អ្នក​កាសែត​ជាតិ​និង​អន្តរជាតិ​រង​របួស​ដោយ​កម្លាំង​សន្តិសុខ​វាយ​ក្នុង​យុទ្ធនាការ​បោះ​ឆ្នោត

0:00 / 0:00

មេ​ដឹក​នាំ​គណបក្ស​សង្គ្រោះ​ជាតិ បាន​ដឹក​នាំ​ការ​ហែ​ក្បួន​ធំ​១​ក្នុង​រាជធានី​ភ្នំពេញ នៅ​ថ្ងៃ​ដំបូង​នៃ​យុទ្ធនាការ​ឃោសនា​បោះ​ឆ្នោត​ក្រុម​ប្រឹក្សា​រាជធានី​ខេត្ត ក្រុង ស្រុក ខណ្ឌ។

ក្បួន​ដង្ហែ​ទី​១​បាន​ចេញ​ពី​ទីស្នាក់ការ​គណបក្ស​ក្នុង​សង្កាត់​ចាក់អង្រែលើ ហើយ​មក​ជួប​ក្បួន​មួយ​ទៀត​នៅ​ខាង​មុខ​ស្ថានទូត​អាមេរិក និង​ផ្ទះ​លោក​នាយក​រដ្ឋមន្ត្រី ហ៊ុន សែន ឆ្ពោះ​ទៅ​ព្រះបរមរាជវាំង។ ក្នុង​ការ​ហែ​ក្បួន​នេះ អាជ្ញាធរ​បាន​ដាក់​ពង្រាយ​កម្លាំង​ចម្រុះ ហើយ​បាន​វាយ​មនុស្ស​មួយ​ចំនួន​ដែល​មាន​ទាំង​ព្រះសង្ឃ និង​អ្នក​កាសែត​ឲ្យ​របួស។

សូម​ស្ដាប់​លោក ម៉ម មុនីរតន៍ រាយការណ៍​ផ្ទាល់​ពី​ស្ថានភាព​នេះ៖

លីកាដូ​ថ្កោលទោស​ចំពោះ​ការ​ប្រើ​ហិង្សា​លើ​អ្នក​កាសែត​ជាតិ​អន្តរជាតិ​មន្ត្រី​បក្ស​ប្រឆាំង​និង​ព្រះសង្ឃ

ដោយ ម៉ៅ សុធានី

មន្ត្រី​អង្គការ​សិទ្ធិ​មនុស្ស​លីកាដូ (Licadho) បាន​ថ្កោលទោស​ចំពោះ​ការ​ប្រើ​ហិង្សា​របស់​កង​កម្លាំង​សន្តិសុខ​របស់​រដ្ឋាភិបាល លើ​អ្នក​កាសែត​ជាតិ អន្តរជាតិ មន្ត្រី​គណបក្ស​សង្គ្រោះ​ជាតិ ព្រម​ទាំង​ព្រះសង្ឃ ឲ្យ​រង​របួស​ក្នុង​ពេល​ដែល​ចូល​រួម​សង្កេត​ការណ៍ និង​ចូល​រួម​ការ​ហែ​ក្បួន​ឃោសនា​បោះ​ឆ្នោត​របស់​គណបក្ស​សង្គ្រោះ​ជាតិ នៅ​ថ្ងៃ​ដំបូង​នៃ​យុទ្ធនាការ​ឃោសនា​បោះ​ឆ្នោត​ក្រុម​ប្រឹក្សា​រាជធានី ខេត្ត ក្រុង ស្រុក ខណ្ឌ កាល​ពី​ថ្ងៃ​សុក្រ ម្សិលមិញ។

មន្ត្រី​ស៊ើប​អង្កេត​នៃ​អង្គការ​លីកាដូ លោក អំ សំអាត ដែល​បាន​ចុះ​ទៅ​សង្កេត​ការណ៍​ដោយ​ផ្ទាល់ បាន​មាន​ប្រសាសន៍​កាល​ពី​យប់​មិញ​តាម​ទូរស័ព្ទ​ថា សកម្មភាព​របស់​អាជ្ញាធរ​នេះ គឺ​ជា​ការ​រំលោភ​សិទ្ធិ​មនុស្ស​យ៉ាង​ធ្ងន់ធ្ងរ៖ «រឿង​នេះ​យើង​មិន​អាច​ទទួល​យក​បាន​ទេ​នូវ​ការ​ប្រើប្រាស់​អំពើ​ហិង្សា​ទៅ​លើ​អ្នក​ឃោសនា​បោះ​ឆ្នោត និង​ក្រុម​ដែល​ចូល​រួម​ឃោសនា​បោះ​ឆ្នោត ពីព្រោះ​នេះ​ជា​សិទ្ធិ​សេរីភាព​របស់​គណបក្ស​នយោបាយ។ ប៉ុន្តែ​អ្វី​ដែល​ខ្ញុំ​សង្កេត​ឃើញ គឺ​ក្រុម​សន្តិសុខ​របស់​សាលា​ខណ្ឌ​ដូនពេញ នេះ គេ​តែង​ប្រើប្រាស់​អំពើ​ហិង្សា​ដែល​ទង្វើ​នេះ គឺ​ជា​ការ​រំលោភ​សិទ្ធិ​សេរីភាព​ធ្ងន់ធ្ងរ»

លោក អំ សំអាត បន្ត​ថា ក្នុង​ចំណោម​អ្នក​រង​របួស​នោះ គឺ​មាន​ព្រះសង្ឃ​ព្រះនាម លួន សូវ៉ាត និង​អ្នក​កាសែត​មួយ​រូប​របស់​វិទ្យុ​សំឡេង​ប្រជាធិបតេយ្យ (Voice of Democracy = VOD) នៃ​មជ្ឈមណ្ឌល​កម្ពុជា ដែល​បាន​ចុះ​ទៅ​យក​ព័ត៌មាន​ផ្ទាល់​នៅ​នឹង​កន្លែង៖ «អង្គការ​លីកាដូ យើង​បាន​ទទួល​ជន​រងគ្រោះ​ផ្តល់​ការ​ព្យាបាល​ដែល​រង​របួស​ក្បាល។ មាន​អ្នក​កាសែត​វីអូឌី មាន​ជន​បរទេស​មួយ​ទៀត​ដែល​ត្រូវ​បាន​វាយ​ដំ និង​ព្រះតេជព្រះគុណ លួន សូវ៉ាត ក៏​ត្រូវ​រង​ការ​វាយ​ដំ​ផង​ដែរ»

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖

ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។