ប្រធានការិយាល័យប្រឆាំងការជួញដូរមនុស្ស និងការពារអនីតិជន ខេត្តកោះកុង លោក ស្រី ធុច បានថ្លែងនៅថ្ងៃទី២៥ មេសា ថា ក្រុមការងាររបស់លោកបានឃាត់ខ្លួនពលរដ្ឋចំនួន ២ថ្ងៃជាប់គ្នា គឺថ្ងៃទី២៤ បាន ១៣នាក់ មកពីខេត្តកំពត ហើយថ្ងៃ២៥ មេសា ឃាត់បាន ១៥នាក់ទៀតមកពីខេត្តព្រៃវែង។ ពួកគេប៉ុនប៉ងលួចឆ្លងចូលតាមចំណុចផែអូប័រ បាក់ខ្លង ឃុំស្មាច់មានជ័យ ក្រុងខេមរភូមិន្ទ និងចំណុចមួយទៀតឆ្លងស្ពានចូលទៅជួបជុំគ្នានៅក្នុងវត្តមួយ ដែលស្ថិតនៅក្នុងស្រុកមណ្ឌលសីមា ខេត្តកោះកុង ដើម្បីឆ្ពោះទៅធ្វើការ និងស៊ីឈ្នួលនេសាទនៅប្រទេសថៃ។
លោក ស្រី ធុច៖ «គោលបំណងយើងទប់ស្កាត់កុំឲ្យមានគ្រោះថ្នាក់ ព្រោះគាត់ទៅកាត់ព្រៃកាត់ផ្សែង កុំឲ្យថា គេចាប់គេចងគេបាញ់គេប្រហារអី វាគ្រោះថ្នាក់ដល់ប្រជាពលរដ្ឋយើង ចេះតែណែនាំធ្វើកិច្ចសន្យាអ៊ីចឹងទៅ ឲ្យគាត់ត្រឡប់ទៅវិញឲ្យគាត់ធ្វើជាស្របច្បាប់កុំឲ្យគេមើលងាយប្រជាពលរដ្ឋយើង»។
លោកបន្តថា អ្នកទាំងអស់នោះ បន្ទាប់ពីបានអប់រំ និងធ្វើកិច្ចសន្យារួចហើយ លោកបានបញ្ជូនឲ្យពួកគេស្នាក់នៅបណ្ដោះអាសន្នក្នុងមណ្ឌលសំចតមួយរបស់មណ្ឌលថែទាំសុខភាពកុមារ មានអក្សរកាត់ថា អេចស៊ីស៊ី(HCC)។
ទាក់ទងបញ្ហានេះ អ្នកសម្របសម្រួលសមាគមអាដហុកខេត្តកោះកុង លោក នាង បូរ៉ាទីណូ បានគាំទ្រនឹងចូលរួមសហការចំពោះចំណាត់ការរបស់អាជ្ញាធរមានសមត្ថកិច្ចនេះ ប៉ុន្តែក៏ទទូចស្នើសុំឲ្យធ្វើការយ៉ាងមានប្រសិទ្ធភាពចំពោះមេខ្យល់ និងអ្នកផ្ដល់មធ្យោបាយនាំប្រជាពលរដ្ឋទៅទឹកដីថៃនោះដែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។