អាជ្ញាធរខែត្រស្ទឹងត្រែង សម្រេចដោះលែងជនជាតិដើមភាគតិច ២៣នាក់វិញហើយនៅល្ងាចថ្ងៃទី២៣ កក្កដា បន្ទាប់ពីសមត្ថកិច្ចឃាត់ខ្លួនពួកគាត់ នៅគ្រាដែលកំពុងធ្វើដំណើរដោយរថយន្តពីខែត្រមណ្ឌលគិរី ទៅឃុំក្បាលរមាសចាស់ កាលពីម៉ោង ១២ថ្ងៃត្រង់។ ការសម្រេចចិត្តដោះលែងនេះ ក្រោយពីមានការតវ៉ាពីពលរដ្ឋដែលបដិសេធមិនទទួលសំណងពីផលប៉ះពាល់នៃការសាងសង់ទំនប់វារីអគ្គិសនីសេសានក្រោមពីរ រស់នៅឃុំស្រែគរ និងឃុំក្បាលរមាស។
ជនជាតិដើមភាគតិចព្នង ចាត់ទុកការឃាត់ខ្លួនពលរដ្ឋ ២៣នាក់របស់អាជ្ញាធរខែត្រស្ទឹងត្រែង ថាជាការបំបិទសិទ្ធិសេរីភាពជនជាតិដើមភាគតិច ផ្ទុយពីក្របខ័ណ្ឌច្បាប់។
លេខាធិការដ្ឋានសម្ព័ន្ធជនជាតិដើមភាគតិចកម្ពុជា លោក ឡូ រ៉ង់ ឲ្យដឹងនៅថ្ងៃទី២៣ កក្កដា ថា ជនជាតិដើមភាគតិចព្នង ២៣នាក់ដែលត្រូវសមត្ថកិច្ចខែត្រស្ទឹងត្រែង ឃាត់ខ្លួននោះ មកពីខែត្រមណ្ឌលគិរី។ លោកថា ក្រោយពីសមត្ថកិច្ចដោះលែង ពួកគាត់បានធ្វើដំណើរត្រឡប់ទៅខែត្រមណ្ឌលគិរី វិញហើយ។ លើសពីនេះ ជនជាតិដើមភាគតិចទាំងនោះ ស្ម័គ្រចិត្តធ្វើដំណើរមកឃុំក្បាលរមាស និងឃុំស្រែគរ ក្នុងខែត្រស្ទឹងត្រែង បំណងជួយកាប់ឫស្សីធ្វើក្បូនបណ្ដែតទឹកឲ្យពលរដ្ឋដែលបដិសេធមិនទទួលសំណង។
លោកចាត់ទុកការឃាត់នេះ ថាជាចេតនារារាំងពលរដ្ឋមិនឲ្យចូលជួយគ្នាគ្រាមានអាសន្ន ព្រោះសហគមន៍ដែលបដិសេធមិនទទួលសំណងដោយសារទំនប់វារីអគ្គិសនីសេសានក្រោមពីរ នៅឃុំក្បាលរមាស និងឃុំស្រែគរ ជិត ២០០គ្រួសារ កំពុងប្រឈមទឹកពន្លិចភូមិ ខណៈក្រុមហ៊ុនកំពុងប្រតិបត្តិការបិទទ្វារទឹកសាកល្បងអស់រយៈពេលជាង ១សប្ដាហ៍មកហើយ។ ចំណែកកម្ពស់ទឹកនៅតែបន្តកើនឡើង នឹងអាចពន្លិចភូមិពួកគាត់នៅពេលឆាប់ៗនេះ ហេតុនេះអ្នកភូមិចង់ឲ្យជនជាតិដើមភាគតិចព្នង មកពីខែត្រនានាចូលរួមជួយគ្នាកាប់ឫស្សីបណ្ដែតក្បូន និងជួយរុះរើសម្ភារៈនានាចេញ មុនពេលទឹកលិចភូមិ៖ « ព្រោះ ក្នុងនាម ពលរដ្ឋកម្ពុជា ទាំងមូល យើង អាចជួយ គ្នា ទៅវិញទៅមក បាន។ ចុះហេតុអី ពលរដ្ឋ មកជួយ ពលរដ្ឋ បែរជា យើងហាមឃាត់ បែបនេះ ទៅវិញ ដោយមិនមានហេតុផល។ ចឹងមើលទៅហាក់ដូចជា គេចង់ការពារក្រុមហ៊ុនច្រើន គេច ង់ សុខទុក្ខ និងបញ្ហាធ្ងន់ធ្ងរដែលសហគមន៍ឃុំក្បាលរមាស កំពុង ជួបប្រទះ ពេលនេះ »។
លោក ឡូ រ៉ង់ បន្ថែមថា ជនជាតិដើមភាគតិចព្នង ដែលគ្រោងលើកគ្នាមកឃុំក្បាលរមាស ប្រមាណជិត ១០០នាក់ មកពីខែត្រក្រចេះ ព្រះវិហារ ពោធិ៍សាត់ ក្រចេះ រតនគិរី និងខែត្រមណ្ឌលគិរី បំណងជួយកាប់ឫស្សីធ្វើក្បូនបណ្ដែតទឹក និងជញ្ជូនសម្ភារៈផ្សេងៗ ជាដើម។
ឆ្លើយតបរឿងនេះ អ្នកនាំពាក្យសាលាខែត្រស្ទឹងត្រែង លោក ម៉ែន គុង ឲ្យដឹងនៅថ្ងៃទី២៣ កក្កដា ថា សមត្ថកិច្ចឃាត់ខ្លួនពលរដ្ឋទាំងនោះគ្រាន់តែអប់រំណែនាំ និងបញ្ជូនពួកគាត់ទៅលំនៅឋានវិញ ជៀសវាងធ្វើសកម្មភាពផ្ទុយពីក្របខ័ណ្ឌច្បាប់។ ចំណែកប្រធានក្រុមដឹកនាំពលរដ្ឋឲ្យធ្វើសកម្មភាពអនាធិបតេយ្យប៉ះពាល់សន្តិសុខ សណ្ដាប់ធ្នាប់ សមត្ថកិច្ចនឹងឃាត់ខ្លួនអនុវត្តច្បាប់។
លោកបញ្ជាក់ថា ពលរដ្ឋដែលសមត្ថកិច្ចឃាត់ខ្លួនទាំងនោះ ហាក់មានរៀបផែនការមុន បំណងរៀបចំលំនៅឋានថ្មីនៅតំបន់នោះ៖ « អត់ អាចធ្វើ ចឹង បានទេ ព្រោះនៅខែត្រ មិនទាន់បាន ស្នើសុំជំនួយពលរដ្ឋខែត្រផ្សេង ហើយ មិនទាន់ បានធ្វើ លិខិតផ្លូវកា រ ទំនាក់ទំនងការទូតណាមួយទៅថ្នាក់ដឹកនាំខែត្រមណ្ឌលគិរី ដើម្បីសុំឲ្យចាត់ពលរដ្ឋ ឬកម្លាំងណាមួយមកជួយធ្វើអន្តរាគមន៍កាប់ឫស្សីបណ្ដែតក្បូនអី យើងអត់អាចធ្វើចឹងបានទេ។ ចឹងគឺជាសកម្មភាពអនាធិបតេយ្យហើយលោក »។
អាស៊ីសេរី មិនអាចទាក់ទងតំណាងក្រុមហ៊ុនទំនប់វារីអគ្គិសនីសេសានក្រោមពីរ លោក អ៊ុំ រ៉េត ដើម្បីសុំការឆ្លើយតបការតវ៉ានេះបានទេនៅថ្ងៃទី២៣ កក្កដា ព្រោះទូរស័ព្ទហៅចូល តែពុំមានអ្នកទទួល។
មន្ត្រីសម្របសម្រួលសមាគមអាដហុក (ADHOC) ខែត្រស្ទឹងត្រែង លោក ហូ សំអុល យល់ថា ការចូលរួមជួយគ្នារបស់ជនជាតិដើមភាគតិច គឺជាសេរីភាពរបស់ពលរដ្ឋដែលមានចែងក្នុងក្របខ័ណ្ឌច្បាប់ជាតិ និងអន្តរជាតិ ក៏ប៉ុន្តែបើពួកគាត់ត្រូវបានសមត្ថកិច្ចឃាត់ខ្លួន គឺជាទម្រង់នៃការគំរាមកំហែងសិទ្ធិជនជាតិដើមភាគតិច។ លោកថា សមត្ថកិច្ចគួរជជែកសួរនាំពីហេតុផល និងរកវិធីណាមួយដើម្បីឲ្យពលរដ្ឋយល់ជាមុនសិន ជៀសវាងឃាត់ខ្លួននាំឲ្យរំខានដល់សកម្មភាព និងសិទ្ធិរបស់ពលរដ្ឋ៖ « ខ្ញុំមើលទៅ ដូច មិនមាន ខុសច្បាប់ ទេ ព្រោះនេះ ជាសិទ្ធិ របស់គាត់ សិទ្ធិ ជួប ជុំ ឬមួយ សិទ្ធិដើរ ហើរ ឬមួយសិទ្ធិប្រាស្រ័យ ទាក់ទងគ្នា ។ អាហ្នឹង មានក្នុងរដ្ឋធម្មនុញ្ញទាំងអស់។ ប្រសិនអាជ្ញាធរធ្វើចឹងដូចជាបំបិទសិទ្ធិ និង បំបាក់ស្មារតី ពលរដ្ឋ »។
ក្រុមហ៊ុនទំនប់វារីអគ្គិសនីសេសានក្រោមពីរ បានសាងសង់ទំនប់ជិតរួចរាល់ហើយ នឹងបើកឲ្យដំណើរការតួប៊ីនទីមួយនៅពេលឆាប់ៗនេះ ក៏ប៉ុន្តែពលរដ្ឋរស់នៅឃុំស្រែគរ ចំនួន ១២៤គ្រួសារ និងឃុំក្បាលរមាស ចំនួន ៥៨គ្រួសារ មិនទាន់យល់ព្រមទទួលសំណង និងមិនទាន់ចាកចេញពីភូមិចាស់ទៅតាំងទីលំនៅថ្មីនៅឡើយទេ ខណៈក្រុមហ៊ុនបានបិទទ្វារទឹកសាកល្បងកាលពីថ្ងៃទី១៥ កក្កដា ធ្វើឲ្យកម្ពស់ទឹកកើនឡើង នឹងលិចលង់ភូមិអ្នកភូមិ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។