លោកនាយករដ្ឋមន្ត្រី ហ៊ុន សែន ព្រមានកាត់ភ្លើងចេញពីផ្ទះអ្នកបរិស្ថាន ដែលលោកហៅថាអ្នកបរិស្ថានជ្រុលនិយម ដោយផ្តល់ភ្លើងចន្លុះជំនួសវិញម្តង។ ប៉ុន្តែប្រសាសន៍របស់ លោក ហ៊ុន សែន នៅពេលនេះ ទទួលបានការរិះគន់ពីគណបក្សប្រឆាំង និងសង្គមស៊ីវិលថា នេះជាការរើសអើងពលរដ្ឋខ្លួនឯង ព្រោះរដ្ឋាភិបាលមានតួនាទីផ្តល់សេវាជូនពលរដ្ឋដោយមិនប្រកាន់និន្នាការនយោបាយ។
សារព្រមានរបស់ លោក ហ៊ុន សែន នៅពេលនេះ ខណៈបណ្ដាខេត្តមួយចំនួនធំរបស់កម្ពុជា បានបង្កើតទំនប់វារីអគ្គិសនី ប៉ុន្តែកម្ពុជា នៅពឹងលើភ្លើងអគ្គិសនីនាំចូលពីប្រទេសជិតខាងដដែល។
យ៉ាងណាមិញ កាលពីយប់ថ្ងៃទី២៦ ខែវិច្ឆិកា ដែលជាថ្ងៃចុងក្រោយនៃពិធីបុណ្យអុំទូក គ្រាន់តែបញ្ហាបច្ចេកទេស និងដាច់ចរន្តអគ្គិសនីនៅប្រទេសវៀតណាម ធ្វើឲ្យកម្ពុជា ដាច់ភ្លើងទូទាំងប្រទេស។
ថ្លែងពីខេត្តកោះកុង ក្នុងពិធីសម្ពោធវារីអគ្គិសនីស្ទឹងតាតៃ ដែលមានអានុភាពផលិតថាមពលអគ្គិសនី ២៤៦មេហ្គាវ៉ាត់ នៅថ្ងៃទី២៣ ខែធ្នូ លោក ហ៊ុន សែន ប្រាប់ទៅមន្ត្រីរបស់លោកឲ្យនាំគ្នាផលិតភ្លើងចន្លុះយកទៅឲ្យអ្នកបរិស្ថាននិយម ជំនួសដោយការផ្តល់ភ្លើងអគ្គិសនីប្រើប្រាស់។ លោកបន្តថា អ្នកបរិស្ថាននិយមដែលតែងតែជំទាស់គ្រប់រឿងលើការអភិវឌ្ឍ៖ «តើយើងហ៊ានលះបង់ដីជាងពីរបីពាន់ហិកតារ ដើម្បីបម្រើពលរដ្ឋទូទាំងប្រទេស បង្កើតការងារឲ្យមនុស្សរាប់ម៉ឺន ឬចូលដល់លាននាក់នោះទេ ព្រោះថា ពួកបរិស្ថាននិយមមួយចំនួន ដែលតែងតែជំទាស់ការអភិវឌ្ឍស្អីក៏ទាស់ដែរ ចឹងមានតែវិធីមួយចំនួនសុំនាំគ្នាផលិតចន្លុះជូនទៅដល់ផ្ទះពួកបរិស្ថានជ្រុលនិយម ហើយកាត់ភ្លើងពីផ្ទះពួកគាត់»។
មិនមែនជាលើកទីមួយទេដែលប្រមុខរដ្ឋាភិបាលកម្ពុជា ព្រមានក្រុមអ្នកបរិស្ថានបែបនេះ។ កាលពីខែកុម្ភៈ រដ្ឋាភិបាលក្រោមការដឹកនាំរបស់ លោក ហ៊ុន សែន បានបណ្ដេញស្ថាបនិកអង្គការមាតាធម្មជាតិ លោក អាឡិកហាន់ដ្រូ ហ្គន់ហ្សាឡេស ដេវិតសឹន (Alejandro Gonzalez Davidson) ចេញពីកម្ពុជា ព្រោះតែប្រឆាំងនឹងគម្រោងសាងសង់វារីអគ្គិសនីនៅតំបន់អារ៉ែង។
នាយកអង្គការវេទិកានៃអង្គការមិនមែនរដ្ឋាភិបាលស្ដីពីកម្ពុជា (NGO Forum) លោក តឹក វណ្ណារ៉ា ដែលធ្វើការងារទាក់ទងរឿងបរិស្ថាន ឲ្យដឹងថា ការប្រឆាំងជំទាស់នឹងគម្រោងវារីអគ្គិសនីរបស់អង្គការសង្គមស៊ីវិល ព្រោះរដ្ឋាភិបាលមិនបានបង្ហាញរបាយការណ៍ទាក់ទងផលប៉ះពាល់នៃការសាងសង់ទំនប់វារីអគ្គិសនី ខណៈពួកគេរកឃើញផលប៉ះពាល់ដល់បរិស្ថាន និងមនុស្សមានទំហំធំធេង។ លោកបន្តថា ការផ្តល់ភ្លើងពីរដ្ឋដល់ប្រជាពលរដ្ឋ ជាកាតព្វកិច្ចដែលរដ្ឋាភិបាលត្រូវតែធានាពីការផ្តល់សេវាបានល្អប្រសើរ ដែលមិនមានការរើសអើង៖ «ខ្ញុំមិនធ្វើការបកស្រាយទៅលើការយល់ឃើញទេ ប៉ុន្តែជាទិដ្ឋភាពនៃការយល់ឃើញ រដ្ឋាភិបាលជាអ្នកដឹកនាំប្រជាពលរដ្ឋ ត្រូវផ្តល់សេវាជូនប្រជាពលរដ្ឋឲ្យបានប្រសើរ»។
ទន្ទឹមនឹងការសាងសង់ទំនប់វារីអគ្គិសនីនៅក្នុងខេត្តមួយចំនួន រួមមាន ខេត្តកោះកុង កំពង់ស្ពឺ កំពត ពោធិ៍សាត់ និងខេត្តស្ទឹងត្រែង ជាដើម ក្នុងខេត្តស្ទឹងត្រែង ទំនប់វារីអគ្គិសនីសេសានក្រោម២ ដែលកំពុងស្ថិតក្រោមការសាងសង់ ក្រុមសង្គមស៊ីវិល និងពលរដ្ឋរងផលប៉ះពាល់រាប់រយគ្រួសារ នៅតែប្រឆាំងទាស់ការសាងសង់នេះ រហូតដល់ពលរដ្ឋធ្វើពិធីដាក់បណ្ដាសាអ្នកវិនិយោគនោះទៀតផង។
ប្រភពពីមន្ត្រីជាន់ខ្ពស់កម្ពុជា បានឲ្យដឹងថា បច្ចុប្បន្នប្រទេសកម្ពុជា កំពុងសាងសង់ទំនប់វារីអគ្គិសនីចំនួន ៧កន្លែង និងសិក្សាលើគម្រោងចំនួន ១៧កន្លែងទៀត។ ទំនប់វារីអគ្គិសនីទាំង ៧កន្លែងនោះ សាងសង់ដោយមានទុនវិនិយោគពីបរទេស ជាពិសេសពីប្រទេសចិន។
ទាក់ទងរឿងនេះដែរ អ្នកនាំពាក្យគណបក្សសង្គ្រោះជាតិ លោក យឹម សុវណ្ណ យល់ថា ប្រសាសន៍របស់ លោក ហ៊ុន សែន បែបនេះ គឺជាការរើសអើងសកម្មជនបរិស្ថាន។ ផ្ទុយពីសម្ដីរបស់ប្រមុខរដ្ឋាភិបាល អ្នកនាំពាក្យគណបក្សប្រឆាំងរូបនេះយល់ថា សកម្មជនបរិស្ថានគួរតែត្រូវបានលើកតម្កើង៖ «ពលរដ្ឋខ្មែរមានការយល់ឃើញដូចគ្នា ឬខុសគ្នាពីការអភិវឌ្ឍ គ្រាន់តែជាការបញ្ចេញមតិ យើងមិនត្រូវរើសអើងជាមួយប្រជាពលរដ្ឋខ្លួនឯងពីការមិនឲ្យភ្លើងប្រើ ឬមិនឲ្យភ្លើងប្រើនោះទេ នេះជាការរើសអើង»។
សព្វថ្ងៃ ប្រទេសកម្ពុជា កំពុងដំណើរការ និងសាងសង់វារីអគ្គិសនីនៅតាមបណ្ដាខេត្ត ដូចជា វារីអគ្គិសនីកំចាយ នៅខេត្តកំពត ផលិតអគ្គិសនីបានចំនួន ១៩៣មេហ្គាវ៉ាត់។ វារីអគ្គិសនីអាតៃ នៅខេត្តពោធិ៍សាត់ ផលិតបានអគ្គិសនី ១២០មេហ្គាវ៉ាត់។ វារីអគ្គិសនីតាតៃ នៅខេត្តកោះកុង ផលិតបានអគ្គិសនីចំនួន ២៦០មេហ្គាវ៉ាត់។ វារីអគ្គិសនីគិរីរម្យ៣ នៅខេត្តកំពង់ស្ពឺ ផលិតបានអគ្គិសនីចំនួន ១៨មេហ្គាវ៉ាត់។ វារីអគ្គិសនីឫស្សីជ្រំក្រោម នៅខេត្តកោះកុង ផលិតបាន ៣៣៨មេហ្គាវ៉ាត់។
រោងចក្រអគ្គិសនីដើរដោយថាមពលធ្យូងថ្មទី១ នៅខេត្តព្រះសីហនុ ផលិតអគ្គិសនីបានចំនួន ១០០មេហ្គាវ៉ាត់។ រោងចក្រអគ្គិសនីដើរដោយថាមពលធ្យូងថ្មទី២ អាចផលិតបានអគ្គិសនី ២៧០មេហ្គាវ៉ាត់ និងទំនប់វារីអគ្គិសនីសេសានក្រោម២ ដែលកំពុងសាងសង់ អាចនឹងផ្តល់អគ្គិសនីបានជាង ៤០០មេហ្គាវ៉ាត់៕
សូមស្ដាប់បទសម្ភាសន៍របស់ លោក ជុន ច័ន្ទបុត្រ ជាមួយអ្នកស្រាវជ្រាវការអភិវឌ្ឍសង្គម លោកបណ្ឌិត កែម ឡី បន្ថែម៖
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។