ព្រះសង្ឃ អង្គការសង្គមស៊ីវិល តំណាងសហគមន៍ និងក្រុមយុវជន ប្រមាណ ១០០នាក់ មកពីខេត្តក្រចេះ ស្ទឹងត្រែង និងតំបន់ទន្លេសាប បានជួបជុំគ្នាបង្ហាញពីក្ដីកង្វល់អំពីផលប៉ះពាល់នៃការសាងសង់ទំនប់វារីអគ្គិសនី ដន សាហុង (Don Sahong) ប្រទេសឡាវ នៅថ្ងៃទី១១ កញ្ញា។
ដោយសារមានការលំបាកក្នុងការទំនាក់ទំនងជាមួយក្រុមហ៊ុន មេហ្គាហ្វឺស (MEGA FIRST) ដែលជាអ្នកសាងសង់ទំនប់វារីអគ្គិសនីនេះ ពួកគេបានជំរុញឲ្យប្រព័ន្ធផ្សព្វផ្សាយ ជួយផ្សព្វផ្សាយផ្ញើសារទៅស្ថាប័នពាក់ព័ន្ធ ជុំវិញការអភិវឌ្ឍនៅទន្លេមេគង្គភាគខាងក្រោមនេះ។
មនុស្សចំនួន ២សែន ៧ម៉ឺននាក់នៅជុំវិញពិភពលោក បានស្នើឲ្យក្រុមហ៊ុនមេហ្គាហ្វឺស ផ្អាកគម្រោងសាងសង់ទំនប់វារីអគ្គិសនី ដន សាហុង នៅលើដងទន្លេមេគង្គដ៏មានភាពចម្រូងចម្រាស តាមរយៈការធ្វើញត្តិជំទាស់រយៈពេល ៤ខែ គឺពីខែឧសភា ដល់ខែសីហា។
ព្រះសង្ឃ អង្គការសង្គមស៊ីវិល តំណាងសហគមន៍ និងក្រុមយុវជន ប្រមាណ ១០០នាក់ មកពីខេត្តក្រចេះ ស្ទឹងត្រែង និងតំបន់ទន្លេសាប នៅថ្ងៃទី១១ កញ្ញា បានបង្ហាញលទ្ធផលប្រមូលញត្តិ ដោយស្នើឲ្យក្រុមហ៊ុនមេហ្គាហ្វឺស របស់ប្រទេសម៉ាឡេស៊ី បញ្ឈប់ការសាងសង់ទំនប់នេះជាបន្ទាន់។
នាយកប្រតិបត្តិអង្គការមូលនិធិសត្វព្រៃពិភពលោក ហៅកាត់ថា ដាប់ប៊ែលយូ.ដាប់ប៊ែលយូ.អែហ្វ (WWF) លោក ឈិត សំអាត មានប្រសាសន៍ថា ក្រុមការងារបានព្យាយាមជួបជាមួយក្រុមហ៊ុនមេហ្គាហ្វឺស ដើម្បីពិភាក្សាលើក្ដីបារម្ភរបស់ពលរដ្ឋ ក៏ប៉ុន្តែមិនបានជោគជ័យនោះទេ។ ចាប់តាំងពីខែឧសភា ឆ្នាំនេះ ប្រជាពលរដ្ឋកម្ពុជា ជាង ១ម៉ឺន ២ពាន់នាក់ បានបញ្ចេញមតិជំទាស់ទៅនឹងគម្រោងទំនប់វារីអគ្គិសនីមួយនេះ ក្នុងក្របខ័ណ្ឌយុទ្ធនាការញត្តិសាកលរបស់អង្គការដាប់ប៊ែលយូ.ដាប់ប៊ែលយូ.អែហ្វ។ លោកថា យុទ្ធនាការញត្តិអេឡិចត្រូនិកសាកល ទទួលបានការចុះហត្ថលេខាពីប្រជាជនជាង ២សែន ៥ម៉ឺននាក់ នៅក្នុងប្រទេសច្រើនជាង ២០០ ជុំវិញពិភពលោក។ លោក ឈិត សំអាត បន្តថា ទំនប់ ដន សាហុង គឺជាការពិសោធដ៏មានគ្រោះថ្នាក់ ហើយក្រុមហ៊ុនមេហ្គាហ្វឺស កំពុងតែយកជីវភាពរបស់ប្រជាជនរាប់លាននាក់ធ្វើជាល្បែង។ លោក ឈិត សំអាត បញ្ជាក់ថា ផលប្រយោជន៍ដែលទាញយកពីការសាងសង់ទំនប់វារីអគ្គិសនី ដែលមានថាមពល ២៦០មេហ្គាវ៉ាត់ មិនអាចទូទាត់ទៅនឹងទំហំនៃផលប៉ះពាល់ទៅដល់សហគមន៍ និងធនធានធម្មជាតិដ៏មានចំនួនច្រើននោះទេ។
លោក ឈិត សំអាត៖ «កិច្ចប្រជុំនៅបាងកក នោះគឺថា រដ្ឋាភិបាលឡាវ ក៏គាត់បានឯកភាពក្នុងការដាក់ឲ្យមានការពិគ្រោះយោបល់ ប៉ុន្តែពិគ្រោះយោបល់នេះយើងនៅសំណួរនៅឡើយ ដោយសារនៅពេលណា ពិគ្រោះយោបល់យ៉ាងម៉េច ចាប់ផ្ដើមពីពេលណា ដល់ពេលណា គឺយើងមិនទាន់មានការបញ្ជាក់ច្បាស់លាស់ ចឹងទាមទារឲ្យរដ្ឋាភិបាលឡាវ ហ្នឹង បញ្ជាក់ឲ្យបានច្បាស់លាស់ ទាមទារឲ្យរដ្ឋាភិបាលឡាវ បញ្ជាក់ឲ្យបានច្បាស់លាស់ ព្រោះយើងអត់ចង់ឃើញអ្វីដែលកើតឡើងនៅទំនប់សាយ៉ាបូរី នេះ សាយ៉ាបូរី ពិគ្រោះយោបល់ៗ ចុងក្រោយនៅតែសាងសង់ដដែល យើងអត់ចង់ឃើញបទពិសោធន៍អាក្រក់ចឹងទេ»។
ទំនប់វារីអគ្គិសនី ដន សាហុង របស់ប្រទេសឡាវ អាចជាសញ្ញាអវិជ្ជមានអំពីការបាត់បង់នូវធនធានជលផល និងសត្វផ្សោតទន្លេមេគង្គដ៏មានសារសំខាន់។ សត្វផ្សោតនេះកំពុងទទួលរងគ្រោះថ្នាក់ជិតផុតពូជ ហើយបច្ចុប្បន្នមានប្រមាណ ៨៥ក្បាល ដែលកំពុងរស់នៅក្នុងទន្លេមេគង្គ។ គម្រោងសាងសង់ទំនប់នេះ មានទីតាំងស្ថិតនៅភាគខាងត្បូងប្រទេសឡាវ មានចម្ងាយត្រឹមតែ ១គីឡូម៉ែត្រពីតំបន់ដែលជាទីជម្រករបស់សត្វផ្សោត និងព្រំដែនកម្ពុជា ជាប់ខេត្តស្ទឹងត្រែង។
នៅក្នុងជំនួបនារាជធានីភ្នំពេញ សហគមន៍មកពីខេត្តស្ទឹងត្រែង អ្នកស្រី ប៊ូ ថាំតង ស្នើឲ្យក្រុមហ៊ុននេះបញ្ឈប់ការសាងសង់ទំនប់វារីអគ្គិសនី ដន សាហុង នេះជាស្ថាពរ៖ «នាងខ្ញុំសំណូមពរទៅក្រុមហ៊ុន មេហ្គាហ្វឺស ថា ទោះបីប្រជាជនគាត់ជាជនក្រីក្រដែលពឹងពាក់អាស្រ័យទៅលើធនធានធម្មជាតិ ក៏មិនអាចធ្វើអ្វីទៅដោយមិនគិតដល់ជីវិតគាត់ជាច្រើនពាន់ច្រើនលាននាក់ ដែលពឹងពាក់អាស្រ័យលើធនធានធម្មជាតិហ្នឹងទេ»។
ក្រៅអំពីជំនួបនេះ គេក៏បានបង្ហាញផ្ទាំងបដាព័ត៌មានធំៗលើទូកដែលចតនៅច្រាំងទន្លេភោជនីយដ្ឋាន ទីតានីក (Titanic Restaurant) ដែលអំពាវនាវដល់ក្រុមហ៊ុន មេហ្គាហ្វឺស ឲ្យចេញមកឆ្លើយតបទៅនឹងការជំទាស់ដ៏ធំសម្បើមពីសំណាក់មហាជនដ៏ច្រើននៅលើពិភពលោក។
កាលពីខែមិថុនា រដ្ឋាភិបាលប្រទេសឡាវ បានសម្រេចចិត្តក្នុងការដាក់ទំនប់ ដន សាហុង នេះ ក្នុងនីតិវិធីពិគ្រោះយោបល់របស់គណៈកម្មការទន្លេមេគង្គ។ នីតិវិធីនេះ តម្រូវឲ្យប្រទេសឡាវ រៀបចំការពិគ្រោះយោបល់អន្តររដ្ឋាភិបាលជាមុនសិន មុននឹងឈានទៅសាងសង់ទំនប់នេះ ហើយព្រមទាំងតម្រូវឲ្យសិក្សាហេតុប៉ះពាល់បរិស្ថាន និងសង្គម ហើយផ្សព្វផ្សាយលទ្ធផលនៃការសិក្សាទៅដល់អ្នកពាក់ព័ន្ធ។
សង្គមស៊ីវិល បានហៅរបាយការណ៍វាយតម្លៃហេតុប៉ះពាល់បរិស្ថាន នៃគម្រោងអភិវឌ្ឍន៍វារីអគ្គិសនី ដន សាហុង នេះ គឺជារបាយការណ៍មិនពេញលេញ ដែលមិនបញ្ចូលផលប៉ះពាល់ឆ្លងដែន។ ស្របពេលដែលមានមនុស្ស ៦០លាននាក់រស់នៅតាមដងទន្លេមេគង្គ នឹងរងផលប៉ះពាល់ពីការសាងសង់ទំនប់វារីអគ្គិសនី ដន សាហុង ដែលសង់ពុំមានការទទួលខុសត្រូវនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។