ពលរដ្ឋមួយចំនួននៅឃុំក្បាលរមាស ក្នុងចំណោមពលរដ្ឋ ៥៨គ្រួសារដែលបដិសេធមិនទទួលសំណង បានកាប់ឫស្សីត្រៀមធ្វើក្បូនបណ្ដែតទឹក នៅគ្រាក្រុមហ៊ុនទំនប់វារីអគ្គិសនីសេសានក្រោមពីរ នៅខែត្រស្ទឹងត្រែង បានបិទទ្វារទំនប់ទឹកសាកល្បង ៦ថ្ងៃហើយ ដើម្បីអនុវត្តគម្រោងផលិតថាមពលអគ្គិសនី។
មកទល់ពេលនេះ កម្ពស់ទឹកហាក់ដូចជានៅថេរត្រឹមកម្ពស់ជាង ៣ម៉ែត្រដដែល នៅឃុំស្រែគរ និងឡើងជាង ២ម៉ែត្រនៅឃុំក្បាលរមាស ក៏ប៉ុន្តែអ្នកភូមិនៅតែប្រុងប្រយ័ត្នខ្ពស់។
ពលរដ្ឋរស់នៅឃុំក្បាលរមាស លោក ដាំ សំណាង ឲ្យដឹងនៅថ្ងៃទី២០ កក្កដា ថា ប្រតិបត្តិការបិទទ្វារទឹកសាកល្បងរយៈពេល ៦ថ្ងៃមកនេះ នៅមិនទាន់មានសញ្ញាគួរឲ្យភ័យព្រួយទេ ហើយអ្នកភូមិនៅតែបន្តប្រកបរបរធ្វើកសិកម្មដាំដុះលក្ខណៈប្រពៃណីនៅឡើយ។ លោកថា អ្នកភូមិភាគច្រើនមិនទាន់ជញ្ជូនសម្ភារៈចេញពីលំនៅឋាននៅឡើយទេ ហើយពួកគាត់នឹងរក្សាទុកសម្ភារៈលើផ្ទះចាស់ដដែល បើទោះបីជាកម្ពស់ទឹកពន្លិចភូមិពួកគាត់ក្តី។
លោកបន្ថែមថា សេចក្តីជូនដំណឹងស្ដីពីការបិទទ្វារទឹករបស់ក្រុមហ៊ុននៅរដូវវស្សា គឺចំពេលដែលអ្នកភូមិដាំដុះ ហេតុនេះពលរដ្ឋភាគច្រើនខកខានមិនបានធ្វើកសិកម្ម ដោយសាររង់ចាំមើលកម្ពស់ទឹកសិន៖ « បើសិនជាគាត់ដកពីស្ទូងទៅអត់បានទេ ដោយសារសំណាបគាត់គ្រប់ខែអស់ហើយ។ ដល់ពេលស្ទូងហួសខែ និងហួសថ្ងៃចឹង អត់បានទិន្នផលស្រូវមកវិញទេ បានតែថាចំណាយខាតកម្លាំងគាត់ទទេ។ គាត់ត្អូញថា ហេតុអ្វីបានជាគេប្រកាសបិទទ្វារទឹកនៅខែដកស្ទូងពលរដ្ឋទៅវិញ ដល់ពេលគាត់កំពុងតែស្ទូងចាប់ផ្ដើមប្រកាសបិទទឹកតែម្តង »។
ក្រុមហ៊ុនបានសាងសង់ទំនប់វារីអគ្គិសនីសេសានក្រោមពីរ ជិតរួចរាល់ហើយ ហើយនឹងបើកឲ្យដំណើរការតួប៊ីនទីមួយនៅពេលឆាប់ៗនេះ ក៏ប៉ុន្តែពលរដ្ឋរស់នៅឃុំស្រែគរ ចំនួន ១២៤គ្រួសារ និងឃុំក្បាលរមាស ចំនួន ៥៨គ្រួសារ មិនទាន់យល់ព្រមទទួលសំណង និងមិនទាន់ចាកចេញពីភូមិចាស់ទៅតាំងទីលំនៅថ្មីនៅឡើយទេ។
លិខិតចុះថ្ងៃទី៥ ខែមិថុនា ឆ្នាំ២០១៧ របស់ក្រុមហ៊ុនទំនប់វារីអគ្គិសនីសេសានក្រោមពីរ ឲ្យដឹងថា បើក្រុមហ៊ុនបិទទ្វារទឹកសាកល្បងនៅពាក់កណ្ដាលខែកក្កដា ឆ្នាំ២០១៧ កម្រិតទឹកនឹងឡើងដល់ ៧២ម៉ែត្រ បណ្ដាលឲ្យលិចលង់ភូមិក្បាលរមាស និងភូមិស្រែគរចាស់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។