នៅព្រឹកថ្ងៃទី៨ កក្កដា រដ្ឋសភានឹងរៀបចំសិក្ខាសាលាពិគ្រោះយោបល់ជុំវិញសេចក្ដីព្រាងច្បាប់ស្ដីពីសមាគម និងអង្គការមិនមែនរដ្ឋាភិបាល តាមការគ្រោងទុក។ ក៏ប៉ុន្តែ ក្រុមអង្គការសង្គមស៊ីវិលទាំងជាតិ ទាំងអន្តរជាតិ នៅតែរក្សាជំហរទាមទារឲ្យបញ្ឈប់សេចក្ដីព្រាងច្បាប់ដ៏ចម្រូងចម្រាសនេះ ដោយលើកឡើងថា រដ្ឋសភាមិនបើកទូលាយឲ្យមានការពិភាក្សាដេញដោលពីសំណាក់សង្គមស៊ីវិលនោះទេ។
មួយថ្ងៃមុនរដ្ឋសភានឹងធ្វើសិក្ខាសាលាបើកឲ្យមានការពិគ្រោះយោបល់ជុំវិញសេចក្ដីព្រាងច្បាប់ស្ដីពីសមាគម និងអង្គការមិនមែនរដ្ឋាភិបាល ក្រុមអង្គការសង្គមស៊ីវិលក្នុងស្រុក នៅព្រឹកថ្ងៃទី៧ កក្កដា នេះ រៀបចំសិក្ខាសាលាដាច់ដោយឡែកមួយជាមួយភាគីពាក់ព័ន្ធ ដើម្បីពិគ្រោះ និងវិភាគផ្នែកច្បាប់លើទម្រង់នៃសេចក្ដីព្រាងច្បាប់ដ៏ចម្រូងចម្រាសនេះ មុននឹងបញ្ជូនទៅរដ្ឋសភាសម្រាប់ការពិភាក្សាដេញដោល។
អង្គការដែលរៀបចំសិក្ខាសាលានេះរួមមាន គណៈកម្មាធិការសហប្រតិបត្តិការដើម្បីកម្ពុជា វេទិកានៃអង្គការមិនមែនរដ្ឋាភិបាលស្ដីពីកម្ពុជា មជ្ឈមណ្ឌលសិទ្ធិមនុស្សកម្ពុជា គណៈកម្មការប្រព្រឹត្តិកម្មនៃអង្គការសមាគមការពារសិទ្ធិមនុស្សកម្ពុជា ហៅកាត់ថា ច្រាក់ (CHRAC) និងស្ថាប័នពាក់ព័ន្ធមួយចំនួនទៀត។ អង្គសិក្ខាសាលា បានគូសបញ្ជាក់ពីចំណុចមួយចំនួននៃសេចក្ដីព្រាងច្បាប់នេះ ដែលរឹតត្បិតប្រតិបត្តិការរបស់អង្គការសង្គមស៊ីវិល។
នាយកប្រតិបត្តិនៃគណៈកម្មាធិការសហប្រតិបត្តិការដើម្បីកម្ពុជា លោក សឿង សារឿន លើកឡើងថា ភាគច្រើននៃសេចក្ដីព្រាងច្បាប់នេះ ត្រូវបានតាក់តែងឡើងដោយផ្ទុយពីក្របខ័ណ្ឌគតិយុត្តិជាតិ និងអន្តរជាតិ៖ «អ្នកវិភាគជាតិ និងអន្តរជាតិ ខ្ញុំឃើញសឹងតែក្នុងចំណោម ៣៩មាត្រានៃ ៩ជំពូកហ្នឹង មានរហូតទៅដល់ ៧៥% នៃឯកសារហ្នឹង គឺបង្កប់អត្ថន័យដែលពិបាកនឹងយល់ ពិបាកនឹងទទួលយកបាន ហើយពិបាកនឹងយល់ ពិបាកនឹងទទួលយកបានហ្នឹង គឺធ្វើឲ្យច្បាប់ហ្នឹងអាក្រក់ ធ្វើឲ្យច្បាប់ហ្នឹងពិបាកអនុវត្ត ធ្វើឲ្យច្បាប់ហ្នឹងប៉ះពាល់សិទ្ធិសេរីភាពរបស់ប្រជាពលរដ្ឋក្នុងការចូលរួមក្នុងការអភិវឌ្ឍប្រទេស»។
មាត្រា៥ នៃសេចក្ដីព្រាងច្បាប់នេះជាមាត្រាមួយក្នុងចំណោមមាត្រាមួយចំនួនទៀត ដែលអង្គការសង្គមស៊ីវិលព្រួយបារម្ភខ្លាំង ដោយអះអាងថា មាត្រានេះរឹតត្បិតដល់សិទ្ធិបុគ្គលក្នុងការបង្កើតអង្គការសមាគម។ ត្រង់ចំណុចនេះ លោក ព្រាប កុល នាយកប្រតិបត្តិនៃអង្គការតម្លាភាពកម្ពុជា អះអាងថា លោកមិនអាចទទួលយកបានទេ៖ «សហគមន៍ព្រៃឈើមានសហគមន៍ដីធ្លី មានក្លឹបយុវជន មានអីហូរហែហ្នឹង គឺតម្រូវឲ្យចុះឈ្មោះ បើសិនជាគាត់ចង់ឲ្យស្របច្បាប់។ បើសិនជាគាត់ធ្វើការអត់មានចុះឈ្មោះ ថ្ងៃក្រោយទៅគេអាចចោទគាត់ថាបំពានច្បាប់ ហើយដាក់ទោសគាត់គ្រប់ពេលវេលាទាំងអស់។ ហើយមិនទាន់មានការចេញច្បាប់ហ្នឹងផង យើងឃើញមានឧបសគ្គច្រើនរួចទៅហើយ សម្រាប់សមាគមដែលមិនបានចុះឈ្មោះ»។
យ៉ាងណា ក្រុមអង្គការសង្គមស៊ីវិលទាំងនេះ ថានឹងចូលរួមសិក្ខាសាលារបស់រដ្ឋសភា នៅព្រឹកថ្ងៃទី៨ កក្កដា ដើម្បីពិភាក្សាដេញដោល ប៉ុន្តែថា រដ្ឋសភាផ្ដល់ពេលវេលាតិចពេកសម្រាប់ការពិភាក្សាដែលគេរៀបចំតែមួយព្រឹកនោះ។
ដោយឡែកទាក់ទងនឹងសេចក្ដីព្រាងច្បាប់នេះដែរ ទោះបីជាលោកនាយករដ្ឋមន្ត្រី ហ៊ុន សែន ធ្លាប់បានប្រកាសមិនឲ្យជនបរទេសណាមួយលូកដៃក្នុងការធ្វើច្បាប់នេះក៏ដោយ ក៏ក្រុមអង្គការអន្តរជាតិចំនួន៤០ រួមមាន អង្គការលើកលែងទោសអន្តរជាតិ (Amnesty International) អង្គការអ៊ែកសិនអេត (Action Aid) អង្គការឃ្លាំមើលពិភពលោក (Global Witness) ជាដើម កាលពីថ្ងៃទី៦ កក្កដា បានសរសេរលិខិតរួមគ្នាមួយ ផ្ញើជូនលោកនាយករដ្ឋមន្ត្រី ហ៊ុន សែន ស្នើឲ្យបញ្ឈប់សេចក្ដីព្រាងច្បាប់នេះជាបន្ទាន់។ លិខិតនោះ ក៏បានលើកឡើងដែរថា ប្រសិនបើរាជរដ្ឋាភិបាលកម្ពុជា ពិតជាគិតគូរពីការការពារ និងការលើកស្ទួយសិទ្ធិមនុស្សមែន រដ្ឋាភិបាលគួរតែយកចិត្តទុកដាក់លើកំណែទម្រង់ច្បាប់ទូទៅទៅវិញទេ ដើម្បីធានាថា ប្រជាពលរដ្ឋកម្ពុជា ទទួលបានសិទ្ធិដែលពួកគេត្រូវការជាចាំបាច់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។