នៅក្នុងសេចក្ដីប្រកាសព័ត៌មានរបស់មជ្ឈមណ្ឌលសិទ្ធិមនុស្សកម្ពុជា ចុះថ្ងៃទី៩ មេសា ឲ្យដឹងថា មជ្ឈមណ្ឌលសិទ្ធិមនុស្សកម្ពុជា (CCHR) មានមោទនភាពដែលទទួលបានពានរង្វាន់ពីមជ្ឈមណ្ឌលទំនាក់ទំនង និងការផ្លាស់ប្ដូរសង្គមក្នុងសាលាវិជ្ជាជីវៈសារព័ត៌មាន និងទំនាក់ទំនងពីសាកលវិទ្យាល័យឃ្វីនលែន នៃទីក្រុងប្រ៊ីសបេន (Brisbane) ប្រទេសអូស្ត្រាលី។
លោក អ៊ូ វីរៈ ប្រធានមជ្ឈមណ្ឌលសិទ្ធិមនុស្សកម្ពុជា និយាយថា ពានរង្វាន់ផ្នែកគេហទំព័រ ឬវែបសាយ មជ្ឈមណ្ឌលសិទ្ធិមនុស្ស នឹងត្រូវទទួលបាននៅខែឧសភា ខាងមុខនេះ។ លោកបន្តថា អ្វីដែលនឹងត្រូវកើតឡើងនេះ គឺជាកិច្ចផ្ដួចផ្ដើមដោយការច្នៃប្រឌិតសម្រាប់ឲ្យមនុស្សក្នុងសម័យថ្មី អាចទទួលបានព័ត៌មានកាន់តែទូលំទូលាយ តាមរយៈគេហទំព័រ ឬវែបសាយ៖ «នៅក្នុងតំបន់អាស៊ីអាគ្នេយ៍យើងនេះ គឺយើងមើលទៅយើងលេចធ្លោឡើង ព្រោះអីប្រទេសនានានៅជិតខាងយើងហ្នឹង គេយកតាមយើងច្រើនដែរ។ អ៊ីចឹង យើងគឺអ្នកឈានមុខក្នុងការមានភាពច្នៃប្រឌិតផ្នែកបច្ចេកវិទ្យាហ្នឹង»។
លោក អ៊ូ វីរៈ បន្តថា តាមរយៈការទទួលបានពានរង្វាន់នេះ មជ្ឈមណ្ឌលសិទ្ធិមនុស្ស បានដាក់គម្រោងក្នុងការប្រកួតប្រជែងដែលមានប្រទេសជាង១០០ ក្នុងពិភពលោក កាលពីជាង ១ឆ្នាំមុន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។