ក្រុមស្ត្រី និងយុវជនសហគមន៍នេសាទនៅភូមិកោះស្រឡៅ ឃុំកោះកាពិ ស្រុកកោះកុង ខេត្តកោះកុង ជាង ១០នាក់ ធ្វើដំណើរទៅកោះស្មាច់ ដែលជាកន្លែងការដ្ឋានលាងខ្សាច់ដើម្បីថតរូបវីដេអូ (Video) សម្រាប់យុទ្ធនាការតស៊ូមតិបញ្ឈប់ការបូមខ្សាច់។
លោកស្រី ម៉ូត សុផា ស្ត្រីនៅសហគមន៍នេសាទកោះស្រឡៅ កាលពីរសៀលថ្ងៃសៅរ៍ ទី៨ ខែកក្កដា ថ្លែងថា សហគមន៍នេសាទកំពុងព្រួយបារម្ភអំពីការបូមខ្សាច់ជាថ្មី ព្រោះក្រុមហ៊ុនមិនស្គាល់ឈ្មោះបានបញ្ជូនគ្រឿងចក្រ ចូកខ្សាច់ និងសាឡង់ដឹកខ្សាច់ចូលទៅតំបន់កោះស្មាច់ ជាតំបន់ព្រៃការពារដែលសហគមន៍ធ្វើនេសាទធ្វើឲ្យប៉ះពាល់ដល់ជីវចម្រុះ និងជីវភាពសហគមន៍ដែលពឹងលើផលនេសាទ។ លោកស្រីបន្តថា ពួកគេនឹងបង្ហោះវីដេអូនេះ តាមបណ្ដាញសង្គមហ៊្វេសបុក (Facebook) ដើម្បីឲ្យក្រសួងរ៉ែ និងថាមពល បំភ្លឺពីបញ្ហានេះ៖ «ព្រោះពួកយើងអត់ដឹងរឿងការដ្ឋាននោះមានអាជ្ញាប័ណ្ណ ឬក៏មានសិទ្ធិអីយ៉ាងម៉េចយើងអត់ដឹងទេ សុំឲ្យលោកខាងលើបំភ្លឺវិញ»។
ស្ត្រីនៅសហគមន៍ដដែលថ្លែងថា សហគមន៍កោះស្រឡៅ ប្រមាណ ៩០% បានពឹងផ្អែកលើមុខរបរនេសាទនេះ។ លោកស្រីបន្តការបន្តអនុញ្ញាតឲ្យដាក់ការដ្ឋានលាងខ្សាច់បែបនេះទៀតនោះប្រជាសហគមន៍នឹងរងគ្រោះចំពោះបញ្ហាសុខភាព និងជីវភាពធ្ងន់ធ្ងរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។