មេបញ្ជាការប៉េអិម នៅខេត្តកំពង់ធំ មានប្រសាសន៍នៅថ្ងៃទី២៤ កុម្ភៈ ឲ្យដឹងថា អ្នកនេសាទជនជាតិវៀតណាម ចំនួន ២នាក់ ដែលមានគ្នាប្រណាណ ១០០នាក់បានមករំដោះចេញពីកន្លែងឃាត់ខ្លួននៅការិយាល័យរដ្ឋបាលជលផលខាងជើងបឹងទន្លេសាប កាលពីថ្ងៃទី២២ កុម្ភៈ នោះ បានត្រូវអាជ្ញាធរឃាត់ខ្លួន ដើម្បីកសាងសំណុំរឿងបញ្ជូនទៅតុលាការហើយ។
លោកមេបញ្ជាការប៉េអិម ខេត្តកំពង់ធំ ឈ្មោះ ហង្ស ថុល បានឲ្យដឹងថា ពិតមែនតែក្រុមអ្នកនេសាទជនជាតិវៀតណាម មានការតដៃ និងរំដោះគ្នីគ្នាចេញពីកណ្ដាប់ដៃអាជ្ញាធរក៏ដោយ ក៏អាជ្ញាធរនឹងមានវិធានការបង្ក្រាបបទល្មើសនេសាទខុសច្បាប់នោះឲ្យទាល់តែបាន។
លោក ហង្ស ថុល៖ «បាទ! វាតដៃមែន តែក្រោយមកពេលដែលយើងនាំវាមកដល់សង្កាត់ជលផលនោះ ពួកនោះវានាំគ្នាមករំដោះយក ប៉ុន្តែយើងបានទាក់ទងទៅខាងកំពង់ឆ្នាំង ក្រោយមកខាងកំពង់ឆ្នាំង គេឃាត់ខ្លួនឲ្យ»។
លោកមេបញ្ជាការប៉េអិមបានឲ្យដឹងថា មកទល់ពេលនេះអាជ្ញាធរកំពុងស្រាវជ្រាវដើម្បីចាប់ខ្លួនជនដៃដល់មួយចំនួនទៀត ដែលជាបក្ខពួកបង្កើតឲ្យមានការតដៃជាមួយអាជ្ញាធរមានសមត្ថកិច្ច។
លោកមេឃុំផាត់សណ្ដាយ ឈ្មោះ ហេង មនោ ដែលគ្រប់គ្រងតំបន់កើតហេតុ បានរៀបរាប់ឲ្យដឹងថា ការចាប់ខ្លួនអ្នកនេសាទវៀតណាម ២នាក់ នៅខេត្តកំពង់ធំនេះ កើតឡើងដោយសារកាលពីថ្ងៃទី២២ កុម្ភៈ មានទូកវៀតណាម ដែលរស់នៅលើទឹកទន្លេសាប បានចូលមកនេសាទត្រីក្នុងតំបន់ឡូតិ៍ អភិរក្សលេខ ២ស្ទួន នៅក្នុងឃុំផាត់សណ្ដាយ ស្រុកកំពង់ស្វាយ ខេត្តកំពង់ធំ។
នៅពេលនោះ ក្រុមអាជ្ញាធរចម្រុះដែលមានមន្ត្រីជលផល មន្ត្រីប៉េអិម មន្ត្រីប៉ូលិស និងសហគមន៍នេសាទបានចាប់ទូកវៀតណាម ដែលចូលចាប់ត្រីក្នុងតំបន់ហាមឃាត់នោះ។ តែដោយទូកក្រុមអ្នកនេសាទខុសច្បាប់វៀតណាមនោះមានគ្នាច្រើន កម្លាំងអាជ្ញាធរចាប់បានតែទូកមួយគ្រឿង ២នាក់ប្តីប្រពន្ធយកមកដាក់នៅទីស្នាក់ការការិយាល័យរដ្ឋបាលជលផលខាងជើងបឹងទន្លេសាប។
ក្នុងពេលបង្ក្រាបនោះមានការតដៃពីក្រុមអ្នកនេសាទវៀតណាម ខុសច្បាប់ បានតដៃមន្ត្រីមានសមត្ថកិច្ច ដោយមានគប់ដបទឹកសុទ្ធ ចានបាយជាដើម ធ្វើឲ្យក្រុមកងកម្លាំងមានសមត្ថកិច្ចរងរបួសតិចតួច។
លោកមេឃុំឲ្យដឹងថា នៅពេលបញ្ជូនជនល្មើសនេសាទខុសច្បាប់នោះមកដល់ អធិការដ្ឋានជលផលខាងជើងទន្លេសាប ប្រចាំនៅឃុំផាត់សណ្ដាយនោះ ដោយមានដាក់ខ្នោះផង ស្រាប់តែមានក្រុមអ្នកនេសាទវៀតណាម ប្រមាណពី ៥០ ទៅ ៦០ទូក ផ្ទុកមនុស្សប្រហែល ១០០នាក់ បានមករំដោះយកអ្នកនេសាទ ២នាក់ប្ដីប្រពន្ធ ដែលអាជ្ញាធរបានចាប់ខ្លួននោះយកទៅវិញបាត់។
ក្រុមអ្នកនេសាទវៀតណាម ទាំងនោះ បានចេញទូកពីដែនទឹកក្នុងខេត្តកំពង់ធំ ទៅក្នុងដែនទឹករបស់ខេត្តកំពង់ឆ្នាំងវិញ៖ «អាហ្នឹងគាត់ការពារមិនឲ្យចាប់យកគ្នាគាត់ទៅអ៊ីចឹងណា ដើម្បីយករួចខ្លួន។ អាហ្នឹងទុកលើច្បាប់វិនិច្ឆ័យទៅ។ កន្លែងនោះ ប្រជាជនឃុំខ្ញុំមិនហ៊ានទៅក្បែរទេ ដឹងថាអភិរក្សហើយ មានតែខំជួយការពារ។ អាហ្នឹងបងប្អូនមកពីឃុំឆ្នុកទ្រូទេ»។
លោកមេឃុំបានឲ្យដឹងថា ក្រោយមកមានដំណឹងថា ជនល្មើសនេសាទខុសច្បាប់វៀតណាម ២នាក់ប្តីប្រពន្ធនោះ ត្រូវប៉ូលិសឃុំឆ្នុកទ្រូ ខេត្តកំពង់ឆ្នាំង ចាប់ខ្លួនបានហើយ ដោយសារពួកគេទៅបង្ហាញខ្លួននៅប៉ុស្តិ៍ប៉ូលិស ដោយមានយកខ្នោះដៃទៅជាមួយ។
លោកមេឃុំផាត់សណ្តាយ ហេង មនោ បានឲ្យដឹងបន្ថែមថា ការបង្ក្រាបបទល្មើសនេសាទនៅតំបន់ការពារ និងអភិរក្សត្រីនេះ មានការលំបាកណាស់ ហើយការតដៃរបស់អ្នកនេសាទខុសច្បាប់ក្នុងទ្រង់ទ្រាយធំបែបនេះ ទើបតែកើតមានជាលើកទី១ ប៉ុណ្ណោះ។
លោក ហេង មនោ៖ «កន្លងមកវាមានដែរ តែវាមិនដែលមានទ្រង់ទ្រាយធំបែបនេះ។ វាមានតិចតួច ដេញទៅវារត់ទៅ។ ជួនកាលចាប់យកតែម្ដង ហើយលែងទៅ ព្រោះឃើញក្រទៅអាណិត គេយកតែមងតែអី ហើយគេឲ្យទៅវិញទៅ វាមិនដែលមានបញ្ហាអ៊ីចឹងទេ។ ណែនាំវាមិនស្ដាប់ទេ ខំអប់រំគាត់ តែគាត់មិនស្ដាប់ទេ។ ដេញទៅហើយមកវិញ ដូចដេញចាបអ៊ីចឹង»។
វិទ្យុអាស៊ីសេរី មិនអាចទាក់ទងមន្ត្រីជលផលនៅខេត្តកំពង់ធំ ដើម្បីសុំការរៀបរាប់បន្ថែមអំពីហេតុការណ៍បង្ក្រាបបទល្មើសនៅតំបន់ឃុំផាត់សណ្ដាយ នោះបានឡើយ។
លោក រ៉ុង ឈុន ប្រធានក្រុមប្រឹក្សាឃ្លាំមើលកម្ពុជា បានរិះគន់ថា ការប្រព្រឹត្តបទល្មើសនេសាទដោយក្រុមជនជាតិវៀតណាម នៅទន្លេសាបនោះ ហើយហ៊ានតដៃជាមួយអាជ្ញាធរមានសមត្ថកិច្ចកម្ពុជានោះ វាជារឿងមួយមិនត្រឹមត្រូវឡើយ។
លោក រ៉ុង ឈុន៖ «ខ្ញុំយល់ឃើញថា ជនអន្តោប្រវេសន៍យួនខុសច្បាប់នេះ មករស់នៅលើទឹកដីខ្មែរ ហើយនេសាទខុសច្បាប់ ពេលអាជ្ញាធរឃាត់ខ្លួនបែរជានាំគ្នាធ្វើការទាមទារ អានេះវាជារឿងបង្ហាញការមិនគោរពច្បាប់ បានបង្ហាញការមិនកោតខ្លាចអាជ្ញាធរ និងច្បាប់យើងឡើយ។ មានន័យថា គេមិនក្រែងរអែងអាជ្ញាធរកម្ពុជាទេ ដោយសារគេគិតថា អាជ្ញាធរកម្ពុជា មានអតីតកាលធ្លាប់នៅក្រោមការរៀបចំរបស់រដ្ឋាភិបាលយួន ដូច្នេះគេមិនខ្លាច និងគោរពច្បាប់កម្ពុជាយើងទេ»។
ការហ៊ានតដៃរបស់អ្នកនេសាទជនជាតិវៀតណាម នៅទន្លេសាបនេះ ជាមេរៀនមួយសម្រាប់អាជ្ញាធរមានសមត្ថកិច្ច ដើម្បីរៀបចំការបង្ក្រាបលើកក្រោយឲ្យមានការប្រុងប្រយ័ត្ន និងធានាថា ជនល្មើសត្រូវផ្ដន្ទាទោសតាមច្បាប់ ដើម្បីការពារមច្ឆាជាតិ កុំឲ្យវិនាសបាត់បង់ដោយសារសកម្មភាពនេសាទខុសច្បាប់។
កន្លងមកលោកនាយករដ្ឋមន្ត្រី ហ៊ុន សែន ធ្លាប់បានអំពាវនាវសុំឲ្យបងប្អូនប្រជាពលរដ្ឋខ្មែរនៅទូទាំងប្រទេស រួមគ្នាទប់ស្កាត់បទល្មើសនេសាទ តែអនុញ្ញាតឲ្យមានការនេសាទជាលក្ខណៈគ្រួសារ។
លោកនាយករដ្ឋមន្ត្រីបានហាមឃាត់ដាច់ខាតការប្រើប្រាស់ឧបករណ៍នេសាទខុសច្បាប់ និងត្រូវរួមគ្នាការពារតំបន់អភិរក្សត្រីក្នុងបឹងទន្លេសាប ជួយផ្ដល់ព័ត៌មានអំពីជនខិលខូចដែលនាំគ្នាចូលទៅបំផ្លាញធនធានមច្ឆាជាតិក្នុងតំបន់អភិរក្ស៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។