អ្នកភូមិកោះគ ឃុំរកាខ្ពស់ ស្រុកស្អាង ខេត្តកណ្ដាល ព្រមានប្រមូលផ្ដុំគ្នាតវ៉ាប្រឆាំងការបូមខ្សាច់របស់ក្រុមហ៊ុន ឡេង ជិញ ម្ដងទៀត ដោយការបិទផ្លូវលេខ២១អា (A)ដែលតភ្ជាប់ពីក្រុងតាខ្មៅ ទៅស្រុកស្អាង។
អ្នកភូមិឲ្យដឹងនៅព្រឹកថ្ងៃទី៤ កក្កដា ថា ពួកគាត់នឹងអាចតវ៉ាដោយបិទផ្លូវធ្វើដំណើរលេខ២១អា នេះ ប្រសិនបើអាជ្ញាធរពាក់ព័ន្ធនឹងការបូមខ្សាច់នៅតំបន់របស់ពួកគាត់ មិនមកធ្វើកិច្ចសន្យាសំណងលើការខូចខាតឲ្យបានច្បាស់លាស់ជាមុន។ អ្នកភូមិចង់បានកិច្ចសន្យាពីក្រុមហ៊ុនបូមខ្សាច់ និងអាជ្ញាធរ ដោយវាយតម្លៃសំណងតាមសំណង់ផ្ទះនីមួយៗ មុនពេលបាក់ចូលទន្លេ។
ការប៉ុនប៉ងប្រមូលផ្ដុំគ្នាបិទផ្លូវនេះ ដោយសារតែពួកគាត់ខកចិត្តចំពោះព័ត៌មានដែលថា មន្ត្រីក្រសួងរ៉ែ និងថាមពល នឹងមកជួបពួកគាត់កាលពីថ្ងៃទី២ កក្កដា ម្ដង ហើយនិងថ្ងៃទី៤ កក្កដា ម្ដងទៀត ប៉ុន្តែពួកគាត់មិនបានជួប។
ទាក់ទងបញ្ហាណាត់ជួបនេះ ត្រូវបានអនុរដ្ឋលេខាធិការក្រសួងរ៉ែ និងថាមពល លោក ហេង ចាន់ធួន ថ្លែងបញ្ជាក់ថា ខាងក្រសួងលោកមិនបានណាត់ជួបអ្នកទាំងនោះទេ៖ « ព្រោះរឿងបានចប់សព្វគ្រប់។ ប្រជាពលរដ្ឋបានផ្ដិតមេដៃកិច្ចសន្យាជាមួយខាងក្រុមហ៊ុន ហើយនិងអាជ្ញាធររួចរាល់អស់ហើយ ដូចខ្លឹមសារនៅក្នុងកិច្ចសន្យាហ្នឹង ដែលក្រសួងបានធ្វើជាអ្នកសម្របសម្រួលរវាងក្រុមហ៊ុន និងប្រជាពលរដ្ឋស្របនឹងការងារមានចែងក្នុងអាជ្ញាប័ណ្ណហ្នឹង ហើយខ្ញុំអត់បានណាត់អីផង។ នរណាថាខ្ញុំណាត់ ? បងស្រីម្នាក់នោះ ផ្ទះគាត់នៅខាងមុខវត្ត ប្រហែលជាអាចគាត់ច្រឡំ។ បងស្រីនៅកន្លែងកំពង់ដមួយ។ កំពង់ដហ្នឹងគ្មានឡូត៍បូមខ្សាច់ទេ ហើយកន្លែងនោះជាកន្លែងច្រាំងបាក់តាំងពី ២ - ៣ឆ្នាំមុនម្ល៉េះ។ អ៊ីចឹងទៅគាត់ប្រមែប្រមូលគេខ្លួនឯងថាមានប្រជាពលរដ្ឋណាត់អី អត់មានទេ » ។
ប្រសាសន៍របស់លោក គឺយោងទៅកិច្ចសន្យាទទួលខុសត្រូវលើការបូមខ្សាច់ ដែលក្រុមហ៊ុនធ្វើជាមួយប្រជាពលរដ្ឋកាលពីថ្ងៃទី២៧ ខែមិថុនា។ កិច្ចសន្យានេះ ធ្វើនៅសាលាឃុំរកាខ្ពស់ ស្រុកស្អាង ខេត្តកណ្ដាល ដោយបញ្ជាក់ថា ក្រុមហ៊ុននឹងត្រូវទទួលខុសត្រូវសងរាល់ការខូចខាតដំណាំ ដីធ្លី ផ្ទះ និងសំណង់ផ្សេងៗរបស់អ្នកភូមិ តាមការជាក់ស្ដែងស្របតាមច្បាប់។ ទោះជាបែបនេះក្ដី អ្នកភូមិនៅតែមិនទាន់អស់ចិត្ត ព្រោះដីធ្លី និងផ្ទះរបស់ពួកគាត់មានទំហំខុសគ្នា ហើយពួកគាត់ចង់បានការវាយតម្លៃច្បាស់លាស់មុនការខូចខាត។
អ្នកភូមិកោះគ ធ្លាប់តវ៉ាការបូមខ្សាច់នៅតំបន់នេះជាច្រើនលើកហើយ បន្ទាប់ពីមានការប្រេះដី និងបាក់ផ្ទះចូលទន្លេជាបន្តបន្ទាប់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។