អ្នករាយការណ៍ពិសេសអង្គការសហប្រជាជាតិទទួលបន្ទុកសិទ្ធិមនុស្សប្រចាំកម្ពុជា សម្តែងការបារម្ភពីការវាយដំលើតំណាងរាស្ត្របក្សប្រឆាំងក្នុងពេលកន្លងមក។ ការបារម្ភនេះ ធ្វើឡើងក្នុងជំនួបជាមួយប្រធានស្តីទីរដ្ឋសភា លោក ងួន ញិល កាលពីថ្ងៃទី២២ ខែមីនា។
ការធានាដល់សន្តិសុខសុវត្ថិភាពរបស់តំណាងរាស្ត្របក្សប្រឆាំង គឺជាប្រធានបទសំខាន់មួយក្នុងចំណោមប្រធានបទដទៃទៀត ដែលអ្នករាយការណ៍ពិសេសអង្គការសហប្រជាជាតិ ទទួលបន្ទុកសិទ្ធិមនុស្សប្រចាំកម្ពុជា អ្នកស្រី រ៉ូណា ស្មីត (Rhona Smith) បានលើកឡើង ជាមួយថ្នាក់ដឹកនាំរដ្ឋសភា ក្នុងថ្ងៃទី២ នៃដំណើរទស្សនកិច្ចរបស់អ្នកស្រី មកកាន់កម្ពុជា។
សេចក្តីប្រកាសព័ត៌មាននៅលើទំព័រហ្វេសប៊ុក (Facebook) ផ្លូវការរបស់ការិយាល័យ ឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្សប្រចាំកម្ពុជា ឲ្យដឹងថា ក្នុងជំនួប នោះ អ្នកស្រី រ៉ូណា ស្មីត ទទូចឲ្យកម្ពុជាធានាយ៉ាងណាអាចឲ្យតំណាងរាស្ត្របក្សប្រឆាំង២រូប គឺលោក ញ៉យ ចំរើន និងលោក គង់ សភា ដែលត្រូវបានបាតុករវាយឲ្យរបួស អនុវត្តការងារជាតំណាងរាស្ត្ររបស់ពួកគេដោយសេរី និងសុវត្ថិភាព។
អ្នកនាំពាក្យគណបក្សសង្គ្រោះជាតិ លោក សុខ ឥសាន ដែលចូលរួមក្នុងជំនួបជាមួយអ្នកស្រី រ៉ូណា ស្មីត ដែរនោះទទួលស្គាល់ថា អ្នកស្រី រ៉ូណា ស្មីត ពិតជាលើកឡើងពីសុវត្ថិភាពរបស់ តំណាងរាស្ត្របក្សប្រឆាំងមែន។ លោក សុខ ឥសាន ថា ប្រធានស្តីទីរដ្ឋសភា លោក ងួន ញិល បានឆ្លើយតបដោយលើកឡើងថារដ្ឋសភាបានសុំអន្តរាគមន៍ពីសមត្ថកិច្ចពាក់ព័ន្ធ ដើម្បីការពារតំណាងរាស្ត្ររួចហើយ ដើម្បីធានាថា តំណាងរាស្ត្រគ្រប់រូបអាចបំពេញការងារ ដោយមិនមានការភ័យខ្លាច៖ «គាត់សាកសួរ មុនដំបូងពីស្ថានភាពអ្នកតំណាងរាស្ត្រ២រូបដែលទទួលអំពើហិង្សា អញ្ចឹងទេ ឯកឧត្តម ងួន ញិល បានលើកឡើងថា រដ្ឋសភា ក៏ដូចជារដ្ឋាភិបាល និងគណបក្សកាន់អំណាច មិនគាំទ្រអំពើហិង្សាចំពោះអ្នកតំណាងរាស្ត្រទេ ហើយក៏បានអំពាវនាវឲ្យចាត់វិធានការ តាមផ្លូវច្បាប់ ហើយបច្ចុប្បន្ននេះយើងបានចាត់វិធានការតាមផ្លូវច្បាប់ហើយ និងបន្តដំណើរការ តទៅទៀតដើម្បីនាំជនល្មើស យកមកអនុវត្តតាមផ្លូវច្បាប់ឲ្យស្របតាមទោសរបស់ខ្លួន ដែលបាន ប្រព្រឹត្តចំពោះអ្នកតំណាងរាស្ត្រ»។
ការបារម្ភចំពោះស្ថានភាពរបស់តំណាងរាស្ត្របក្សប្រឆាំង មិនមែនជារឿងថ្មីឡើយសម្រាប់ អ្នកស្រី រ៉ូណា ស្មីត។ ភ្លាមៗក្រោយពីលោក ញ៉យ ចំរើន និងលោក គង់ សភា ត្រូវបានបាតុករ វាយឲ្យរបួស និងលោក សម រង្ស៊ី ប្រធានគណបក្សសង្គ្រោះជាតិ ត្រូវបានតុលាការចេញដីកាចាប់ខ្លួន អ្នកស្រីក៏បានចេញសេចក្តីប្រកាសសម្ដែងការព្រួយបារម្ភម្ដងរួចហើយ។
ក្រៅពីបញ្ហាសន្តិសុខសម្រាប់តំណាងរាស្ត្របក្សប្រឆាំង អ្នកស្រី រ៉ូណា ស្មីត ក៏បានលើក ឡើងពីនីតិវិធីនៃការដកអភ័យឯកសិទ្ធិសភារបស់តំណាងរាស្ត្រ និងពីសេចក្តីព្រាងច្បាប់ស្តីពី សហជីពដែលសភាគ្រោងនឹងបោះឆ្នោតអនុម័តក្នុងពេលខាងមុខ។ ទាក់ទងនឹងការបង្កើតឲ្យ មានច្បាប់ថ្មីៗ អ្នកស្រីស្នើឲ្យមានការបោះពុម្ពផ្សាយសេចក្តីព្រាងច្បាប់ ដើម្បីបង្កើតឲ្យមានការ ពិគ្រោះយោបល់ជាមួយភាគីពាក់ព័ន្ធជាមុន មុនពេលសភាយកទៅពិភាក្សាអនុម័ត។
ក្រៅពីមានជំនួបជាមួយ លោក ងួន ញិល នៅថ្ងៃទី២២ មីនា ដដែលនោះ អ្នកស្រី រ៉ូណា ស្មីត ក៏បានជួបប្រជុំជាមួយរដ្ឋមន្ត្រីក្រសួងយុត្តិធម៌ លោក អង្គ វង្សវឌ្ឍានា រដ្ឋមន្ត្រីក្រសួងវប្បធម៌ និងវិចិត្រសិល្បៈ អ្នកស្រី ភឿង សកុណា និងរដ្ឋមន្ត្រីក្រសួងបរិស្ថាន លោក សាយ សំអាល។ ក្នុងជំនួបទាំងនេះ អ្នកស្រីបានលើកឡើងពីបញ្ហាមួយចំនួនដូចជា ឯករាជ្យភាពរបស់តុលាការ យន្តការឃុំខ្លួនបណ្តោះអាសន្ន អំពើហិង្សាក្នុងគ្រួសារ ការជួញដូរមនុស្ស ជម្លោះដីធ្លី ការរក្សា វប្បធម៌ជនជាតិដើម និងការបង្កើនការចូលរួមរបស់ស្ត្រី និងជនជាតិដើមភាគតិចនៅក្នុងសភា ជាដើម។
ដោយឡែក នៅថ្ងៃទី២៣ មីនា អ្នកស្រី រ៉ូណា ស្មីត គ្រោងនឹងជួបប្រជុំជាមួយប្រធានគណៈកម្មការសិទ្ធិមនុស្ស ទទួលពាក្យបណ្តឹង ឬគណៈកម្មការទី១ នៃរដ្ឋសភា លោក អេង ឆៃអ៊ាង ផងដែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។