តំណាងក្រុមហ៊ុន ឆាយណា ដាយណាម៉ិច (CHINA DYNAMIC INVESTMENT) នៅតែអះអាង ពីភាពស្របច្បាប់របស់ខ្លួន ពាក់ព័ន្ធការចោទប្រកាន់ពីគណៈកម្មការបង្ក្រាប បទល្មើសព្រៃឈើពីភាពមិនប្រក្រតី នៃអាជីវកម្មឈើរាប់ម៉ែត្រគូប ដែលដឹកជញ្ជូនលក់នៅប្រទេសវៀតណាម។ ការអះអាងបែបនេះ បន្ទាប់ពីប្រធានគណៈកម្មការជាតិបង្ក្រាបបទល្មើសព្រៃឈើ លោក សៅ សុខា បានបញ្ជាឲ្យមន្ត្រីជំនាញ នៃក្រសួងពាក់ព័ន្ធស្រាវជ្រាវរកប្រភពនៃកំណាត់ឈើទាំងនោះ។
តំណាងក្រុមហ៊ុនឆាយណា ដាយណាម៉ិច លោក ហាក់ កុសល ពុំបានបញ្ជាក់ពីលទ្ធផលនៃការស្វែងរកគល់ឈើរាប់ពាន់កំណត់នៅឡើយទេ តែលោកបានបង្ហាញពីទីតាំងឈូសឆាយច្រើនកន្លែងដែលក្រុមហ៊ុនបានយកឈើចេញ ពីបរិវេណដីសម្បទានសេដ្ឋកិច្ច។ លោកថា ក្រុមហ៊ុនមានឯកសារបទដ្ឋានគ្រប់គ្រាន់ដែលបញ្ជាក់ពីភាពស្របច្បាប់នៃកំណាត់ឈើ ជិត៣ពាន់ម៉ែត្រគូបថា ជាឈើស្របច្បាប់។
កាលពីថ្ងៃទី ១៩ មករា ប្រធានគណៈកម្មការជាតិបង្ក្រាបបទល្មើសព្រៃឈើ និងជាមេបញ្ជាការកងរាជអាវុធហត្ថលើផ្ទៃប្រទេស លោក សៅ សុខា បានបញ្ជាឲ្យមន្ត្រីបច្ចេកទេសនៃក្រសួងកសិកម្ម និងក្រសួងបរិស្ថាន ស្វែងរកគល់ឈើរាប់ពាន់កំណត់នោះ ក្នុងបរិវេណដីក្រុមហ៊ុន បន្ទាប់ពីតំណាងក្រុមហ៊ុនបានអះអាងថា ឈើមូលទាំងនោះគឺជាឈើក្នុងបរិវេណដីសម្បទានសេដ្ឋកិច្ចដែលរដ្ឋាភិបាលផ្ដល់សិទ្ធិវិនិយោគ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។