ប្រជាពលរដ្ឋជនជាតិដើមភាគតិចខ្មែររស់នៅតំបន់ជិតព្រំដែនប្រទេសវៀតណាម ក្នុងខេត្តរតនគិរី អះអាងថា មានក្រុមជនភៀសខ្លួនម៉ុងតាញ៉ាវៀតណាម មួយក្រុមថ្មីទៀតបានរត់មកលាក់ខ្លួនក្នុងព្រៃដើម្បីស្វែងរកសិទ្ធិជ្រកកោនផ្នែកនយោបាយនៅកម្ពុជា។ អ្នកភូមិដដែលឲ្យដឹងថា សុវត្ថិភាពជនភៀសខ្លួនថ្មីនេះកំពុងប្រឈមទៅនឹងហានិភ័យនៅឡើយ។
មន្ត្រីឃ្លាំមើលសិទ្ធិមនុស្សប្រចាំខេត្តរតនគិរី សំដែងក្ដីបារម្ភចំពោះសុវត្ថិភាពក្រុមម៉ុងតាញ៉ា មួយក្រុមថ្មីទៀតដែលកំពុងប្រឈមទៅនឹងការតាមចាប់ខ្លួនរបស់អាជ្ញាធរវៀតណាម និងអាជ្ញាធរកម្ពុជា ខណៈពួកគេបានរត់ចេញពីភូមិកំណើតឯប្រទេសវៀតណាមចូលមកក្នុងព្រៃខេត្តរតនគិរី។
មន្ត្រីសម្របសម្រួលសមាគមអាដហុកខេត្តរតនគិរី លោក ឆាយ ធី មានប្រសាសន៍បញ្ជាក់ថា អ្នកភូមិដែលបានជួបប្រទះឃើញជនភៀសខ្លួនទាំង ៩នាក់នោះអះអាងថា ពួកគេកំពុងឋិតក្នុងព្រៃមិនទាន់មានកន្លែងសុវត្ថិភាពលាក់ខ្លួននៅឡើយ ប៉ុន្តែរឿងនេះ បានផ្តល់ព័ត៌មាននេះជូនមន្ត្រីការិយាល័យអង្គការសហប្រជាជាតិទទួលបន្ទុកសិទ្ធិមនុស្សប្រចាំកម្ពុជា រួចហើយ ដើម្បីអន្តរាគមន៍ទៅរដ្ឋាភិបាល និងស្ថាប័នពាក់ព័ន្ធដទៃទៀត៖ «គាត់ឆ្លងចូលចំចំណុចម្ខាងជាប៉ូលិសវៀតណាម ម្ខាងជាប៉ូលិសខ្មែរយើងកំពុងប្រចាំការនៅទីនោះ។ គាត់មិនទាន់មានទីតាំងសុវត្ថិភាពនៅឡើយរហូតមកទល់នឹងពេលនេះប្រឈមនឹងការចាប់ខ្លួន»។
សេចក្ដីរាយការណ៍របស់អ្នកភូមិខ្មែរដែលជួយលាក់បំពួនក្រុមម៉ុងតាញ៉ា ឲ្យដឹងថា ការមកដល់នៃក្រុមថ្មីនេះនាំឲ្យចំនួនអ្នកភៀសខ្លួនពីប្រទេសវៀតណាម ដែលកំពុងលាក់ខ្លួនក្នុងព្រៃខេត្តរតនគិរី កើនឡើងដល់ ៣២នាក់ហើយ។ ចំនួននេះមិនរាប់បញ្ចូលក្រុមម៉ុងតាញ៉ា មួយក្រុមមានគ្នា ៩នាក់រួមមាន សមាជិកប្ដីប្រពន្ធ និងកូនបីនាក់ត្រូវសមត្ថកិច្ចប៉ូលិសចាប់ពីកន្លែងលាក់ខ្លួនកាលពីដើមខែកុម្ភៈ និងសមាជិក ៤នាក់ទៀតរត់រួចពីការចាប់ខ្លួន ហើយត្រូវគេជម្លៀសនាំទៅដល់ក្រុងភ្នំពេញ។ បច្ចុប្បន្នកំពុងឋិតនៅកន្លែងមានសុវត្ថិភាពមួយក្រោមការឃ្លាំមើលពីការិយាល័យសិទ្ធិមនុស្សអង្គការសហប្រជាជាតិ។
អ្នកនាំពាក្យសាលាខេត្តរតនគិរី លោក មឺង ស៊ីនាដ លោកមិនទាន់ទទួលបានព័ត៌មានស្ដីពីជនភៀសខ្លួននេះ ហើយក៏មិនមានសមត្ថកិច្ចប៉ូលិស ឬតម្រួតព្រំដែនរាយការណ៍ពីករណីនេះដែរ៖ «ចាំមើលខ្ញុំសួរទៅខាងសមត្ថកិច្ច ខ្ញុំមើលពីខាងប៉ូលិស ក៏ដូចពីខាងច្រកទ្វារព្រំដែនមិនទាន់បានទទួលនៅឡើយទេ»។
យ៉ាងនេះក្តីអ្នកភូមិកម្ពុជា រស់នៅតំបន់ជាប់ព្រំដែនប្រទេសវៀតណាម សុំមិនបញ្ចេញឈ្មោះរៀបរាប់ថា ស្ត្រីជនជាតិដើមភាគតិចចារ៉ាយខ្មែរមានចម្ការក្នុងព្រៃជ្រៅកាលពីថ្ងៃទី១០ ខែកុម្ភៈ បានប្រទះឃើញម៉ុងតាញ៉ា ៩នាក់ ក្នុងនោះមានម្នាក់ជាស្ត្រីកំពុងលាក់ខ្លួនក្នុងព្រៃ និងសុំជំនួយសង្គ្រោះពីពលរដ្ឋខ្មែររូបនោះជាអ្នកផ្ដល់កន្លែងលាក់បំពួន និងឧបត្ថម្ភស្បៀងអាហារជាពិសេសជួយផ្ដល់ព័ត៌មានទៅអង្គការសិទ្ធិមនុស្សឲ្យជួយអន្តរាគមន៍ស្វែងរកសិទ្ធិជ្រកកោននៅកម្ពុជា ដោយហេតុផលថា ពួកគេជាអ្នកភៀសខ្លួនពីការធ្វើទុក្ខបុកម្នេញផ្នែកជំនឿសាសនា និងសេរីភាពក្នុងការទំនាក់ទំនងតាមប្រព័ន្ធសារអេឡិចត្រូនិកពីអាជ្ញាធរវៀតណាម។ អ្នកភូមិដដែលបន្តថា ស្ត្រីម្ចាស់ចម្ការបដិសេធមិនហ៊ានផ្ដល់ជំនួយសង្គ្រោះដល់ម៉ុងតាញ៉ា ទាំង ៩នាក់នោះទេ ដោយសារតែឃើញមានប៉ូលិសខ្មែរ និងវៀតណាម ត្រូវបានបញ្ជូនទៅកាន់តំបន់នោះកាលពីថ្ងៃទី១០ ខែកុម្ភៈ។
ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ លោក ស ខេង មានប្រសាសន៍ប្រាប់អ្នកកាសែតនៅថ្ងៃទី១០ កុម្ភៈ នារាជធានីភ្នំពេញ ថា ក្នុងពេលតែមួយ កម្ពុជាត្រូវអនុវត្តច្បាប់ពីរ គឺទីមួយ អនុសញ្ញាឆ្នាំ១៩៥១ ស្ដីពីសិទ្ធិជនភៀសខ្លួនដែលកម្ពុជា ជាម្ចាស់ហត្ថលេខី និងទី២ គឺច្បាប់អន្តោប្រវេសន៍របស់កម្ពុជា កាលណាជនទាំងនោះអត់មានឯកសារអ្វីមួយដែលបញ្ជាក់ថា ជាជនភៀសខ្លួន។ លោកបន្តថា នេះជាដំណោះស្រាយមួយដែលឈលើច្បាប់ និងឈលើទិដ្ឋភាពជាក់ស្ដែង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។