្រទេសដែនកោះមួយនេះទិញពីកម្ពុជា បានមកដោយការបំផ្លាញប្រព័ន្ធជីវចម្រុះ និងប៉ះពាល់ជីវភាពពលរដ្ឋ។
ស្ថាបនិកអង្គការមាតាធម្មជាតិ លោក អាឡិចហាន់ដ្រូ ហ្គន់ហ្សាឡេស ដេវិតសឹន (Alexandro Gonzales Davidson) ថ្លែងនៅថ្ងៃទី៥ មករា ថា ក្រុមមេធាវីសិង្ហបុរី ឈ្មោះ យូជីន (Eugene Thuraisingam LLP) កំពុងសិក្សា និងប្រមូលព័ត៌មានទាក់ទងនឹងការទិញខ្សាច់ពីកម្ពុជា ដើម្បីដាក់ពាក្យប្ដឹងរដ្ឋាភិបាលសិង្ហបុរី ឬក្រុមហ៊ុនឯកជនដែលនាំចូលខ្សាច់ពីកម្ពុជា។
លោកបញ្ជាក់ថា អង្គការរបស់លោកមិនបានប្រើប្រាស់ថវិកាជួលក្រុមមេធាវីសិង្ហបុរី ដែលជំនាញខាងរឿងព្រហ្មទណ្ឌនេះឡើយ ប៉ុន្តែពួកគេស្ម័គ្រចិត្តជួយកិច្ចការនេះ ដោយសារវាជាករណីអំពើពុករលួយដ៏ធំ និងបានប៉ះពាល់ដល់ជីវភាពពលរដ្ឋនៅមូលដ្ឋានក្នុងប្រទេសកម្ពុជា៖ «នៅក្នុងពេលឆាប់ៗនេះ យើងនឹងដាក់ពាក្យបណ្ដឹងតែម្តង ហើយពាក្យបណ្ដឹងរបស់យើង យើងឃើញថា យុទ្ធសាស្ត្រមានពីរ។ យុទ្ធសាស្ត្រទី១ ដាក់ពាក្យបណ្ដឹងទាក់ទងនឹងខ្សាច់ដែលគេបូមនៅខេត្តកោះកុង មានផលប៉ះពាល់យ៉ាងធ្ងន់ធ្ងរដល់ជីវភាពរស់នៅរបស់ប្រជាពលរដ្ឋមូលដ្ឋាន។ យុទ្ធសាស្ត្រទី២ គឺយើងឃើញថា ខ្សាច់នេះត្រូវបាននាំចេញពីប្រទេសកម្ពុជា ដោយខុសច្បាប់ ដោយមិនបង់ពន្ធ ដោយមានភាពពុករលួយច្រើនមែនទែនដែលពាក់ព័ន្ធ»។
សកម្មជនបរិស្ថានរូបនេះបន្ថែមថា ក្រុមរបស់លោកនឹងដាក់ពាក្យបណ្ដឹងដាច់ដោយឡែកមួយទៀតទៅតុលាការឥណ្ឌា ទាក់ទងនឹងការនាំចូលខ្សាច់ពីកម្ពុជា។
អាស៊ីសេរី មិនអាចទាក់ទងស្ថានទូតសិង្ហបុរី ប្រចាំកម្ពុជា បានទេ នៅថ្ងៃទី៥ មករា ដើម្បីសុំការឆ្លើយតបជុំវិញរឿងនេះ។
ការនាំចេញខ្សាច់ទៅក្រៅប្រទេស បានក្លាយជាបញ្ហាចម្រូងចម្រាសក្រោយពេលទិន្នន័យពាណិជ្ជកម្មអង្គការសហប្រជាជាតិ និងទិន្នន័យគយបរទេស បង្ហាញតួលេខខុសគ្នាយ៉ាងច្រើនពីតួលេខរដ្ឋាភិបាលកម្ពុជា។
ទិន្នន័យពាណិជ្ជកម្មរបស់អង្គការសហប្រជាជាតិ បានបង្ហាញថា សិង្ហបុរី បាននាំចូលខ្សាច់ពីកម្ពុជា ជាង ៧៣លានតោនក្នុងរយៈពេល ៨ឆ្នាំពីឆ្នាំ២០០៧ ដល់ឆ្នាំ២០១៥ តែតួលេខរបស់ក្រសួងរ៉ែ និងថាមពលកម្ពុជា វិញ ថាមានតែជាង ១៦លានតោនប៉ុណ្ណោះ។ តួលេខនេះ បើគិតជាទឹកប្រាក់ខុសគ្នាជាង ៧០០លានដុល្លារអាមេរិក។
ភាពខុសគ្នាមួយទៀត គឺទិន្នន័យពីភ្នាក់ងារគយឥណ្ឌា ដែលបង្ហាញថា ឥណ្ឌា ទិញខ្សាច់ពីកម្ពុជា ជាង ១០ម៉ឺនតោន (១០៨.៦៥៨តោន) គិតជាទឹកប្រាក់ជិត ៣លានដុល្លារអាមេរិក (២,៦លាន) ក្នុងរយៈពេល ៣ឆ្នាំពីឆ្នាំ២០១៣ ដល់ឆ្នាំ២០១៥។ ប៉ុន្តែទិន្នន័យរបស់ក្រសួងពាណិជ្ជកម្មកម្ពុជា វិញ បង្ហាញថា កម្ពុជា មិនដែលនាំខ្សាច់ចេញទៅឥណ្ឌា នោះឡើយ គឺមានតែទៅកាន់ប្រទេសចំនួន ៥ ប៉ុណ្ណោះ គឺសិង្ហបុរី ថៃ វៀតណាម កូរ៉េខាងត្បូង និងកោះតៃវ៉ាន់ សរុបចំនួន ៤៥ម៉ឺនតោន ដែលគិតជាទឹកប្រាក់មានចំនួន ២លាន ៥សែនដុល្លារអាមេរិក។
អ្នកនាំពាក្យក្រសួងរ៉ែ និងថាមពល លោក ម៉េង សក្តិធារ៉ា បានបដិសេធកាលពីថ្ងៃទី១ មករា ថាមិនដែលមានករណីនាំខ្សាច់ចេញទៅលក់នៅប្រទេសឥណ្ឌា នោះឡើយ។
ចំណែកអ្នកនាំពាក្យក្រសួងពាណិជ្ជកម្ម កញ្ញា សឹង សុផារី នៅថ្ងៃទី៤ មករា សម្ដែងការងឿងឆ្ងល់ចំពោះភាពខុសគ្នានេះ ហើយថាក្រសួងក៏ចង់រកឃើញការពិតជុំវិញរឿងនេះដែរ។ កញ្ញាចង់ឲ្យអង្គការសង្គមស៊ីវិល ចងក្រងជារបាយការណ៍ជាក់លាក់មួយអំពីការនាំចេញខ្សាច់នេះ កុំចេះតែចោទដាក់រដ្ឋាភិបាល៖ «ពីរបីថ្ងៃឃើញប្រទេសមួយ ពីរបីថ្ងៃក្រោយមកឃើញប្រទេសណាមួយទៀត។ នេះវាមិនមែនជាដំណោះស្រាយល្អទេ។ វាគ្រាន់តែជាការបង្កើតរឿងឲ្យរញ៉េរញ៉ៃ។ ខ្ញុំសំណូមពរឲ្យអង្គការសង្គមស៊ីវិល បើសិនជាមានលទ្ធភាពធ្វើជាការសិក្សាស្រាវជ្រាវល្អិតល្អន់មួយជួយរដ្ឋាភិបាលវិញ។ ឧបមាថា រកឃើញ ៣០ប្រទេស ចង្អុលមកថាតើប្រទេសមួយណា ដើម្បីរដ្ឋាភិបាលស្នើសុំទៅគយប្រទេសគេ ឲ្យដឹងថា ក្រុមហ៊ុនមួយណាឲ្យប្រាកដ។ អាហ្នឹងចង្អុលមុខចំៗតែម្តង អត់មានអ្នកណាគេចរួចទេពេលហ្នឹង»។
ស្ថាបនិកអង្គការមាតាធម្មជាតិ ឆ្លើយតបថា ការស៊ើបអង្កេតនេះ គឺជាកាតព្វកិច្ចរបស់រដ្ឋាភិបាល ពីព្រោះវាជាភាពមិនប្រក្រតីរបស់ស្ថាប័នរដ្ឋ មិនមែនជាការងាររបស់អង្គការសង្គមស៊ីវិលនោះទេ៖ «ខ្ញុំលើកទឹកចិត្តដល់ក្រសួងណាដែលពាក់ព័ន្ធធ្វើខ្លួនឯងចុះ ហើយបើសិនជាក្រសួងណាមិនមានសមត្ថភាព ប្រហែលជាអាចរុញទៅអង្គភាពផ្សេងៗ អាចថាអង្គភាពប្រឆាំងអំពើពុករលួយ ឬក្រុមស្រាវជ្រាវអន្តរជាតិមួយចំនួន។ ខ្ញុំមិនជឿទាល់តែសោះថា រដ្ឋាភិបាល ឬក៏ក្រសួងណាពាក់ព័ន្ធដូចជាក្រសួងពាណិជ្ជកម្ម ឬក្រសួងរ៉ែ និងថាមពល មានឆន្ទៈពិតប្រាកដដើម្បីរកដំណោះស្រាយទេ។ ពួកគេគ្រាន់តែដើរតួរឿងល្ខោនតិចតួចទៅ ដើម្បីបោកប្រាស់ប្រជាពលរដ្ឋកម្ពុជា ផង ហើយដើម្បីធ្វើម៉េចអាចនឹងបន្តសកម្មភាពនាំខ្សាច់ចេញទៅក្រៅប្រទេសដូចរយៈពេល ៩ឆ្នាំកន្លងមកនេះ»។
ទាក់ទងរឿងនេះដែរ ប្រធានគណបក្សសង្គ្រោះជាតិ លោក សម រង្ស៊ី កាលពីថ្ងៃទី២ មករា ថ្លែងថា តំណាងរាស្ត្រគណបក្សប្រឆាំង នឹងបន្តកោះហៅមន្ត្រីរដ្ឋាភិបាលឲ្យមកឆ្លើយបំភ្លឺនៅរដ្ឋសភាជាថ្មីទៀត។ លោក សម រង្ស៊ី ចាត់ទុកថា ភាពខុសគ្នាទាំងនេះ គឺជាភស្តុតាងដែលបង្ហាញពីអំពើពុករលួយដ៏ធំរបស់រដ្ឋាភិបាល ដែលធ្វើឲ្យកម្ពុជា ខាតបង់ចំណូលរាប់រយលានដុល្លារពីវិស័យមួយនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។