មន្ត្រី​រដ្ឋាភិបាល​បន្ទោស​វប្បធម៌​ខ្មែរ​មិន​ហ៊ាន​ប្ដឹង​ជន​រំលោភ​បំពាន​ផ្លូវ​ភេទ

មន្ត្រី​រដ្ឋាភិបាល​កម្ពុជា ទទួល​ស្គាល់​របាយការណ៍​ស្ដីពី​ការ​ជួញ​ដូរ​មនុស្ស​របស់​ក្រសួង​ការ​បរទេស​សហរដ្ឋ​អាមេរិក ប៉ុន្តែ​លោក​បាន​បន្ទោស​វប្បធម៌​ខ្មែរ ដែល​មាន​ការ​ខ្មាសអៀន​មិន​ហ៊ាន​ប្ដឹង​ជន​ល្មើស​ដែល​បាន​រំលោភ​បំពាន​ផ្លូវ​ភេទ។ ប៉ុន្តែ សហរដ្ឋ​អាមេរិក អះអាង​ផ្ទុយ​វិញ​ថា ស្ថានភាព​ជួញ​ដូរ​មនុស្ស​ធ្ងន់ធ្ងរ​នៅ​កម្ពុជា ដោយសារ​អំពើ​ពុក​រលួយ និង​និទ្ទណ្ឌភាព។

0:00 / 0:00

អ្នក​នាំ​ពាក្យ​ទីស្ដីការ​គណៈរដ្ឋមន្ត្រី លោក ផៃ ស៊ីផាន មាន​ប្រសាសន៍​ថា ឧបសគ្គ​ចម្បង​របស់​រដ្ឋាភិបាល​កម្ពុជា ក្នុង​ការ​បំបាត់​ការ​ជួញ​ដូរ​មនុស្ស គឺ​ដោយសារ​តែ​ជន​រងគ្រោះ​ផ្លូវ​ភេទ​មួយ​ចំនួន​មិន​ហ៊ាន​ចេញ​មុខ​ទាមទារ​យុត្តិធម៌​តាម​ប្រព័ន្ធ​តុលាការ៖ «បញ្ហា​វប្បធម៌​មួយ​ដែល​ជា​ការ​ទទួល​របស់​ពលរដ្ឋ​យើង​នោះ លោក​មិន​ទាន់​មាន​សេចក្តី​ក្លាហាន​គ្រប់គ្រាន់​មក​និយាយ​ប្រាប់​ប្ដឹង ឬ​សម្រប​សម្រួល​ក្រៅ​ប្រព័ន្ធ​តុលាការ»

របាយការណ៍​ការ​ជួញ​ដូរ​មនុស្ស របស់​ក្រសួង​ការ​បរទេស​សហរដ្ឋ​អាមេរិក ផ្សាយ​កាល​ពី​ថ្ងៃ​ពុធ ដាក់​ប្រទេស​កម្ពុជា នៅ​ចំណាក់​ថ្នាក់​លេខ​រៀង​ទី​ពីរ ប៉ុន្តែ​ជា​ប្រទេស​ស្ថិត​ក្នុង​ការ​តាម​ដាន​ពី​ការ​ជួញ​ដូរ​មនុស្ស និង​អាច​ធ្លាក់​មក​ចំណាក់​ថ្នាក់​ទី៣ ជាប់​ក្នុង​បញ្ជី​ខ្មៅ​ជា​ប្រទេស​ដែល​មិន​អាច​អនុវត្ត​គោលការណ៍​ដោះស្រាយ​បញ្ហា​ជួញ​ដូរ​មនុស្ស​បាន សូម្បី​តែ​ក្នុង​កម្រិត​ទាប​បំផុត​ក៏ដោយ។

របាយការណ៍​បន្ត​ថា កម្ពុជា ជា​ប្រភព​កន្លែង​ឆ្លង​កាត់ និង​គោលដៅ​នៃ​ការ​ជួញ​ដូរ​មនុស្ស និង​ការ​ប្រើប្រាស់​ពលកម្ម​ដោយ​បង្ខំ។

ពលរដ្ឋ​កម្ពុជា ទាំង​ប្រុស​ស្រី និង​កុមារ បាន​ស្វែង​រក​ការងារ​ធ្វើ​នៅ​ប្រទេស​ក្នុង​តំបន់​មួយ​ចំនួន ដូចជា​ថៃ ម៉ាឡេស៊ី វៀតណាម និង​សិង្ហបុរី នៅ​តាម​រោងចក្រ និង​ឧស្សាហកម្ម​ផ្សេងៗ ប៉ុន្តែ​បាន​ក្លាយ​ទៅ​ជា​ជន​រងគ្រោះ​នៃ​ការ​ជួញ​ដូរ​មនុស្ស និង​បង្ខំ​ពលកម្ម។

ចំណែក​នៅ​ក្នុង​ប្រទេស​កម្ពុជា វិញ ស្ត្រី និង​ក្មេង​ស្រី​កម្ពុជា និង​ជនជាតិ​វៀតណាម ត្រូវ​បាន​ដឹក​ជញ្ជូន​ទៅ​កាន់​ខេត្ត​មួយ​ចំនួន ដូចជា​ខេត្ត​សៀមរាប បន្ទាយមានជ័យ កោះកុង និង​ខេត្ត​ព្រះសីហនុ។ ពួក​គេ​បាន​ក្លាយ​ជា​ជន​រងគ្រោះ​នៃ​ការ​ជួញ​ដូរ​ផ្លូវ​ភេទ​នៅ​តាម​ទី​កន្លែង​រក​ស៊ី​ផ្លូវ​ភេទ និង​កន្លែង​កម្សាន្ត​ផ្សេងៗ​ទៀត។

របាយការណ៍​បន្ត​ទៀត​ថា ការ​ជួញ​ដូរ​ផ្លូវ​ភេទ ពិសេស​ការ​លក់​ដូរ​ក្រមុំ​ព្រហ្មចារិយ​របស់​ស្ត្រី និង​កុមារី ក៏​កំពុង​ក្លាយ​ជា​បញ្ហា​នៅ​ប្រទេស​កម្ពុជា។ បុរស​ខ្មែរ​ជា​ប្រភព​ប្រើប្រាស់​សេវា​ផ្លូវ​ភេទ​កុមារ​មិន​ទាន់​គ្រប់​អាយុ។ ចំណែក​អ្នក​ទទួល​សេវា រួម​មាន​បុរស​នៅ​តាម​ប្រទេស​មួយ​ចំនួន​នៅ​តំបន់​អាស៊ី សហរដ្ឋ​អាមេរិក និង​អឺរ៉ុប ដែល​ធ្វើ​ដំណើរ​មក​កម្ពុជា ដើម្បី​ស្វែង​រក​ទេសចរណ៍​ផ្លូវ​ភេទ​លើ​កុមារ។

របាយការណ៍​បន្ថែម​ទៀត​ថា រដ្ឋាភិបាល​កម្ពុជា បាន​ខិតខំ​ប្រឹងប្រែង​បំបាត់​ការ​ជួញ​ដូរ​ផ្លូវ​ភេទ​ដែរ ប៉ុន្តែ​បាន​បរាជ័យ​នាំ​ខ្លួន​ជន​សង្ស័យ​មក​កាត់​ទោស និង​ផ្តល់​ការ​ការពារ​ជន​រងគ្រោះ។ បញ្ហា​នេះ​បណ្ដាល​មក​ពី​អំពើ​និទ្ទណ្ឌភាព និង​ការ​មិន​បាន​ផ្តល់​យុត្តិធម៌​ដល់​ជន​រងគ្រោះ។

លោក ផៃ ស៊ីផាន បន្ត​ថា រដ្ឋាភិបាល​បាន​ប្រឹងប្រែង​ដោះស្រាយ​បញ្ហា​ជួញ​ដូរ​មនុស្ស និង​មិន​បាន​ព្រងើយ​កន្តើយ​ចំពោះ​បញ្ហា​នេះ​ឡើយ៖ «គោលការណ៍​ទូទៅ​របស់​រដ្ឋាភិបាល​ហ្នឹង យើង​ធ្វើ​យ៉ាង​ម៉េច យើង​មាន​ច្បាប់ បន្ទាប់​ពី​មាន​ច្បាប់ ហើយ​យើង​មាន​យន្តការ និង​មន្ត្រី​សម្រាប់​ទទួល​ខុស​ត្រូវ​ចំពោះ​ការ​ជួញ​ដូរ ក៏ប៉ុន្តែ​យើង​ត្រូវ​ការ​ពេល​វេលា​សម្រាប់​អប់រំ»

ឯកអគ្គរដ្ឋទូត​គោចរ​សហរដ្ឋ​អាមេរិក តាម​ដាន និង​បំបាត់​ការ​ជួញ​ដូរ​មនុស្ស លោក ល្វីស ស៊ីដឺបាកា (Luis CdeBaca) មាន​ប្រសាសន៍​ថា ស្ថានភាព​ជួញ​ដូរ​មនុស្ស​នៅ​កម្ពុជា កំពុង​ធ្លាក់​ចុះ។ លោក​បន្ត​ថា រដ្ឋាភិបាល​កម្ពុជា បាន​ព្រងើយ​កន្តើយ​ជួយ​ជន​រងគ្រោះ​នៃ​ការ​ជួញ​ដូរ​មនុស្ស។ លោក​ថា មាន​ករណី​ជន​រងគ្រោះ​នៃ​ការ​ជួញ​ដូរ​រាប់​ពាន់​នាក់​ត្រូវ​បាន​ជួយ​សង្គ្រោះ​ដោយ​អង្គការ​ក្រៅ​រដ្ឋាភិបាល​ស្ទើរ​ទាំង​ស្រុង ហើយ​អង្គការ​ទាំង​នោះ​ទទួល​ជំនួយ​ពី​បរទេស។ លោក​ស្នើសុំ​ឲ្យ​រដ្ឋាភិបាល​កម្ពុជា ជួយ​រំលែក​បន្ទុក​ការងារ​ពី​អង្គការ​ក្រៅ​រដ្ឋាភិបាល​ផង។

របាយការណ៍​បន្ត​ថា ក្រសួង​យុត្តិធម៌​កម្ពុជា រាយការណ៍​ថា កាល​ពី​ឆ្នាំ​២០១២ តុលាការ​បាន​ដំណើរ​ការ​កាត់​ទោស​ជន​ល្មើស ៥០​ករណី ប៉ុន្តែ​បាន​កាត់​ទោស​ជន​ល្មើស​បាន ៤៤​ករណី។ ចំនួន​នេះ​បាន​ថយ​ចុះ​ជាង ២០​ករណី​ធៀប​នឹង​ឆ្នាំ​២០១១។ បញ្ហា​នេះ បណ្ដាល​មក​ពី​អំពើ​ពុក​រលួយ​នៅ​គ្រប់​កម្រិត បណ្ដាល​ឲ្យ​មាន​អំពើ​និទ្ទណ្ឌភាព៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។