ជនភៀសខ្លួន​រ៉ូហ៊ីងយ៉ា​១​រូប​នឹង​ចេញ​ពី​កម្ពុជា​នៅ​ថ្ងៃ​១១ តុលា

0:00 / 0:00

មន្ត្រី​រដ្ឋាភិបាល​អះអាង​ថា ជនភៀសខ្លួន​រ៉ូហ៊ីងយ៉ា (Rohingya) ដែល​ត្រូវ​បាន​រដ្ឋាភិបាល​អូស្ត្រាលី បញ្ជូន​មក​សុំ​សិទ្ធិ​ជ្រកកោន​នៅ​កម្ពុជា កាល​ពី​ពេល​កន្លង​ទៅ នឹង​ត្រូវ​រដ្ឋាភិបាល​កម្ពុជា បញ្ជូន​ត្រឡប់​ទៅ​កាន់​ប្រទេស​មីយ៉ាន់ម៉ា (Myanmar) វិញ​នៅ​ថ្ងៃ​ទី​១១ ខែ​តុលា តាម​ការ​ស្នើ​សុំ​របស់​ជនភៀសខ្លួន​នោះ។ ក្នុង​ពេល​ជាមួយ​គ្នា មន្ត្រី​រដ្ឋាភិបាល​ឲ្យ​ដឹង​ថា ជនភៀសខ្លួន​រ៉ូហ៊ីងយ៉ា ថ្មី ២​រូប​ទៀត​នៅ​កោះ​ណាវរូ (Nauru) បាន​យល់​ព្រម​មក​រស់​នៅ​ប្រទេស​កម្ពុជា។

អ្នក​នាំ​ពាក្យ​ក្រសួង​មហាផ្ទៃ លោក ខៀវ សុភ័គ ឲ្យ​ដឹង​នៅ​ថ្ងៃ​ទី​១០ ខែ​តុលា ថា រដ្ឋាភិបាល​ប្រទេស​មីយ៉ាន់ម៉ា បាន​ផ្ដល់​លិខិតឆ្លងដែន​ទៅ​ឲ្យ​ជនភៀសខ្លួន​រ៉ូហ៊ីងយ៉ា នោះ​រួច​ហើយ ដើម្បី​ធ្វើ​ដំណើរ​ត្រឡប់​ទៅ​កាន់​ស្រុក​កំណើត​របស់​គេ​នៅ​ទី​នោះ​វិញ។ លោក​បន្ត​ថា ជនភៀសខ្លួន​នោះ​នឹង​ធ្វើ​ដំណើរ​ចាក​ចេញ​ពី​កម្ពុជា នៅ​ថ្ងៃ​ទី​១១ ខែ​តុលា ក្នុង​លក្ខណៈ​ជា​អ្នក​ដំណើរ​ធម្មតា គឺ​មិន​មាន​ការ​ហែហម​ពី​សំណាក់​មន្ត្រី ឬ​អាជ្ញាធរ​រដ្ឋាភិបាល​អ្វី​នោះ​ឡើយ។

​លោក ខៀវ សុភ័គ មាន​ប្រសាសន៍​បន្ត​ថា ក្នុង​ការ​រៀបចំ​បញ្ជូន​ជនភៀសខ្លួន​រ៉ូហ៊ីងយ៉ា ត្រឡប់​ទៅ​មីយ៉ាន់ម៉ា រដ្ឋាភិបាល​កម្ពុជា មិន​មាន​ចំណាយ​ថវិកា​អ្វី​ទាំង​អស់ ហើយ​កម្ពុជា ក៏​មិន​មាន​កញ្ចប់​ថវិកា​សម្រាប់​ឲ្យ​ទៅ​ជនភៀសខ្លួន​នោះ​ដែរ ប៉ុន្តែ​លោក​ថា បើ​មាន​កញ្ចប់​ថវិកា​មែន​នោះ គឺ​អាច​មាន​ពី​រដ្ឋាភិបាល​អូស្ត្រាលី ដែល​រៀបចំ​តាមរយៈ​អង្គការ​ទេសន្តរប្រវេសក៍​អន្តរជាតិ ឬ​ហៅ​កាត់​ថា អាយ.អូ.អ៊ឹម (IOM)។

​រដ្ឋាភិបាល​កម្ពុជា បាន​ទទួល​យក​ជនភៀសខ្លួន​ចំនួន ៤​នាក់ ពី​កោះ​ណាវរូ ឲ្យ​រស់​នៅ​កម្ពុជា តាម​ការ​ស្នើ​សុំ​របស់​រដ្ឋាភិបាល​អូស្ត្រាលី ក្នុង​នោះ ៣​នាក់​ជា​ជនជាតិ​អ៊ីរ៉ង់ (Iran) និង​ម្នាក់​ជា​ជនជាតិ​រ៉ូហ៊ីងយ៉ា មក​ពី​ប្រទេស​មីយ៉ាន់ម៉ា។

លោក ខៀវ សុភ័គ យល់​ឃើញ​ថា ការ​សម្រេចចិត្ត​ចាកចេញ​ពី​កម្ពុជា ​ទៅ​កាន់​ប្រទេស​មីយ៉ាន់ម៉ា វិញ របស់​ជនភៀសខ្លួន​រ៉ូហ៊ីងយ៉ា ពេល​នេះ ដោយសារ​គេ​នឹក​ស្រុក​កំណើត និង​ដោយសារ​កន្លង​មក​គាត់​ជឿ​តាម​អ្នក​ដទៃ​រត់​ចោល​ស្រុក តែ​នៅ​ទីបំផុត​ខក​ចិត្ត​ដោយ​មិន​បាន​ទៅ​រស់​នៅ​ក្នុង​ប្រទេស​អូស្ត្រាលី ដែល​ជា​ប្រទេស​អភិវឌ្ឍន៍​តាម​គោលបំណង​ដែល​គេ​ចង់​បាន​តាំង​ពី​ដើម​មក៖ «គាត់​ទើប​អាយុ​ជាង ២០​ឆ្នាំ គាត់​ឃើញ​គេ​ឃើញ​ឯង​រត់​ទៅ ចេះ​តែ​រត់​ដោយ​តាម​គេ ទៅ​ដល់​ណាវរូ រសាត់​អណ្ដែត ដល់​ហើយ​នឹក​ឃើញ​ខក​ខ្លួន​ដោយសារ​ការ​រត់​ចោល​ស្រុក​កំណើត ហើយ​ដល់​ពេល​ទៅ​មិន​បាន​ទៅ​ដល់​អូស្ត្រាលី បែរ​ជា​ទៅ​កន្លែង​ផ្សេង​ទៅ​ទៀត»

​ស្រប​ពេល​ជាមួយ​គ្នា​នេះ លោក ខៀវ សុភ័គ មាន​ប្រសាសន៍​ថា មាន​ជនភៀសខ្លួន​រ៉ូហ៊ីងយ៉ា ចំនួន ២​រូប​ថ្មី​ទៀត​បាន​យល់​ព្រម​រួច​ហើយ​ថា នឹង​មក​រស់​នៅ​ប្រទេស​កម្ពុជា ដោយ​ស្ម័គ្រ​ចិត្ត។ យ៉ាង​ណា​លោក ខៀវ សុភ័គ មិន​ទាន់​អាច​បញ្ជាក់​ពី​ពេល​វេលា​ពិត​ប្រាកដ​នៃ​ការ​មក​ដល់​របស់​ជនភៀសខ្លួន​រ៉ូហ៊ីងយ៉ា ថ្មី ២​រូប​នេះ​នៅ​ឡើយ។ តែ​លោក​ថា ពួកគេ​នឹង​មក​រស់​នៅ​ជាមួយ​ជនភៀសខ្លួន​ដែល​មក​លើក​មុន៖ «ផ្ទះ​វីឡា​ជួល​មួយ​ល្អ នៅ​ភូមិ​តាងៅ សង្កាត់​និរោធ ខណ្ឌ​មានជ័យ ព្រោះ​កន្លែង​នោះ​ជា​កន្លែង​រៀន​សូត្រ វប្បធម៌​ខ្មែរ ភាសា​ខ្មែរ ឬ​ក៏​ទំនៀម​ទម្លាប់​ខ្មែរ ដើម្បី​ត្រៀម​ចូល​ធ្វើ​សមាហរណកម្ម​ជាមួយ​សង្គម​ខ្មែរ​យើង»

​កាល​ពី​ខែ​កញ្ញា ឆ្នាំ​២០១៤ រដ្ឋាភិបាល​កម្ពុជា បាន​ចុះ​កិច្ច​ព្រមព្រៀង​ជាមួយ​រដ្ឋាភិបាល​អូស្ត្រាលី ក្នុង​ការ​ទទួល​យក​ជន​ភៀសខ្លួន​ដែល​ទៅ​សុំ​សិទ្ធិ​ជ្រកកោន​នៅ​អូស្ត្រាលី មក​រស់​នៅ​កម្ពុជា ជា​ថ្នូរ​នឹង​ទឹក​ប្រាក់​ជំនួយ​ប្រមាណ ៤០​លាន​ដុល្លារ​អូស្ត្រាលី។

យ៉ាង​ណា​ក៏ដោយ​គណបក្ស​ប្រឆាំង និង​សង្គម​ស៊ីវិល​លើក​ឡើង​ថា កម្ពុជា​នៅ​មិន​ទាន់​មាន​លក្ខណៈ​គ្រប់គ្រាន់​ក្នុង​ការ​ទទួល​យក​ជនភៀសខ្លួន​ពី​អូស្ត្រាលី បាន​នៅ​ឡើយ ដោយ​ពួកគេ​លើក​ឡើង​ថា កម្ពុជា​មិន​ទាន់​អាច​ដោះស្រាយ​បញ្ហា​ពលរដ្ឋ​របស់​ខ្លួន​បាន​នៅ​ឡើយ ក្នុង​នោះ​រួម​មាន​បញ្ហា​រំលោភ​សិទ្ធិ​មនុស្ស និង​ការ​រំលោភ​បំពាន​ដីធ្លី​ជាដើម។

មន្ត្រី​ការពារ​សិទ្ធិមនុស្ស​អង្គការ​លីកាដូ (LICADHO) លោក អំ សំអាត មាន​ប្រសាសន៍​ថា លោក​នៅ​តែ​បារម្ភ​ចំពោះ​ការ​សម្រេច​ចិត្ត​របស់​កម្ពុជា ក្នុង​ការ​ទទួល​យក​ជន​ភៀសខ្លួន​ថ្មី​ទៀត​ពី​កោះ​ណាវរូ ខណៈ​ដែល​ជនភៀសខ្លួន​ចាស់​មិន​ទាន់​ត្រូវ​បាន​រៀបចំ​ឲ្យ​បាន​ស្រួលបួល​នៅ​ឡើយ។ លោក អំ សំអាត យល់​ឃើញ​ថា ជនភៀសខ្លួន​ដែល​មក​មុន​អាច​ជួប​ការ​លំបាក​ពេល​រស់​នៅ​កម្ពុជា ទើប​មាន​ជនភៀសខ្លួន​ម្នាក់​ក្នុង​ចំណោម​ពួកគេ​សម្រេច​ចិត្ត​ស្នើសុំ​ត្រឡប់​ទៅ​ប្រទេស​ដើម​វិញ។ លោក​ថា រដ្ឋាភិបាល​គួរ​ពិនិត្យ​បញ្ហា​នេះ​ឲ្យ​ដិតដល់​ជា​មុន​សិន៖ «យើង​បារម្ភ​ថា អាច​ជន ២​នាក់​ហ្នឹង​មក ជួនកាល​គាត់​អាច​នឹង​សុំ​វិល​ត្រឡប់​ទៅ​ប្រទេស​គាត់​វិញ​ក៏​ថា​បាន ព្រោះ​មួយ​សុំ​ត្រឡប់​ទៅ​វិញ ខណៈ ២​សុំ​មក»

លោក អំ សំអាត មាន​ប្រសាសន៍​ថា ក្នុង​ការ​ទទួលយក​ជន​ភៀសខ្លួន​ពី​កោះ​ណាវរូ នេះ កម្ពុជា​អាច​ប្រឈម​នឹង​បញ្ហា​ជា​ច្រើន មាន​ដូចជា​ការ​ស្វែង​រក​កន្លែង​ស្នាក់នៅ​សម្រាប់​ពួកគេ ការ​ផ្ដល់​នូវ​ទី​ជម្រក មុខ​របរ និង​ការ​គោរព​សិទ្ធិ​សេរីភាព​របស់​ពួកគេ។

លោក អំ សំអាត ក៏​បាន​រិះគន់​​ទៅ​លើ​រដ្ឋាភិបាល​កម្ពុជា ដែល​បាន​យក​ចិត្ត​ទុក​ដាក់​ចំពោះតែ​ជនភៀសខ្លួន​ដែល​ស្នើ​ដោយ​អូស្ត្រាលី តែ​បែរ​ជា​ព្រងើយកន្តើយ​ចំពោះ​ជនជាតិ​ភាគ​តិច​ម៉ុងតាញ៉ា​វៀតណាម ដែល​កំពុងតែ​មក​ស្វែង​រក​សិទ្ធិ​ជ្រកកោន​នៅ​កម្ពុជា ហើយ​ត្រូវ​បាន​អាជ្ញាធរ​កម្ពុជា បញ្ជូន​ត្រឡប់​ទៅ​កាន់​ប្រទេស​វៀតណាម​វិញ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖

ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។