ក្រុមជនភៀសខ្លួនម៉ុងតាញ៉ា វៀតណាម ១៣នាក់ ត្រូវបានសង្គ្រោះចេញពីព្រៃខេត្តរតនគិរី។ ការសង្គ្រោះនេះធ្វើឡើងបន្ទាប់ពីមានសេចក្ដីរាយការណ៍ថា ជនម៉ុងតាញ៉ាទាំងនោះសម្រេចចេញពីព្រៃដោយសារពួកគេមិនអាចទ្រាំលាក់ខ្លួនតទៅទៀតបាន។
នៅម៉ោងប្រមាណ ៥ព្រឹកព្រលឹមថ្ងៃទី២០ ខែធ្នូ ក្រុមជនជាតិដើមភាគតិចម៉ុងតាញ៉ា ចំនួន ៨នាក់ ក្នុងនោះមានស្រីម្នាក់ ប្រុស ៧នាក់ ដែលមានអាយុចន្លោះពី១៨ ដល់ ៥០ឆ្នាំ បានចេញពីព្រៃមកជួបតំណាងអង្គការសហប្រជាជាតិទទួលបន្ទុកសិទ្ធិមនុស្សនៅកម្ពុជា នៅពេលដែលក្រុមនេះទទួលបានព័ត៌មានថា ជនជាតិដើមទាំងនោះឋិតនៅក្នុងឃុំសេដា ស្រុកលំផាត់ ខេត្តរតនគិរី។
តំណាងការិយាល័យសិទ្ធិមនុស្សអង្គការសហប្រជាជាតិប្រចាំកម្ពុជា លោកស្រី វ៉ាន់ ហ៊ាលី (Wan Hea Lee) មានប្រសាសន៍ប្រាប់វិទ្យុអាស៊ីសេរីថា ទូរស័ព្ទអនាមិកមួយបានប្រាប់លោកស្រីពីកន្លែងដែលក្រុមជនភៀសខ្លួនគ្រោងចេញបង្ហាញខ្លួន ហេតុនេះក្រុមការងារសិទ្ធិមនុស្សបានធ្វើដំណើរទៅទីនោះ ហើយប្រទះឃើញពួកគេបង្ហាញខ្លួន។ លោកស្រីបន្តថា ក្រុមការងារសិទ្ធិមនុស្សបានផ្តល់ព័ត៌មានជូនអាជ្ញាធរខេត្ត និងមន្ត្រីនាយកដ្ឋានជនភៀសខ្លួននៃអគ្គនាយកដ្ឋានអន្តោប្រវេសន៍ក្រសួងមហាផ្ទៃ ដើម្បីសហការទទួលយកជនភៀសខ្លួនមកកាន់ក្រុងបានលុង ក៏ប៉ុន្តែមិនមានការសម្រេចជាក់លាក់ណាមួយរបស់មន្ត្រីពាក់ព័ន្ធទាំងនោះទេ។
លោកស្រីបន្តថា ក្រុមការងារសិទ្ធិមនុស្សបានសម្រេចដឹកជញ្ជូនជនភៀសខ្លួនទាំង ៨នាក់មកស្នងការដ្ឋានប៉ូលិសខេត្តបន្ទាប់ពីរង់ចាំការសម្រេចរបស់អាជ្ញាធរខេត្តប្រមាណ ៤ម៉ោងមិនបានលទ្ធផល៖ «ខ្ញុំពេលរកឃើញពួកគាត់ភ្លាមគឺបានរាយការណ៍ទៅឲ្យអាជ្ញាធរអស់ហើយ ហើយបើអាជ្ញាធរគាត់ថាបែបណា ឬយកគាត់ទៅណានោះ ខ្ញុំក៏នឹងសហការជាមួយគ្នា»។
ក្រុមការងារឧត្តមស្នងការអង្គការសហប្រជាជាតិពីរក្រុម គឺក្រុមទទួលបន្ទុកសិទ្ធិមនុស្ស (UNOHCHR) និងក្រុមទទួលបន្ទុកជនភៀសខ្លួន (UNHCR) រួមទាំងមន្ត្រីប៉ូលិសនាយកដ្ឋានជនភៀសខ្លួនក្រសួងមហាផ្ទៃ បានមកដល់ខេត្តរតនគិរី កាលពីចុងសប្តាហ៍មុនក្នុងគោលបំណងសហការជាមួយអាជ្ញាធរខេត្តរតនគិរី ជួយសង្គ្រោះជនភៀសខ្លួនវៀតណាម ១៣នាក់ ដែលបានភៀសខ្លួនចេញពីប្រទេសវៀតណាម តាំងពីចុងខែវិច្ឆិកា ដើម្បីស្វែងរកសិទ្ធិជ្រកកោនផ្នែកនយោបាយនៅប្រទេសកម្ពុជា។
ទាក់ទិនករណីនេះដែរ មន្ត្រីសម្របសម្រួលសមាគមអាដហុក (Adhoc) ខេត្តរតនគិរី លោក ឆាយ ធី កត់សំគាល់ថា បន្ទាប់ពីជនភៀសខ្លួន ៨នាក់ត្រូវបានបញ្ជូនមកស្នងការដ្ឋានប៉ូលិសខេត្ត មន្ត្រីប៉ូលិសបានសហការធ្វើកំណត់ហេតុជនភៀសខ្លួននៅស្នងការប៉ូលិស។ លោកបន្តថា នៅសល់ជនភៀសខ្លួនមួយក្រុមទៀតមានគ្នា ៥នាក់ ត្រូវបានក្រុមការងារអង្គការសហប្រជាជាតិចុះសង្គ្រោះនៅរសៀលថ្ងៃដដែលនៅចំណុចឃុំបរខាំ ស្រុកអូរយ៉ាដាវ ក៏ប៉ុន្តែក្រុមការងារមិនអាចស្វែងរកពួកគេឃើញរហូតដល់វេលាយប់ទើបក្រុមជនភៀសខ្លួនចេញពីព្រៃ ហើយត្រូវសមត្ថកិច្ចប៉ូលិសដែលដាក់ឃ្លាំមើលនៅតំបន់នោះរកឃើញ និងនាំមកកាន់ស្នងការដ្ឋានប៉ូលិសខេត្ត៖ «ទាំងព្រឹកមិញនិងយប់នេះគឺមានចំនួន ១៣នាក់ ហើយការរកឃើញក្រុមទាំងពីរនេះនៅតំបន់ផ្សេងគ្នា ឆ្ងាយពីគ្នា។ រីឯការរកឃើញយប់នេះគឺនៅតំបន់ឃុំបរកែវ ស្រុកអូរយ៉ាដាវ»។
ស្នងការរងប៉ូលិសខេត្តរតនគិរី ទទួលបន្ទុកការងារអន្តោប្រវេសន៍លោក ជា ប៊ុនធឿន មានប្រសាសន៍បញ្ជាក់ថា អាជ្ញាធរបានប្រគល់ម៉ុងតាញ៉ា ទាំង ១៣នាក់ ទៅឲ្យមន្ត្រីអង្គការសហប្រជាជាតិនាំទៅរក្សាទុកនៅសណ្ឋាគារមួយក្នុងខេត្តរតនគិរី បន្ទាប់ពីធ្វើកំណត់ហេតុសាកសួររួចរាល់នៅម៉ោងប្រមាណ ៩យប់ ថ្ងៃទី២០ ខែធ្នូ។
ជនភៀសខ្លួនទាំង ១៣នាក់ ដែលបានសង្គ្រោះពីព្រៃខ្លះអះអាងថា ពួកគេមានជំងឺរាក និងគ្រុនចាញ់ ក៏ប៉ុន្តែពួកគេរីករាយបន្ទាប់ពីបានសង្គ្រោះដោយអង្គការសហប្រជាជាតិ៖ «ពួកខ្ញុំមកទីនោះមិនមានអ្នកណាហៅ ឬអូសទាញទេ ពួកខ្ញុំមកដើម្បីស្វែងរកអង្គការអន្តរជាតិជួយបញ្ជូនពួកខ្ញុំទីណាក៏បានចៀសវាងបញ្ជូនទៅវៀតណាមខ្លាចនគរបាលវាយធ្វើបាប»។
តាមការគ្រោងទុកក្រុមការងារអង្គការសហប្រជាជាតិនឹងដឹកជញ្ជូនជនភៀសខ្លួនទាំង ១៣នាក់មករាជធានីភ្នំពេញ នៅថ្ងៃអាទិត្យ ទី២១ ខែធ្នូ ដើម្បីសម្ភាសន៍៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។