អ្នកភូមិកោះគ ឃុំរកាខ្ពស់ ស្រុកស្អាង ខេត្តកណ្ដាល និងយុវជនមាតាធម្មជាតិ បារម្ភអំពីសុវត្ថិភាពផ្ទាល់ខ្លួន នៅពេលដែលនគរបាលមូលដ្ឋានសួររកអត្តសញ្ញាណជាបន្តបន្ទាប់។ អាជ្ញាធរអះអាងថា នោះជាការត្រួតពិនិត្យផ្នែករដ្ឋបាល ដើម្បីសុវត្ថិភាព។
សកម្មជនបរិស្ថាននៃចលនាមាតាធម្មជាតិម្នាក់ឈ្មោះ ថុន រដ្ឋា អមដំណើរដោយអ្នកស្រុកស្អាងជាង ២០នាក់ ស្វែងរកអន្តរាគមន៍ពីអង្គការសហប្រជាជាតិផ្នែកសិទ្ធិមនុស្ស នៅរសៀលថ្ងៃទី១២ មិថុនា។ ការរកអន្តរាគមន៍នេះ គឺក្រោយពេលដែលនគរបាលមូលដ្ឋានស្រុកស្អាង ទៅសួររកអត្តសញ្ញាណប័ណ្ណរបស់លោកម្ដង កាលពីយប់ថ្ងៃទី១១ មិថុនា ម្ដង ហើយបន្តរកម្ដងទៀតនៅព្រឹកថ្ងៃទី១២ មិថុនា។
យុវជន ថុន រដ្ឋា ចាត់ទុកការសួររកបែបនេះជាការគំរាមកំហែងធ្ងន់ធ្ងរលើរូបលោក៖ « ខ្ញុំមានតែម្នាក់ឯងទេ។ ខ្ញុំជាប្រជាពលរដ្ឋខ្មែរដែលរស់នៅលើទឹកដីខ្មែរ។ ខ្ញុំមានសិទ្ធិដើរហើរទៅកន្លែងណា បើសិនជាគាត់ចង់បានអត្តសញ្ញាណប័ណ្ណ ឬគ្រាន់តែចង់បានឈ្មោះខ្ញុំ ដើម្បីរក្សាសន្តិសុខឲ្យខ្ញុំ គាត់អាចឲ្យមនុស្សតែម្នាក់មក ព្រោះខ្ញុំឃើញឲ្យមនុស្សម្នាក់មកហើយ ប៉ុន្តែថ្ងៃហ្នឹងឃើញហើយ មានទាំងកម្លាំង ដូចខ្ញុំហ្នឹងជាមនុស្សម្នាក់អស្ចារ្យខ្លាំងណាស់ណា៎ ! រហូតដល់មានស្នងការស័ក្ដិប្រាំមកស្វែងរកអត្តសញ្ញាណរបស់ខ្ញុំ។ អាហ្នឹងវាជាការគំរាមកំហែងធ្ងន់ធ្ងរមែនទែនមកកាន់ខ្ញុំ ដែលខ្ញុំមកកន្លែងហ្នឹងក្នុងនាមជាប្រជាពលរដ្ឋខ្មែរ តែគេរឹតបន្តឹងសេរីភាព »។
ទាក់ទងការចោទប្រកាន់អំពីការគំរាមកំហែងនេះ ត្រូវបានអធិការនគរបាលស្រុកស្អាង លោក សេង សុជាតិ បដិសេធ ហើយឆ្លើយអះអាងថា នគរបាលមូលដ្ឋានបានល្បាតដើម្បីសន្តិសុខនៅភូមិកោះគ នោះ៖ « ខ្ញុំមិនអាចទទួលយកបានទេ ព្រោះមិនមែនជាការពិត។ យើងអត់បានទៅដាស់ទ្វារគាត់ ឬទៅហៅគាត់មកធ្វើការត្រួតពិនិត្យអី គឺអត់មានទេ គ្រាន់តែថាល្បាតតាមធម្មតា យើងមានមែន។ ប៉ុន្តែបើហៅគាត់ឲ្យចេញមក គឺអត់មានទេយប់មិញ។ បងសួរគាត់ទៅ យប់មិញគាត់បានចេញមកជួបសមត្ថកិច្ចប៉ូលិសខ្ញុំឬអត់ ? សូម្បីតែព្រឹកមិញនេះ ប៉ូលិសសុំសម្ភាសគាត់សុំបង្ហាញអត្តសញ្ញាណ ដើម្បីយើងទំនាក់ទំនងធ្វើកិច្ចការងារហ្នឹងជាមួយគ្នា ដោយសារគាត់អួតអាងថាគាត់មន្ត្រីបរិស្ថានរបស់អង្គការមាតាធម្មជាតិ។ អ៊ីចឹងប្អូនមានអីជាសំអាង ? គាត់ថាគាត់អត់មានផង។ លិខិតសម្គាល់ខ្លួនអីក៏អត់មាន បញ្ជាបេសកកម្មអីក៏អត់មាន ហើយអត្តសញ្ញាណសញ្ជាតិខ្មែរក៏អត់មានដែរ ហើយគាត់អត់សហការជាមួយយើង។ អ៊ីចឹងបានខ្ញុំបង្ហាញថា ខ្ញុំអធិការស្រុកស្អាង ចុះមកនេះគឺដើម្បីថែរក្សាការពារសន្តិសុខជូនដល់បងប្អូនប្រជាពលរដ្ឋ។ អ៊ីចឹងសូមលោកប្អូនកុំបារម្ភអី។ ដោយសារមានបណ្ដឹងរបស់ប្រជាពលរដ្ឋប្ដឹងបញ្ហាបូមខ្សាច់បាក់ច្រាំង ហើយខំធ្វើកិច្ចការហ្នឹងជាមួយគាត់ តែគាត់អត់សហការទេ ហើយយើងក៏អត់មាននីតិវិធីអីផ្សេងទៀត ដើម្បីបង្ខិតបង្ខំឲ្យគាត់ផ្ដល់ចម្លើយមកយើង អាហ្នឹងជាសិទ្ធិរបស់គាត់ »។
យុវជនចលនាមាតាធម្មជាតិ លោក ថុន រដ្ឋា បានទៅស្នាក់នៅក្នុងភូមិកោះគ និងចូលរួមការតវ៉ារបស់អ្នកភូមិជាង ១០០នាក់ កាលពីព្រឹកថ្ងៃទី១១ មិថុនា ប្រឆាំងការបូមខ្សាច់នៅទីនោះ។
អ្នកភូមិកោះគ ជាម្ចាស់ផ្ទះដែលយុវជន ថុន រដ្ឋា ស្នាក់នៅ គឺលោក លី ហួត មានប្រសាសន៍ថា លោកភ័យពេលនគរបាលទៅសួរទាំងយប់៖ « មានមេភូមិគាត់មកគោះទ្វារអង្រួនទ្វារដើម្បីសួររកអត្តសញ្ញាណប័ណ្ណរបស់ប្អូន ដែលមកដេកផ្ទះខ្ញុំហ្នឹង ហើយខ្ញុំឃើញប៉ូលិស អត់ដឹងថាមានប៉េអិមដែរឬអត់ មកច្រើនក្នុងឡានមួយម៉ូតូពីរ។ ខ្ញុំក៏អត់បើកទ្វារទេ ដល់ពេលហើយមេភូមិថា យើងកុំមកហៅគេដាស់សួរយប់ព្រលប់អ៊ីចឹង អត់កើតទេ បើចង់សួរនាំអី ចាំព្រឹកឡើង ពេលថ្ងៃភ្លឺចាំមក។ ដល់ពេលហើយ ពួកកងមកពីស្រុក និងតាមប៉ុស្តិ៍ក្នុងភូមិកោះគ យើងនេះ ប៉ុស្តិ៍ព្រែកថី ហ្នឹងចេញទៅវិញអស់ទៅ »។
ទាក់ទងនឹងការសួររកអត្តសញ្ញាណរបស់យុវជន ថុន រដ្ឋា ពីនគរបាលស្រុកស្អាង ត្រូវបានមជ្ឈមណ្ឌលសិទ្ធិមនុស្សកម្ពុជា ចេញសេចក្ដីអំពាវនាវដល់អាជ្ញាធរថា គួរតែបញ្ឈប់ការយាយី និងការរារាំងសកម្មភាពរបស់យុវជនរូបនេះ ដោយគ្មានមូលដ្ឋានច្បាស់លាស់។
ទាំងលោក លី ហួត និងលោក គោក ធី ជាអ្នកភូមិកោះគ ដូចគ្នាអះអាងថា ការតវ៉ាប្រឆាំងការបូមខ្សាច់ គឺធ្វើឡើងដោយអ្នកភូមិមានបញ្ហាខ្លួនឯង មិនមែនជាការញុះញង់របស់យុវជន ថុន រដ្ឋា ដែលចូលរួមនេះទេ។ ពួកគាត់មិនចង់ឲ្យមានការបូមខ្សាច់ទេ។
អ្នកភូមិបានរំសាយការប្រមូលផ្ដុំ នៅព្រឹកថ្ងៃទី១២ មិថុនា បន្ទាប់ពីអភិបាលរងខេត្តកណ្ដាល លោក ខឹម ច័ន្ទគិរី និងអនុរដ្ឋលេខាធិការក្រសួងរ៉ែ និងឋាមពល លោក ហេង ចាន់ធួន ទៅប្រាប់ឲ្យសាឡង់បូមខ្សាច់ចេញពីច្រាំងជិតផ្ទះពលរដ្ឋ ហើយសន្យាថា នឹងចុះវាស់វែងទន្លេម្ដងទៀត នៅថ្ងៃទី១៣ មិថុនា ដែលនឹងអនុញ្ញាតឲ្យអ្នកភូមិចូលរួមផង៖ « ពួកយើងខ្ញុំចុះមកហើយ មានទាំងម៉ាស៊ីនវាស់ទឹក មាន ជី . ភី . អេស (GPS) វាស់មើលច្រាំងទន្លេចម្ងាយទន្លេ។ ពេលវាស់ហើយត្រួតពិនិត្យហើយ យើងឡើងមកកន្លែងហ្នឹងទៀត ជួបគ្នានិយាយគ្នា អាហ្នឹងបានដំណោះស្រាយ។ បើពូបង្ខំថាឲ្យឈប់ឥឡូវនេះ ខ្ញុំសំអាងលើអីបញ្ឈប់គេបាន ? ច្បាប់យើងចេញអាជ្ញាប័ណ្ណឲ្យគេអាជ្ញាយុកាលពីរឆ្នាំ។ ប្រសិនបើក្រុមហ៊ុនហ្នឹងគាត់ធ្វើខុសនឹងការណែនាំលក្ខខណ្ឌអាជ្ញាប័ណ្ណសារាចររបស់ក្រសួង គឺយើងបិទដកអាជ្ញាប័ណ្ណ មិនមែនបង្កើតហើយទុកបញ្ហាដើម្បីប្រជាពលរដ្ឋនោះទេ។ សូមឲ្យបងប្អូនមានការជឿជាក់។ អ៊ីចឹងសំណូមពរខ្ញុំទទួលយក។ បើស្អែកនេះក្រុមហ៊ុន ជាមួយក្រសួង ជាមួយបងប្អូនទៅវាស់ជម្រៅទឹកទាំងអស់គ្នា បច្ចេកទេសដល់ហើយ គឺផ្អាក »។
អ្នកភូមិថ្លែងថា ពួកគាត់នឹងរង់ចាំមើលលទ្ធផលវាស់វែងនេះសិន មុននឹងសម្រេចចិត្តធ្វើយ៉ាងណាទៀត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។