អាជ្ញាធរខេត្តរតនគិរី អំពាវនាវឲ្យប្រជាពលរដ្ឋរស់នៅតាមដងទន្លេស្រែពក និងទន្លេសេសាន បង្កើនការប្រុងប្រយ័ត្នពីគ្រោះទឹកជំនន់ដោយសារតែភ្លៀងធ្លាក់មិនឈប់អស់រយៈពេលបីថ្ងៃកន្លងទៅនេះ។
មន្ត្រីអាជ្ញាធរស្រុកលំផាត់ ឲ្យដឹងនៅថ្ងៃពុធ ទី១៨ ខែកញ្ញា ថាទឹកទន្លេស្រែពក បានជន់ឡើងកម្ពស់ជាង ១០ម៉ែត្រប្រៀបធៀបទៅនឹងថ្ងៃអង្គារ ទី១៧ កញ្ញា កម្ពស់ទឹកមានជាង ៧ម៉ែត្រ។
អភិបាលស្រុកលំផាត់ លោក គង់ ស្រ៊ុន មានប្រសាសន៍បញ្ជាក់ថា ជំនន់ទឹកភ្លៀងមិនទាន់ធូរស្រាលនៅឡើយទេ ចំណែកជំនន់ទឹកទន្លេក៏បានជន់លិចភូមិកែងសាន់ ក្នុងឃុំសេដា រួចហើយ។ លោកបន្តថា ផ្លូវជាតិលេខ៧៦ ត្រូវជំនន់ទឹកភ្លៀងហូរកាត់មិនអាចធ្វើចរាចរណ៍បានតាំងពីថ្ងៃទី១៧ ខែកញ្ញា មក៖ «អាជ្ញាធរយើងកំពុងធ្វើសេចក្ដីជូនដំណឹងដល់ប្រជាពលរដ្ឋឲ្យប្រុងប្រយ័ត្ន ឲ្យត្រៀមលក្ខណៈឲ្យហើយ ដោយសារថាដល់កម្ពស់ទឹក ១២ម៉ែត្រ យើងប្រកាសអាសន្ន។ ដល់ ១៣ម៉ែត្រលិចជាស្ថាពរហើយ»។
អាជ្ញាធរប្រទេសវៀតណាម ដែលមានទីតាំងនៅជិតខេត្តរតនគិរី បានជូនដំណឹងមកថា ភាគីវៀតណាមនឹងបើកទឹកទំនប់វារីអគ្គិសនីពីតំបន់ខ្សែទឹកខាងលើ ចាប់ពីថ្ងៃទី១៣ ដល់ថ្ងៃទី៣០ ខែកញ្ញា ហេតុនេះធ្វើឲ្យកម្ពស់ទឹកទន្លេស្រែពកកើនឡើង។
ប្រធានមន្ទីរធនធានទឹកនិងឧតុនិយមខេត្តរតនគិរី លោក យូ ឡាង មានប្រសាសន៍បញ្ជាក់ថា ទឹកទន្លេស្រែពកឡើងមិនទាន់ដល់កម្រិតប្រកាសអាសន្ននៅឡើយទេ។ លោកបន្តថា ជំនន់ទឹកភ្លៀងក៏ជាផ្នែកមួយបន្ថែមទៀត ដែលធ្វើឲ្យទឹកទន្លេស្រែពកឡើងខ្លាំងខុសធម្មតា៖ «គេពន្លែងទឹកមកចំនួន ៣៤៥ម៉ែត្រគូបក្នុងមួយវិនាទីមកទេ តែទន្លេយើងទទួលបាន ៨០០ម៉ែត្រគូបឯណោះក្នុងមួយវិនាទី អ៊ីចឹង ៥០ភាគរយ កន្លះទន្លេទេ។ អ៊ីចឹងបើសិនទឹកហ្នឹងឡើងរើបៗចូលទៅដល់ ១១ម៉ែត្រជាងហ្នឹងបានយើងរៀបចំប្រាប់គាត់»។
កាលពីថ្ងៃអង្គារ ជំនន់ទឹកភ្លៀងបានជន់លិចភូមិចំនួនពីរ ក្នុងឃុំល្បាំងមួយ។ រហូតមកទល់នឹងថ្ងៃពុធ ទី១៨ ខែកញ្ញា ជំនន់ទឹកភ្លៀងជន់លិចឃុំចំនួនបីទៀតក្នុងស្រុកលំផាត់។
ប្រជាពលរដ្ឋនៅភូមិអូរទទឹង លោក សំ សូត្រ មានប្រសាសន៍បញ្ជាក់ថា ទឹកភ្លៀងនៅតែបន្តធ្លាក់ឥតឈប់ឈរធ្វើឲ្យជំនន់ទឹកភ្លៀងលិចភូមិជាថ្មីទៀត។ លោកបន្តថា ស្រូវនិងដំណាំចម្ការ មានសណ្ដែក ដំឡូងត្រូវទឹកជន់លិច និងអាចខូចខាត ប្រសិនទឹកជន់នៅតែអូសបន្លាយពេលបន្តទៀត៖ «ខ្លាំងណាស់ឥឡូវកំពុងតែឡើងទៀតហើយ។ កន្លែងអូរទទឹង បើមកឃើញហើយលិចអស់ជាង ២គីឡូដី លិចអស់ហើយសណ្ដែកសៀង ស្រូវ ដំឡូង លិចទាំងអស់។ ប្រជាពលរដ្ឋហ្នឹងបាត់បង់ ខូចខាតស្រូវអង្ករមួយចំនួនធំហើយនៅក្នុងជង្រុក»។
មន្ត្រីសម្របសម្រួលអង្គការទន្លេបី លោក មៀច មាន កត់សម្គាល់ថា រយៈពេលមួយយប់ថ្ងៃទី១៧ កន្លងទៅ ទឹកទន្លេឡើងយ៉ាងគំហុក ហេតុនេះប្រជាពលរដ្ឋសហគមន៍រស់នៅតាមដងទន្លេមានការព្រួយបារម្ភពីជំនន់ទឹកទន្លេ ជាពិសេសការបើកទឹកពីទំនប់វារីអគ្គិសនីពីប្រទេសវៀតណាម។
លោកសំណូមពរឲ្យមន្ត្រីជំនាញ និងអាជ្ញាធរមូលដ្ឋានផ្ដល់ព័ត៌មានទាន់ពេលវេលាស្ដីពីការបើកបិទទឹកពីប្រទេសវៀតណាម ដើម្បីប្រជាពលរដ្ឋត្រៀមលក្ខណៈបង្ការគ្រោះមហន្តរាយដោយសារទឹកជំនន់៖ «កម្រិតទឹកវាឡើងគំហុកអ៊ីចឹងមើលអាកាសធាតុវាមិនស្រកចុះណា។ ប្រជាជនចេះតែតាមសួរក្នុងកម្រិតណាក៏ដោយយើងអត់ដឹងទេឲ្យតែមានព័ត៌មានសុំជូនទៅគាត់ផង»។
អាជ្ញាធរស្រុកលំផាត់ ឲ្យដឹងថា លទ្ធផលការខូចខាតបណ្ដោះអាសន្នដោយសារជំនន់ទឹកភ្លៀងកាលពីថ្ងៃអង្គារ កន្លងរួមមាន៖ ឃុំចំនួនបួនក្នុងស្រុកលំផាត់ ត្រូវទឹកជន់លិច ធ្វើឲ្យប៉ះពាល់ប្រជាពលរដ្ឋជាង ១០០គ្រួសារ និងផ្ទះជាង ១០ខ្នង ត្រូវទឹកលិច។ ស្ពានចំនួនពីរបាក់ហូរទៅតាមទឹក។ ផ្លូវលំជាច្រើនខ្សែរងការខូចខាត។ ស្រូវស្រែប្រមាណ ២០ហិកតារត្រូវទឹកជន់លិច។ ចំណែកទ្រព្យសម្បត្តិ មានគ្រឿងយន្ត មាន់ ទា ជ្រូក គោ ក្របីរបស់ប្រជាពលរដ្ឋមានតម្លៃជាង ៤០លានរៀលរងការខូចខាត។ ក្នុងនោះប្រជាពលរដ្ឋម្នាក់បានលង់ទឹក ប៉ុន្តែមិនបណ្ដាលឲ្យរងគ្រោះដល់ស្លាប់នោះទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។