ប្រជាពលរដ្ឋនៅស្រុកបាណន់ ខេត្តបាត់ដំបង ប្រមាណ ៧០នាក់ នៅព្រឹកថ្ងៃទី១៧ ខែឧសភា នាំគ្នាបិទផ្លូវលំចេញក្នុងភូមិមួយកន្លែងតវ៉ាឲ្យក្រុមហ៊ុនធ្វើអាជីវកម្មបូមខ្សាច់ស្រុកនេះ បញ្ឈប់សកម្មភាពរបស់ខ្លួន។
អ្នកភូមិបញ្ជាក់ថា ការបូមខ្សាច់នេះធ្វើឲ្យប៉ះពាល់ដល់ដីកសិកម្មរបស់ប្រជាពលរដ្ឋប្រមាណជាង ១០០គ្រួសារ នឹងប្រឈមការខូចខាតមិនអាចដាំដុះផលដំណាំបាននោះទេ។ ប៉ុន្តែអាជ្ញាធរស្រុកបាណន់ បញ្ជាក់ថា ការបូមខ្សាច់នោះមានច្បាប់អនុញ្ញាតត្រឹមត្រូវ ហើយពុំប៉ះពាល់ដល់ផលប្រយោជន៍ និងការរស់នៅរបស់ប្រជាពលរដ្ឋឡើយ។
ក្រុមប្រជាពលរដ្ឋប្រុសស្រីទាំងនោះ ខ្លះមាននាំកុមារតូចមកជាមួយផង នាំគ្នាឈរតវ៉ានៅក្រោមកម្ដៅថ្ងៃបែកញើសសស្រាក់ស្ទើរគ្រប់គ្នា។ ការតវ៉ានេះប្រជាពលរដ្ឋបានបោះបង្គោលមួយដើមចំកណ្ដាលទ្រូងផ្លូវ ហើយពួកគេឈរតម្រៀបជួរកាត់ទទឹងផ្លូវក្បែរបង្គោលនោះ មិនឲ្យរថយន្តរបស់ក្រុមហ៊ុនដឹកខ្សាច់ឆ្លងកាត់លើផ្លូវបានឡើយ។
ក្រុមប្រជាពលរដ្ឋថ្លែងខណៈតវ៉ានៅលើផ្លូវនោះថា ពួកគេឈរតវ៉ានៅក្រោមកម្ដៅថ្ងៃនេះ ដើម្បីឲ្យក្រុមហ៊ុននោះឈប់ធ្វើអាជីវកម្មបូមខ្សាច់ពីបាតស្ទឹងសង្កែ បន្តទៀត។ អ្នកភូមិបញ្ជាក់ថា ការបូមខ្សាច់នេះមិនបានផលចំណេញអ្វីដល់ប្រជាពលរដ្ឋទេ ប៉ុន្តែសកម្មភាពនេះបើបន្តទៅមុខទៀត វាធ្វើឲ្យធ្វើបាក់ច្រាំងស្ទឹងសង្កែ ហើយប៉ះពាល់ដីរបស់ប្រជាពលរដ្ឋប្រមាណជាង ១៤០គ្រួសារ ខូចខាតមិនអាចដាំដុះផលដំណាំអ្វីបាននោះទេ។
អ្នកស្រុកបន្តថា ក្រុមហ៊ុនបូមខ្សាច់ពីបាតស្ទឹងនៅចំណុចភូមិថ្មី ឃុំកន្ទឺ១ ស្រុកបាណន់ ខេត្តបាត់ដំបង ធ្វើសកម្មភាពប្រមាណជាង ២០ថ្ងៃមកហើយ ចំណែកឯពួកគេក៏បានប្ដឹងទៅសមត្ថកិច្ចមូលដ្ឋានឲ្យបញ្ឈប់សកម្មភាពរបស់ក្រុមហ៊ុនជាបន្តបន្ទាប់ តែពុំមានដំណោះស្រាយឡើយ៖ «នៅកន្លែងដែលគេបូមខ្សាច់នោះមានរ៉ែខ្សាច់ច្រើនណាស់។ បើពុំទាន់មានដំណោះស្រាយទេ ប្រជាពលរដ្ឋនឹងធ្វើការបិទមិនឲ្យធ្វើដំណើរលើផ្លូវនោះបន្តទៀត តែចំពោះអ្នកភូមិអាចចេញចូលបាន»។
ឆ្លើយតបនឹងបញ្ហានេះ អភិបាលរងស្រុកបាណន់ លោក ជុំ ញ៉ មានប្រសាសន៍បញ្ជាក់ថា ក្រុមហ៊ុនបូមខ្សាច់នោះ បូមជាទ្រង់ទ្រាយតូចមានច្បាប់អនុញ្ញាតពីអាជ្ញាធរធ្វើអាជីវកម្មត្រឹមត្រូវ ហើយពុំធ្វើឲ្យខូចខាតដល់ដំណាំរបស់ប្រជាពលរដ្ឋក្បែរនោះ ឬបាត់ដីដោយសារការបូមខ្សាច់នោះទេ៖ «ផ្លូវដែលក្រុមអ្នកធ្វើជីវកម្មដឹកខ្សាច់ចេញចូលនោះជាផ្លូវលំ តូចក្នុងភូមិ ពុំសូវមានមនុស្សធ្វើដំណើរទេ។ ចំណែកឯអ្នកធ្វើជីវកម្មវិញគេក៏ជាកូនអ្នកស្រុកភូមិតំបន់នោះ ហើយពុំមែនធ្វើជាអាជីវកម្មនេះយកធ្វើអ្នកមាននោះទេ»។
ទោះជាយ៉ាងនេះក្ដី មន្ត្រីស៊ើបអង្កេតអង្គការលីកាដូ (Licadho) ខេត្តបាត់ដំបង លោក ហេង សាយហុង បានស្នើឲ្យអាជ្ញាធរពាក់ព័ន្ធត្រូវពិនិត្យមើលពីផលប៉ះពាល់របស់ប្រជាពលរដ្ឋជាធំទៅលើការបូមខ្សាច់នេះ៖ «បញ្ហា នេះខ្ញុំមិនដឹងថា មូលហេតុអ្វីបានជាអាជ្ញាធរអនុញ្ញាតឲ្យក្រុមហ៊ុនធ្វើអាជីវកម្មបូម ខ្សាច់នោះបានទេ ពីព្រោះវាជាទុកលំបាករបស់ប្រជាពលរដ្ឋ ហើយអាជ្ញាធរត្រូវតែដោះស្រាយ»។
យ៉ាងណាប្រជាពលរដ្ឋបានរំសាយទៅវិញ បន្ទាប់ពីអធិការនគរបាលស្រុកបាណន់ ដឹកនាំកម្លាំងប៉ូលិសប្រមាណ ១០នាក់ ចុះទៅពិនិត្យដល់ទីកន្លែងបូមខ្សាច់នោះនៅម៉ោងប្រមាណ ១០កន្លះព្រឹកថ្ងៃទី១៧ ឧសភា។ អធិការនគរបាលស្រុកបាណន់ លោក ប៊ុត សំបូរ បានសន្យាជាមួយប្រជាពលរដ្ឋថា នឹងមិនអនុញ្ញាតឲ្យរថយន្តដឹកខ្សាច់របស់ក្រុមហ៊ុនធ្វើដំណើរឆ្លងកាត់ផ្លូវនោះទៀតឡើយ។ ទោះយ៉ាងនេះក្ដីប្រជាពលរដ្ឋព្រមានថា ប្រសិនសមត្ថកិច្ចមិនបញ្ឈប់សកម្មភាពការបូមខ្សាច់បានទេនោះ ពួកគេនឹងបន្តការតវ៉ាជាថ្មីទៀតក្នុងពេលឆាប់ៗ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។