ជនជាតិដើមភាគតិចជង រស់នៅតំបន់មានគម្រោងសាងសង់ទំនប់វារីអគ្គិសនី ស្ទឹងអារ៉ែង ក្នុងស្រុកថ្មបាំង ខេត្តកោះកុង នៅបន្តបិទផ្លូវតវ៉ា មិនឲ្យក្រុមសិក្សាស្រាវជ្រាវពីផលប៉ះពាល់ និងបុគ្គលិកក្រុមហ៊ុនចិន ស៊ីណូ ហាយត្រូ (Sino hydro) ដែលជាម្ចាស់គម្រោង ចូលទៅកាន់តំបន់របស់ពួកគាត់រស់នៅនោះទេ។
ការតវ៉ាដោយបិទផ្លូវដែលមានរយៈពេលជិត ១០ថ្ងៃកន្លងមកហើយនេះ អាជ្ញាធរពុំទាន់មានសកម្មភាពដោះស្រាយបញ្ចប់បញ្ហានេះនៅឡើយទេ។
ក្រុមមន្ត្រីអាជ្ញាធរស្រុកថ្មបាំង បានឲ្យដឹងនៅថ្ងៃសៅរ៍ ទី២២ មីនា ថា ក្រុមអ្នកសិក្សាស្រាវជ្រាវផលប៉ះពាល់បន្ថែមនៃគម្រោងសាងសង់ទំនប់វារីអគ្គិសនីស្ទឹងអារ៉ែង និងគ្រឿងចក្ររបស់ក្រុមហ៊ុនដែលគ្រោងនាំចូលទៅតំបន់នោះ តាំងពីពាក់កណ្ដាលខែមីនានេះ បានដកខ្លួនចេញមកវិញអស់ហើយ។
អភិបាលរងស្រុកថ្មបាំង លោក កែវ នីបូរា មានប្រសាសន៍ថា កម្លាំងសមត្ថកិច្ចលោកមិនទាន់ចាត់វិធានការចំពោះសកម្មភាពបិទផ្លូវរបស់អ្នកភូមិនោះទេ ដោយមិនចង់ឲ្យមានការប្រឈមមុខដាក់គ្នា ម្យ៉ាងការរារាំងនោះ ក្រៅពីការងារក្រុមហ៊ុន និងក្រុមសិក្សាស្រាវជ្រាវ គឺមិនធ្វើឲ្យប៉ះពាល់ដល់ការធ្វើដំណើររបស់ពលរដ្ឋនោះទេ។
លោក កែវ នីបូរា៖ «ព្រោះគាត់ត្រៀមចាំតែដុតរបស់គេអ៊ីចឹង ហើយអ្នកហ៊ានចូលចាំមើលខាងខេត្តមានបទបញ្ជាសិន។ និយាយម៉េចបើគាត់កំពុងក្តៅឆេវ ព្រោះមានគេអ្នកនាំគាត់ ចាំតែកាន់សាំងស្រោចអ៊ីចឹងហើយធ្វើម៉េច។ ទុកឲ្យថ្ងៃណាស្ងាត់ស្ងៀមខ្លួនគាត់សិនទៅ ឲ្យតែមានគេដឹកអង្ករដឹកអីឲ្យហូប ចេះតែធ្វើសិនទៅ ព្រោះគាត់ចង់បានផលប្រយោជន៍របស់គាត់ដែរ»។
ទោះយ៉ាងណា លោកថា បញ្ហានេះលោកបានធ្វើរបាយការណ៍ជូនទៅថ្នាក់ខេត្តរួចហើយ ហើយគ្រោងនឹងប្រជុំពិភាក្សាដោះស្រាយនៅថ្ងៃច័ន្ទ ទី២៤ ខាងមុខនេះ។
តំណាងក្រុមអ្នកតវ៉ាម្នាក់ជាជនជាតិដើមភាគតិចជង ឈ្មោះ ហឹង ពៅ បានបញ្ជាក់ដែរថា ក្រុមហ៊ុនសាវ៉ាក់ ដែលជាក្រុមហ៊ុនសិក្សាស្រាវជ្រាវពីផលប៉ះពាល់ឲ្យក្រសួងបរិស្ថាន និងក្រុមហ៊ុនចិន បានដកខ្លួនថយបណ្ដោះអាសន្នហើយ ប៉ុន្តែក្រុមអ្នកភូមិមិនទុកចិត្ត ខ្លាចពួកគេមកជាថ្មីទៀត ម្យ៉ាងអាជ្ញាធរខេត្ត ឬរដ្ឋាភិបាល មិនទាន់មានការដោះស្រាយ ឬផ្ដល់ចម្លើយតបយ៉ាងណាឡើយ ចំពោះការទាមទាររបស់ពលរដ្ឋដែលមិនចង់ឲ្យមានការសាងសង់ទំនប់វារីអគ្គិសនីនៅតំបន់គាត់រស់នៅនោះ។
លោក ហឹង ពៅ៖ «ប្រជាជនទាំងអស់គ្នាអត់គាំទ្រការសិក្សារបស់អង្គការហ្នឹងទេ គាត់ខ្លាចដល់ពេលសិក្សាហើយ គាត់ធ្វើរបាយការណ៍កាឡៃមួយចំនួន គាត់ប៉ាន់ស្មានតំបន់យើងមានព្រៃឈើ មានសត្វព្រៃច្រើនអីអ៊ីចឹង ខ្លាចតែគាត់សិក្សាហើយយកគម្រោងហ្នឹងទៅឲ្យក្រុមហ៊ុនធ្វើឲ្យប្រជាជនគាត់ភ័យខ្លាច ដល់អ៊ីចឹងប្រជាជនអត់ឲ្យគាត់ចូលទេ»។
ទាក់ទងបញ្ហានេះ មន្ត្រីសម្របសម្រួលនៃអង្គការសិទ្ធិមនុស្សលីកាដូ ប្រចាំខេត្តកោះកុង លោក អ៊ិន គង់ជិត ដែលកំពុងឃ្លាំមើលសកម្មភាពបិទផ្លូវនោះ មានប្រសាសន៍ថា នេះជាការសម្ដែងឆន្ទៈរបស់អ្នកភូមិជនជាតិដើមភាគតិចនៅតំបន់ព្រៃភ្នំ និងជាការផ្ញើសារមួយទៅរដ្ឋាភិបាលឲ្យដឹងថា ពួកគាត់ត្រូវការអភិរក្សធនធានធម្មជាតិដ៏មានតម្លៃនៅក្នុងតំបន់របស់គាត់ ដោយមិនចង់ឲ្យមានការសាងសង់ទំនប់វារីអគ្គិសនីនោះទេ។
លោក អ៊ិន គង់ជិត៖ «អ៊ីចឹងគឺគាត់ប្រើសិទ្ធិនេះត្រឹមត្រូវតាមច្បាប់ តាមកតិកាសញ្ញាអន្តរជាតិផ្សេងៗ ពីព្រោះកន្លងមក រដ្ឋាភិបាលធ្វើការសម្រេចចិត្តតែខ្លួនឯងរួចហើយ បានទម្លាក់រឿងទាំងអស់ហ្នឹងមកឲ្យអាជ្ញាធរមូលដ្ឋាន និងពួកគាត់ឲ្យទទួលយកដោយបង្ខំ អាហ្នឹងពួកគាត់មិនអាចទទួលយកបានទេ»។
អ្នកភូមិបិទផ្លូវនោះស្ថិតនៅត្រង់ចំណុចខ្ពង់រាប ឬខ្នងភ្នំច្រាំងត្រឡាច ភូមិត្រពាំងឈើត្រាវ ឃុំឫស្សីជ្រំ ដែលមានចម្ងាយពីទីរួមស្រុកថ្មបាំង ប្រមាណ ៤គីឡូម៉ែត្រ ឬចម្ងាយពីតំបន់អារ៉ែង ប្រមាណ ២០គីឡូម៉ែត្រ។
ការតវ៉ានោះមួយថ្ងៃមានគ្នាប្រមាណ ៣០នាក់ ដោយអ្នកភូមិផ្លាស់វេនគ្នាយាមទាំងថ្ងៃទាំងយប់ និងមានព្រះសង្ឃមកពីបណ្ដាញព្រះសង្ឃឯករាជ្យប្រមាណ ១០អង្គ ព្រមទាំងមានក្រុមនិស្សិតមហានគរមួយចំនួនទៀតចូលរួមគាំទ្រសកម្មភាពនេះដែរ។
ក្រុមហ៊ុនចិនកាលពីថ្ងៃទី១៤ ខែមីនា បាននាំគ្រឿងចក្រចូលសិក្សាប្រមូលទិន្នន័យបន្ថែម សម្រាប់គម្រោងវារីអគ្គិសនីស្ទឹងអារ៉ែង ស្ថិតក្នុងឃុំថ្មដូនពៅ ដោយមិនទាន់កំណត់ពេលសាងសង់នៅឡើយទេ។
គម្រោងនេះបានទទួលការអនុញ្ញាតកាលពីថ្ងៃទី១៩ ខែកុម្ភៈ ហើយគ្រោងនឹងបន្តដល់ថ្ងៃទី២៥ ខែមិថុនា ឆ្នាំ២០១៤។
ទំនបន់វារីអគ្គិសនីស្ទឹងអារ៉ែងនោះ អាចប៉ះពាល់ឃុំចំនួនបី គឺឃុំជំនាប់ ឃុំប្រឡាយ និងឃុំថ្មដូនពៅ ក្នុងស្រុកថ្មបាំង ដែលមានប្រជាពលរដ្ឋត្រូវរងផលប៉ះពាល់ប្រមាណជាង ៦០០គ្រួសារ ត្រូវផ្លាស់ប្ដូរទីលំនៅថ្មី៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។