ជើងទម្រដែលសង់ពីបេតុងទំហំ ១ម៉ែត្របួនជ្រុង សម្រាប់ទ្ររូបសំណាកអតីតមេដឹកនាំសហជីពសេរីកម្មករនៃព្រះរាជាណាចក្រកម្ពុជា លោក ជា វិជ្ជា បានចាប់ផ្ដើមសាងសង់ហើយ នៅថ្ងៃទី២១ ខែមេសា នឹងគ្រោងសង់ឲ្យទាន់ការដំឡើងរូបសំណាក់ជាស្ថាពរនៅដើមខែឧសភា ខាងមុខ។
ទីប្រឹក្សាសហជីពសេរីកម្មករនៃព្រះរាជាណាចក្រកម្ពុជា លោក ម៉ាន់ សេងហាក់ ឲ្យដឹងថា ពិធីសែនក្រុងពាលីសាងសង់ជើងទម្ររូបសំណាកលោក ជា វិជ្ជា បានចាប់ផ្ដើមធ្វើឡើង បន្ទាប់ពីរូបសំណាកលោក ជា វិជ្ជា សង់អំពីថ្មភក់ពណ៌ខៀវ ត្រូវបានវិចិត្រករសាងសង់រួចជាស្ថាពរ។
លោកបញ្ជាក់ថា តាមគម្រោង ក្រោយពីការបើកការដ្ឋានសាងសង់គ្រឹះរូបសំណាករួច នឹងមានការលើកដំឡើងរូបសំណាកលោក ជា វិជ្ជា តាំងនៅច្រមុះជ្រូកសួនច្បារក្បែរវត្តលង្កា នៅថ្ងៃទី៣ ខែឧសភា៖ «ដំណើរការសាងសង់រូបរួចរាល់ហើយ យើងគ្រោងនឹងដាក់នៅថ្ងៃទី៣ ខែឧសភា ខាងមុខនេះ បើសិនជាយើងសាងសង់គ្រឹះហើយ។ ថ្ងៃនេះយើងសាងសង់គ្រឹះរូបសំណាកនេះតែម្ដង»។
រូបសំណាកលោក ជា វិជ្ជា ត្រូវបានជួលជាងឆ្លាក់តាំងពីថ្ងៃទី២ ខែកក្កដា ឆ្នាំ២០១២ នៅកន្លែងឆ្លាក់រចនាបន្ទាយស្រី២ ស្ថិតក្នុងខេត្តសៀមរាប។ រូបសំណាកនេះធ្វើពីប្រភេទថ្មភក់ពណ៌ខៀវ យកមកពីភ្នំត្បែងមានជ័យ ខេត្តព្រះវិហារ ដោយមានជើងទម្រមួយម៉ែត្រ និងកម្ពស់ ១,៦៨ម៉ែត្រ។ រូបសំណាកនេះត្រូវចំណាយថវិកាប្រមាណជាង ៨ពាន់ដុល្លារ ដែលបានមកពីការជួយឧបត្ថម្ភពីសាលារាជធានីភ្នំពេញ ចំនួន ៥ពាន់ដុល្លារ និងខ្លះបានមកពីការរៃអង្គាសពីកម្មកររោងចក្រ។
លោក ជា វិជ្ជា អតីតប្រធានសហជីពសេរីកម្មករនៃព្រះរាជាណាចក្រកម្ពុជា ត្រូវបានឃាតកបាញ់សម្លាប់កាលពីថ្ងៃទី២២ ខែមករា ឆ្នាំ២០០៤ ខណៈពេលដែលលោកកំពុងតែអានកាសែតនៅតូបលក់កាសែតក្បែររបងវត្តលង្ការ។ បច្ចុប្បន្នអង្គការជាតិ និងអន្តរជាតិខ្លះរិះគន់ថា ការសម្លាប់លោក ជា វិជ្ជា នៅមិនទាន់ត្រូវបានអាជ្ញាធរ និងតុលាការចាប់ខ្លួនឃាតកពិតប្រាកដយកមកផ្ដន្ទាទោសនៅឡើយទេ ក្រៅតែពីការចាប់ខ្លួនលោក សុខ សំអឿន និងលោក ប៊ន សំណាង ឲ្យជាប់ទោសក្នុងម្នាក់ៗចំនួន ២០ឆ្នាំ ពីបទមនុស្សឃាតទៅលើលោក ជា វិជ្ជា។ ប៉ុន្តែការផ្ដន្ទាទោសនោះត្រូវបានរិះគន់ថា ធ្វើឡើងដោយគ្មានភស្តុតាងច្បាស់លាស់ និងចាត់ទុកពួកគេទាំងពីរជាឃាតកសិប្បនិម្មិត ហើយជនប្រព្រឹត្តនៅតែរួចទោសពីសំណាញ់ច្បាប់នៅឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។