Opens in new windowមន្ត្រីរដ្ឋាភិបាលបញ្ជាក់ជាថ្មីថា ជនភៀសខ្លួនស្ម័គ្រចិត្ត ២នាក់ទៀតនៅកោះណាវរូ (Nauru) នឹងមកដល់កម្ពុជា ក្នុងពេលឆាប់ៗនេះ។ ជនភៀសខ្លួនទាំងពីរ គឺជាជនជាតិរ៉ូហ៊ីងយ៉ា (Rohingya) ដែលភៀសខ្លួនចេញពីប្រទេសមីយ៉ាន់ម៉ា ដើម្បីសុំសិទ្ធិជ្រកកោននៅប្រទេសអូស្ត្រាលី។ ជនជាតិរ៉ូហ៊ីងយ៉ា ទាំងពីរ នឹងមកដល់កម្ពុជា គឺនៅក្រោយពេលដែលជនភៀសខ្លួនរ៉ូហ៊ីងយ៉ា ម្នាក់ ទើបតែត្រូវបានបញ្ជូនទៅប្រទេសមីយ៉ាន់ម៉ា វិញ។
មន្ត្រីនាំពាក្យក្រសួងមហាផ្ទៃ លោក ខៀវ សុភ័គ ឲ្យដឹងនៅថ្ងៃទី១៣ ខែតុលា ថា ជនភៀសខ្លួនរ៉ូហ៊ីងយ៉ា ចំនួន ២រូប នឹងមកដល់កម្ពុជា នាពេលឆាប់ៗខាងមុខ ក្រោយពីបានព្រមព្រៀងតាមគោលការណ៍ស្ម័គ្រចិត្តនោះ។ លោក ខៀវ សុភ័គ ឲ្យដឹងថា ជនភៀសខ្លួនទាំងពីររូប នឹងត្រូវស្នាក់នៅផ្ទះវីឡាជួលមួយកន្លែង ស្ថិតនៅភូមិតាងៅ សង្កាត់និរោធ ខណ្ឌច្បារអំពៅ ជាកន្លែងដែលជនភៀសខ្លួនអ៊ីរ៉ង់ ៣នាក់ផ្សេងទៀតកំពុងរស់នៅ។ លោក ខៀវ សុភ័គ បញ្ជាក់ថា ការស្នាក់នៅផ្ទះវីឡាមួយកន្លែងនេះ គឺដើម្បីឲ្យពួកគេទាំងពីរនាក់ រៀនភាសា វប្បធម៌ និងទំនៀមទម្លាប់ខ្មែរ មុននឹងធ្វើសមាហរណកម្មចូលក្នុងសង្គមខ្មែរ។
លោក ខៀវ សុភ័គ ឲ្យដឹងបន្តថា ភាគីអូស្ត្រាលី ជាអ្នករ៉ាប់រងការចំណាយរបស់ជនភៀសខ្លួនរ៉ូហ៊ីងយ៉ា ទាំងពីរនាក់។ យ៉ាងណានេះក្ដី អ្នកនាំពាក្យក្រសួងមហាផ្ទៃ រូបនេះ មិនបានបញ្ជាក់ពីពេលវេលាពិតប្រាកដនៃការមកដល់របស់ជនជាតិរ៉ូហ៊ីងយ៉ា ទាំងពីរនាក់នោះទេ។
ទាក់ទងនឹងការទទួលយកជនភៀសខ្លួនថ្មីពីកោះណាវរូ នេះ គណបក្សប្រឆាំង រួមទាំងមន្ត្រីអង្គការសង្គមស៊ីវិលផ្នែកសិទ្ធិមនុស្ស មិនបានសាទរឡើយ ដោយពួកគេគិតថា កម្ពុជា នៅមានចំណុចកែលំអជាច្រើនទៀត មុននឹងឈានដល់កិច្ចព្រមព្រៀងទទួលយកជនភៀសខ្លួនពីប្រទេសដទៃ។
អ្នកនាំពាក្យគណបក្សសង្គ្រោះជាតិ លោក យ៉ែម បុញ្ញឫទ្ធិ បង្ហាញជំហរមិនគាំទ្រឡើយចំពោះការទទួលយកជនភៀសខ្លួនបន្ថែម។ លោកបញ្ជាក់ហេតុផលថា វាមិនមែនជាការប្រកាន់ ឬរើសអើងជាតិសាសន៍ដទៃឡើយ ប៉ុន្តែកម្ពុជា គប្បីដោះស្រាយបញ្ហាចោទមួយចំនួនជាមុនសិន ដូចជាការគោរពសិទ្ធិមនុស្ស ប្រព័ន្ធយុត្តិធម៌ បញ្ហានីតិរដ្ឋ និងបញ្ហាសេដ្ឋកិច្ច ជាដើម៖ «យើងគួររៀបចំសិក្សាឲ្យបានច្បាស់លាស់ជាមុនសិន ថាតើប្រទេសកម្ពុជា យើងមានលក្ខណៈសម្បត្តិគ្រប់គ្រាន់ក្នុងការទទួលយកជនភៀសខ្លួនហើយឬនៅ? នេះជាចំណុចទីមួយ។ ទីពីរ ត្រូវមានយន្តការច្បាស់លាស់ ដោយសហការជាមួយអង្គការ យូ.អិន.អេច្ឆ.ស៊ី.អ (UNHCR) ដើម្បីពិនិត្យក្នុងការទទួលយកជនភៀសខ្លួន»។
ចំណែក លោក មឿន តុលា ប្រធានកម្មវិធីសិទ្ធិការងារនៃមជ្ឈមណ្ឌលអប់រំច្បាប់សម្រាប់សហគមន៍ យល់ឃើញថា កម្ពុជា មិនទាន់មានសមត្ថភាពគ្រប់គ្រាន់ក្នុងការបំពេញតម្រូវការរបស់ជនភៀសខ្លួននៅឡើយ។ លោកបញ្ជាក់ថា កម្ពុជា មានចំណាត់ថ្នាក់មិនល្អអំពីរឿងសិទ្ធិមនុស្ស ដីធ្លី និងប្រព័ន្ធយុត្តិធម៌ ដែលទាំងនេះគួរតែជាបញ្ហាអាទិភាពរបស់រាជរដ្ឋាភិបាលក្នុងការដោះស្រាយ៖ «បើសម្រាប់ពួកយើងវិញ យល់ឃើញថា កម្ពុជា អត់ទាន់មានសមត្ថភាពគ្រប់គ្រាន់ក្នុងការផ្តល់នូវអ្វីដែលជនភៀសខ្លួនទាំងនោះចង់បាននោះទេ។ ជាក់ស្តែង គឺយើងមានការរំលោភសិទ្ធិមនុស្សធ្ងន់ធ្ងរនៅក្នុងរបាយការណ៍អន្តរជាតិ»។
កន្លងមក រាជរដ្ឋាភិបាលកម្ពុជា បានទទួលយកជនភៀសខ្លួនចំនួន ៤នាក់ពីកោះណាវរូ ឲ្យមករស់នៅកម្ពុជា តាមការស្នើសុំរបស់រដ្ឋាភិបាលអូស្ត្រាលី ក្នុងនោះ ៣នាក់ជាជនជាតិអ៊ីរ៉ង់ (Iran) និងម្នាក់ជាជនជាតិរ៉ូហ៊ីងយ៉ា មកពីប្រទេសមីយ៉ាន់ម៉ា។ ជនភៀសខ្លួនរ៉ូហ៊ីងយ៉ា ម្នាក់នោះ បានសម្រេចចិត្តវិលត្រឡប់ទៅប្រទេសកំណើតវិញកាលពីថ្ងៃទី១១ ខែតុលា បន្ទាប់ពីទទួលបានលិខិតឆ្លងដែនពីរដ្ឋាភិបាលមីយ៉ាន់ម៉ា។
ប្រធានកម្មវិធីសិទ្ធិការងារ នៃមជ្ឈមណ្ឌលអប់រំច្បាប់សម្រាប់សហគមន៍ លោក មឿន តុលា សម្ដែងការព្រួយបារម្ភថា អនាគតរបស់ជនភៀសខ្លួនជនជាតិរ៉ូហ៊ីងយ៉ា ទាំងពីរនាក់ អាចនឹងដូចគ្នាទៅនឹងជនភៀសខ្លួនរ៉ូហ៊ីងយ៉ា ម្នាក់ដែលទើបត្រឡប់ទៅមីយ៉ាន់ម៉ា វិញ៖ «វាជាចំណុចមួយដែលយើងដាក់ជាសំណួរដែរ ថាតើហេតុអ្វី បានជាគាត់សម្រេចចិត្តត្រឡប់ទៅស្រុកកំណើតរបស់គាត់វិញ? ពីព្រោះធម្មតា កាលណាគាត់លួចរត់ចេញពីប្រទេសហ្នឹងហើយ តែងតែមានព័ត៌មានចុះផ្សាយទូទាំងពិភពលោក។ ពួកគាត់អាចនឹងទទួលរងនូវសម្ពាធណាមួយ នៅពេលដែលគាត់ត្រឡប់ទៅវិញ។ យើងក៏មានការសង្ស័យដែរថា ជនភៀសខ្លួនមកពីអូស្ត្រាលី ពីរនាក់ទៀត អាចនឹងសម្រេចចិត្តត្រឡប់ទៅប្រទេសខ្លួនឯងវិញ បន្ទាប់ពីមកកម្ពុជា មួយរយៈ»។
កាលពីខែកញ្ញា ឆ្នាំ២០១៤ រដ្ឋាភិបាលកម្ពុជា បានចុះកិច្ចព្រមព្រៀងជាមួយរដ្ឋាភិបាលអូស្ត្រាលី ក្នុងការទទួលយកជនភៀសខ្លួនដែលទៅសុំសិទ្ធិជ្រកកោននៅអូស្ត្រាលី មករស់នៅកម្ពុជា ជាថ្នូរនឹងទឹកប្រាក់ជំនួយប្រមាណ ៤០លានដុល្លារអូស្ត្រាលី៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។