កម្ពុជា ប្រារព្ធទិវាទឹកពិភពលោកឆ្នាំ២០១៤ នៅថ្ងៃសុក្រ ទី២១ នេះ នៅពេលអង្គការយូនីសេហ្វ (UNICEF) បានរកឃើញថា ប្រជាពលរដ្ឋកម្ពុជា ៦,៣លាននាក់ នៅពុំទាន់មានទឹកស្អាតប្រើប្រាស់ និងអនាម័យជាមូលដ្ឋាននៅឡើយ បើទោះជាមហាសន្និបាតអង្គការសហប្រជាជាតិ កាលពី ៤ឆ្នាំមុនបានកំណត់ថា ពលរដ្ឋគ្រប់រូបត្រូវទទួលបានទឹកស្អាត និងអនាម័យមូលដ្ឋាន ដែលជាសិទ្ធិមូលដ្ឋានរបស់ពួកគេក៏ដោយ។
សេចក្តីថ្លែងការណ៍អង្គការយូនីសេហ្វ ផ្សាយកាលពីថ្ងៃទី២០ មីនា ឲ្យដឹងថា ប្រជាពលរដ្ឋប្រមាណ ៣លាន ៩សែននាក់ ដែលខ្វះទឹកស្អាតសម្រាប់បរិភោគ គឺជាប្រជាជនក្រីក្ររស់នៅតាមតំបន់ជនបទ។ ការខ្វះទឹកស្អាតប្រើប្រាស់ និងអនាម័យមូលដ្ឋាននេះ បានធ្វើឲ្យកុមារដែលមានចំនួន ៤១ភាគរយនៃប្រជាពលរដ្ឋសរុប ប្រឈមនឹងការឆ្លងនូវជំងឺផ្សេងៗដែលចម្លងតាមទឹក។
មន្ត្រីជំនាញខាងទំនាក់ទំនងអង្គការយូនីសេហ្វ លោក មាស ប៊ុនថា មានប្រសាសន៍កាលពីថ្ងៃព្រហស្បតិ៍ ទី២០ ថា កម្ពុជា នៅមានចំណុចខ្វះខាតមួយចំនួន បណ្ដាលឲ្យរដ្ឋាភិបាលមិនទាន់អាចផ្តល់ទឹកស្អាត និងអនាម័យជាមូលដ្ឋានដល់ពលរដ្ឋទូទាំងប្រទេសបាន។
«សំឡេង»
សេចក្តីថ្លែងការណ៍បន្តថា ការខ្វះទឹកស្អាត និងអនាម័យ ជាបញ្ហានាំឱ្យមានការបាត់បង់ជីវិត និងប្រាក់កាស។ បញ្ហានេះ បណ្ដាលឲ្យរដ្ឋាភិបាលខាតបង់ទឹកប្រាក់ប្រមាណ ១៤៦លានដុល្លារជារៀងរាល់ឆ្នាំ។
អង្គការយូនីសេហ្វ កំពុងសហការជាមួយរាជរដ្ឋាភិបាល និងដៃគូអភិវឌ្ឍន៍ និងអង្គការមិនមែនរដ្ឋាភិបាលនានា ដើម្បីរៀបចំ និងអនុវត្ដគោលនយោបាយជាតិស្ដីពីការផ្គត់ផ្គង់ទឹកស្អាត និងសេវាអនាម័យ ក្នុងគោលបំណងបង្កើនការផ្គត់ផ្គង់ទឹកនៅតាមគ្រួសារ និងសាលារៀន និងដើម្បីលើកកម្ពស់ឥរិយាបថអនាម័យនៅតាមសហគមន៍មូលដ្ឋាន រួមទាំងប្រជាពលរដ្ឋក្រីក្រជាងគេ និងអ្នកដែលពិបាកទទួលនូវសេវាកម្មសាធារណៈ ដែលកំពុងត្រូវការចាំបាច់បំផុត។
មន្ត្រីក្រសួងសុខាភិបាល នៅមិនទាន់ឆ្លើយតបនឹងរបាយការណ៍អង្គការយូនីសេហ្វ នៅឡើយទេកាលពីថ្ងៃព្រហស្បតិ៍ ទី២០ មីនា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។