ក្រុមយុវជនជួបជុំគ្នាដង្ហែក្បួនតាមផ្លូវជុំវិញរដ្ឋសភា បន្ទាប់មកធ្វើសេចក្តីថ្លែងការណ៍រួមមួយដាក់ញត្តិជូនរដ្ឋសភា ដើម្បីបង្ហាញពីក្តីកង្វល់របស់យុវជនចំពោះបញ្ហាបរិស្ថាន។ ស្របពេលប្រទេសនៅលើពិភពលោកបាននាំគ្នាប្រារព្ធទិវាបរិស្ថានពិភពលោកលើកទី៤១។
សមាជិកបណ្ដាញយុវជនកម្ពុជា ដែលស្ថិតក្នុងសម្លៀកបំពាក់អាវពណ៌ស មានរូបដើមឈើពណ៌បៃតង ដៃកាន់បដាសរសេរថា ខ្ញុំស្រឡាញ់បរិស្ថាន បញ្ឈប់ការកាប់បំផ្លាញព្រៃឈើ។ អ្នកខ្លះ កាន់រូបគំនូរសត្វស្វាធ្វើមុខជូរ អង្គុយលើកកំណាត់ឈើកាប់រួចសល់តែគល់។
ក្រុមយុវជនច្រៀងបទចំរៀងរំលឹកពីអតីតសកម្មជនការពារព្រៃឈើដ៏ល្បី លោក ឈុត វុទ្ធី ដែលបានស្លាប់ដោយសារមូលហេតុការពារព្រៃឈើ និងស្រែកព្រមៗគ្នា ទាមទារឲ្យរដ្ឋសភាទទួលខុសត្រូវក្នុងនាមជាតំណាងឲ្យជាតិខ្មែរទាំងមូល ដែលមានតួនាទីឃ្លាំមើលការដឹកនាំប្រទេសរបស់រាជរដ្ឋាភិបាល។
ប្រធានបណ្ដាញយុវជនកម្ពុជា លោក ទឹក ម៉ាឡៃ មានប្រសាសន៍ថា កាលពីឆ្នាំមុន ក្រុមយុវជនធ្លាប់បានស្នើទៅរដ្ឋសភាម្តងរួចទៅហើយ ឲ្យពិនិត្យមើលការងាររបស់រាជរដ្ឋាភិបាល ដែលបានផ្តល់ដីសម្បទានសេដ្ឋកិច្ចស្ទើរទូទាំងប្រទេស នាំឲ្យមានជម្លោះដីធ្លី ការបំផ្លាញព្រៃឈើ ការបំពុលបរិយាកាសជាដើម។ លោកបន្តថា រដ្ឋាភិបាលបានផ្អាកផ្តល់ដីសម្បទានសេដ្ឋកិច្ចបន្តទៀត ប៉ុន្តែទំហំនៃការបំផ្លាញព្រៃឈើកាន់តែរីកធំ និងបង្កក្តីព្រួយបារម្ភ។ លោកបន្តថា សមាជិកបណ្ដាញយុវជនកម្ពុជា មិនចង់ឲ្យប្រវត្តិសាស្ត្រជេរស្តីថា ពួកគេជាពលរដ្ឋខ្មែរដែលមានសិទ្ធិគ្រប់គ្រាន់ក្នុងការការពារធនធានធម្មជាតិ តែបែរជាបណ្តោយឲ្យជនខិលខូចមួយចំនួន បំផ្លាញសម្បត្តិជាតិដូចសព្វថ្ងៃនេះឡើយ។
ទោះជាយ៉ាងណាក្តី មិនមានតំណាងរដ្ឋសភាណាម្នាក់ចេញមកទទួលញត្តិដែលក្រុមយុវជនដាក់ជូនរដ្ឋសភាឡើយ។ ប៉ុន្តែ គណៈកម្មការជំនាញរដ្ឋសភាបានអនុញ្ញាតឲ្យតំណាងយុវជនចូលជួបពិភាក្សា និងសន្យាថា យកញត្តិនោះទៅជូនតំណាងរាស្ត្រពាក់ព័ន្ធពិនិត្យ។ ការដង្ហែញត្តិទៅដាក់ជូនរដ្ឋសភានៅពេលនេះ គឺស្របពេលគ្នាដែលគណៈកម្មការអចិន្ត្រៃយ៍របស់រដ្ឋសភា កំពុងមមាញឹកប្រជុំពិនិត្យសេចក្តីស្នើច្បាប់ប្រឆាំងអ្នកដែលមិនទទួលស្គាល់ឧក្រិដ្ឋកម្មក្នុងរបបខ្មែរក្រហម ដែលជាច្បាប់ដែលស្នើឡើងដោយលោកនាយករដ្ឋមន្ត្រី ហ៊ុន សែន។ នៅក្នុងគេហទំព័ររបស់ក្រសួងបរិស្ថាន វិញ មិនបានបង្ហាញព័ត៌មានទាក់ទងនឹងទិវាបរិស្ថានពិភពលោក ថ្ងៃទី៥ ខែមិថុនា នាឆ្នាំនេះ ឬព័ត៌មានទាក់ទងពីការបំផ្លាញបរិស្ថានឡើយ តែបានបង្ហាញរូបភាព និងអត្ថបទតាំងពីឆ្នាំ២០១១ មួយចំនួន ដែលនិយាយពីការប្រជុំនានា និងកម្រងឯកសារច្បាប់បរិស្ថាន។
១-ក្រុមយុវជនដែលស្រឡាញ់បរិស្ថានដង្ហែក្បួននៅមុខរដ្ឋសភា។
២-ក្រុមយុវជនលើកផ្ទាំងបដា និងរូបគំនូរបង្ហាញពីការប៉ះពាល់ដល់បរិស្ថាន។
៣-ក្រុមយុវជនបង្ហាញពីគំនូរវិនាសកម្មព្រៃឈើនៅកម្ពុជា។
៤-យុវជនគូររូបស្លឹកឈើពណ៌ខៀវនៅលើផ្ទៃមុខជាសញ្ញាសម្គាល់ដល់ការស្រលាញ់ និងការពារបរិស្ថាន។
៥-ក្រុមយុវជនពាក់រូបមុខសត្វព្រៃ បង្ហាញថា សត្វទាំងនោះកំពុងវិនាស។
៦-ក្រុមយុវជនលើកបដាសុំឲ្យរដ្ឋាភិបាលអន្តរាគមន៍បញ្ឈប់ការកាប់បំផ្លាញព្រៃឈើ។
៧-ក្រុមយុវជនបង្ហាញពីការបាត់បង់សត្វព្រៃ និងព្រៃឈើ។
៨-អ្នករៀបចំកម្មវិធីកំពុងថ្លែងទៅកាន់អ្នកចូលរួមពីសារប្រយោជន៍នៃការការពារបរិស្ថាន និងព្រៃឈើ។
៩-យុវជនម្នាក់ក្នុងចំណោមមនុស្សជិត ៣០០នាក់ ពាក់មុខរូបដំរី ស្រែកទាមទារឲ្យថែរក្សាព្រៃឈើ។
១០-ក្រុមយុវជនបង្ហាញពីការបាត់បង់សត្វព្រៃ និងព្រៃឈើ។
១១-ក្រុមយុវជនបង្ហាញពីគំនូរវិនាសកម្មព្រៃឈើនៅកម្ពុជា។
១២-ក្រុមអ្នកធ្វើទិវាបរិស្ថានពិភពលោកកំពុងតែដាក់ញត្តិនៅរដ្ឋសភា។
១៣-ក្រុមអ្នកធ្វើទិវាបរិស្ថានពិភពលោកកំពុងតែដាក់ញត្តិនៅរដ្ឋសភា។
ចំណែកឯសេចក្តីថ្លែងការណ៍រួមចុះហត្ថលេខាដោយសង្គមស៊ីវិល ចំនួន៥ ដូចជា សមាគមន៍បណ្ដាញយុវជនកម្ពុជា សម្ព័ន្ធសហគមន៍កសិករកម្ពុជា សមាគមមន្ត្រីរាជការឯករាជ្យកម្ពុជា សមាគមប្រជាធិបតេយ្យឯករាជ្យ និងសេដ្ឋកិច្ចក្រៅប្រព័ន្ធ និងសហព័ន្ធសហជីពកម្មករចំណីអាហារ និងសេវាកម្មកម្ពុជា។ សេចក្តីថ្លែងការណ៍រួមលើកឡើងថា នៅប៉ុន្មានឆ្នាំចុងក្រោយនេះ ការបំផ្លាញព្រៃឈើកាន់តែរីករាលដាល ការផ្តល់ដីសម្បទានសេដ្ឋកិច្ចក្នុងតំបន់មួយចំនួន រួមមានព្រៃឡង់ តំបន់ជម្រកសត្វព្រៃបឹងពែ ជម្រកសត្វព្រៃស្នួល ខេត្តក្រចេះ ដែនជម្រកសត្វព្រៃលំផាត់ ខេត្តរតនគិរី ជាដើម។ ក្នុងនោះ ការសាងសង់ទំនប់វារីអគ្គិសនីស្ទឹងអារ៉ែង និងទន្លេសេសាន កំពុងតែគំរាមកំហែងដល់ធនធានធម្មជាតិ និងជីវភាពរស់នៅរបស់ប្រជាពលរដ្ឋយ៉ាងធ្ងន់ធ្ងរ។
សង្គមស៊ីវិល ស្នើរដ្ឋសភាជំរុញឲ្យរដ្ឋាភិបាលចាត់វិធានការលើបញ្ហាមួយចំនួន ជាអាទិ៍ បញ្ឈប់ការកាប់បំផ្លាញព្រៃឈើ ពិនិត្យដកហូតដីពីក្រុមហ៊ុនដែលទទួលបានដីសម្បទានសេដ្ឋកិច្ច សម្បទានរ៉ែ និងទំនប់វារីអគ្គិសនី ដែលកំពុងបំផ្លាញបរិស្ថាន បញ្ឈប់ការគំរាមកំហែងគ្រប់រូបភាពទៅលើសកម្មជនការពារបរិស្ថាន ត្រួតពិនិត្យលើក្រុមហ៊ុនវៀតណាម ស៊ី.អ.ស៊ី.ខេ (CRCK) ក្រុមហ៊ុន ហួង អាញ់ យ៉ាឡាយ (Hoang Anh Gia Lai = HAGL) ក្រុមហ៊ុន វៀតណាម រ៉ាប់ប៊ឺ គ្រូប (Vietnam Rubber Group = VRG) ដែលសង្គមស៊ីវិលអន្តរជាតិ បានរកឃើញថា កំពុងតែរំលោភសិទ្ធិមនុស្ស និងបង្កវិនាសកម្មដល់ធនធានធម្មជាតិកម្ពុជា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។