ប្រជាពលរដ្ឋមួយចំនួនរស់នៅក្នុងក្រុងមនោរម្យ ខេត្តមណ្ឌលគិរី ឲ្យដឹងថា កាលពីល្ងាចថ្ងៃទី១៦ ខែកក្កដា មានឡានយីឌុប ដឹកឈើពេញប្រៀបប្រហែល ២០គ្រឿង បើកបន្តកន្ទុយគ្នានាំយកឈើចេញពីទឹកដីខេត្តមណ្ឌលគិរី ទំនងជាទៅលក់នៅវៀតណាម ត្រង់ព្រំប្រទល់ស្រុកស្នួល ខេត្តក្រចេះ។
ប្រជាពលរដ្ឋដែលសុំមិនបញ្ចេញសំឡេងតែប្រាប់ថា ឈ្មោះ សុធី ឲ្យដឹងថា ឈើដែលដឹកចេញពីខេត្តទាំង ២០ឡាននោះ សុទ្ធតែឈើកាប់ថ្មីៗ ហើយឈ្មួញនឹងដឹកទៅលក់ឲ្យវៀតណាម ម្ដុំព្រំដែនកម្ពុជា-វៀតណាម ស្រុកស្នួល ខេត្តក្រចេះ។ លោកបន្តថា ឈើនេះមិនដឹងថា ខុសច្បាប់ ឬស្របច្បាប់នោះទេ តែកាប់ឈើជាចំណែកមួយបំផ្លាញយ៉ាងធ្ងន់ធ្ងរចំពោះបរិស្ថាន និងជីវភាពរស់នៅរបស់ពលរដ្ឋ។ លោកបញ្ជាក់ថា ពលរដ្ឋខ្លះកាប់ឈើមួយដើម ពីរដើមធ្វើក្រោលគោមិនបានផង តែឈ្មួញធំៗកាប់ឈើម្ដងៗរាប់រយម៉ែត្រគូប។
ឆ្លើយតបនឹងការលើកឡើងនេះ នាយកខណ្ឌរដ្ឋបាលព្រៃឈើមណ្ឌលគិរី លោក កែប តក់ នៅថ្ងៃទី១៧ ខែកក្កដា មានប្រសាសន៍ថា ឈើដែលដឹកតាមឡានយីឌុប ២០ឡាននោះ ជាឈើស្របច្បាប់ដែលកាប់ចេញពីដីព្រៃសម្បទានតំបន់ឡៅកា។ លោកបន្តថា សមត្ថកិច្ចជំនាញមិនអាចអនុញ្ញាតឲ្យនាំចេញឈើខុសច្បាប់បានទេ។
លោកបញ្ជាក់ថា ឈើទាំងនោះសម្រាប់ប្រើប្រាស់នៅក្នុងស្រុកប៉ុណ្ណោះ មិនមែនយកទៅលក់នៅវៀតណាមឡើយ៖ «ខេត្តអីសុទ្ធតែបានដឹងទាំងអស់ ជាឈើដែលគេចេញទៅ... ចេញពីក្រុមហ៊ុនដីសម្បទានសេដ្ឋកិច្ច គេយកទៅប្រើប្រាស់ក្នុងខេត្តព្រៃវែង ផង ស្វាយរៀង ផង និងខេត្តកំពង់ចាម ផង។ ម្សិលមិញហ្នឹងគេដឹកចេញពីក្រុមហ៊ុនឈ្មោះអីទេ នៅតំបន់ឡៅកា ជាដីស្ថិតនៅក្រោមក្រសួងបរិស្ថាន»។
ទាក់ទងនឹងបញ្ហានេះ មន្ត្រីសម្របសម្រួលរបស់សមាគមអាដហុក (ADHOC) ប្រចាំខេត្តមណ្ឌលគិរី លោក សុក រដ្ឋា មានប្រសាសន៍ថា អាជ្ញាធរដែលអនុញ្ញាតឲ្យមានការដឹកឈើក្នុងទ្រង់ទ្រាយធំ គួរណាស់តែជូនដំណឹងឲ្យប្រជាពលរដ្ឋបានដឹងដើម្បីបញ្ចៀសការសង្ស័យ។
លោកបន្តថា ការកាប់ឈើចេញពីដីសម្បទានពិតជាមិនខុសច្បាប់ទេ តែការផ្ដល់ដីសម្បទានទៅវិញទេ ដែលជាករណីត្រូវសិក្សា។ លោកបញ្ជាក់ថា តាមច្បាប់ការផ្ដល់ដីសម្បទានត្រូវធ្វើទៅបានដរាបណាដីនៅតំបន់នោះជាព្រៃរេចរឹល តែដីនៅតំបន់ឡៅកា ជាព្រៃដ៏ក្រាស់ និងសំបូរទៅដោយឈើប្រណិតៗ ហេតុអ្វីត្រូវផ្ដល់សម្បទាន?
ឈើដែលដឹកតាមឡានយីឌុប ទាំង ២០ឡាននោះ ភាគច្រើនគ្របជិតឈឹង ដោយដឹកកាត់មុខស្នងការនគរបាលខេត្ត ស្ថាប័នបរិស្ថានក្រុង និងបន្តដំណើរលើផ្លូវជាតិចេញពីខេត្តមណ្ឌលគិរី ឆ្ពោះទៅស្រុកកែវសីម៉ា ប៉ុន្តែគេមិនបានដឹងឡើយពីចំនួនពិតប្រាកដនៃឈើទាំងនោះ។
អាជ្ញាធរខេត្តមណ្ឌលគិរី មិនដែលទម្លាយឲ្យសាធារណជនដឹងឡើយថា ក្នុងខេត្តនេះមានដីសម្បទានប៉ុន្មានកន្លែង និងមានទំហំសរុបប៉ុន្មាននោះទេ។ ក្រុមពលរដ្ឋបញ្ជាក់ថា ដីសម្បទានភាគច្រើនសុទ្ធតែមានចំណែករបស់មន្ត្រីធំៗក្នុងខេត្តនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។