មជ្ឈមណ្ឌលសិទ្ធិមនុស្សកម្ពុជា (CCHR) បានសម្ពោធរបាយការណ៍ស្រាវជ្រាវថ្មីស្ដីពីការរើសអើងលើអ្នកប្ដូរភេទជាស្ត្រីនៅតាមទីប្រជុំជនក្នុងព្រះរាជាណាចក្រកម្ពុជា នៅថ្ងៃទី២១ ខែកញ្ញា ក្នុងរាជធានីភ្នំពេញ។ របាយការណ៍នេះបង្ហាញថា ការបំពានដោយពាក្យសម្ដីដល់អ្នកប្ដូរភេទជាស្ត្រីនេះ ជាចំណុចប៉ះពាល់ធ្ងន់ធ្ងរ និងគួរឲ្យព្រួយបារម្ភ។
របាយការណ៍ស្រាវជ្រាវរបស់មជ្ឈមណ្ឌលសិទ្ធិមនុស្សកម្ពុជា បង្ហាញថា អ្នកប្ដូរភេទជាស្ត្រី ឬបុរសប្តូរភេទជាស្ត្រី បានជួបប្រទះការរើសអើង និងការប្រមាថដោយពាក្យសម្ដី រាប់ចាប់ពីគ្រួសារ និងសហគមន៍រហូតដល់ការងារ ទីកន្លែងសាធារណៈ និងអាជ្ញាធរមូលដ្ឋានជាដើម។
របាយការណ៍ជាភាសាខ្មែរកម្រាស់ ៤៣ទំព័រនេះ មានចំណងជើងថា "ការរើសអើងលើអ្នកប្ដូរភេទជាស្ត្រីនៅតាមទីប្រជុំជនក្នុងព្រះរាជាណាចក្រកម្ពុជា"។ របាយការណ៍នេះ បានសម្ភាសអ្នកប្ដូរភេទជាស្ត្រីចំនួន ១៣៤នាក់ ក្នុងតំបន់ទីប្រជុំនៃទីតាំងចំនួន៤ គឺរាជធានីភ្នំពេញ ខេត្តសៀមរាប ខេត្តព្រះសីហនុ និងខេត្តបាត់ដំបង។
របាយការណ៍ដដែលរកឃើញថា អ្នកប្ដូរភេទជាស្ត្រី ៩២% ធ្លាប់ត្រូវបានគេសម្លុត និងគំរាមកំហែង ព្រមទាំងបំពានដោយពាក្យសម្ដី ហើយអ្នកប្ដូរភេទជាស្ត្រី ស្ទើរតែទាំងអស់នៃអ្នកធ្លាប់គេបំពានដោយពាក្យសម្ដី អះអាងថា ត្រូវគេបំពានដោយសារតែទំនោរភេទ និងអត្តសញ្ញាណយេនឌ័រ។
អ្នកសម្របសម្រួលគម្រោងនិន្នាការភេទ និងអត្តសញ្ញាណយេនឌ័រ នៃមជ្ឈមណ្ឌលសិទ្ធិមនុស្សកម្ពុជា លោក នួន ស៊ីដារ៉ា ដែលធ្វើការសិក្សាស្រាវជ្រាវនេះ ថ្លែងថា អ្នកដែលត្រូវគេបំពាន គឺមាននៅក្រោមរូបភាពផ្សេងៗ ពិសេសការប្រើពាក្យប្រមាថ ការដាក់ងារបែបរើសអើងជាដើម៖ «ការសម្លុតគំរាមកំហែង ការបំពានដោយពាក្យសម្ដី ហេតុនេះយើងឃើញចំណុចនេះ មានភាគរយច្រើនបំផុតពីសាធារណជន ដូចជាការហៅឈ្មោះ ឬការហៅថា ខ្ទើយ អ៊ីចឹងធ្វើឲ្យគាត់មិនសប្បាយចិត្ត បាក់ទឹកចិត្ត នឹងប៉ះពាល់ផ្លូវចិត្តធ្ងន់ធ្ងរនៅក្នុងរូបរាងកាយរបស់អ្នកប្ដូរភេទជាស្ត្រីនៅពេលគាត់ទទួលនូវពាក្យសម្ដីប្រមាថ ទទួលនូវការផាត់ចេញពីមិត្តភក្តិ»។
របាយការណ៍នេះក៏រកឃើញថា អ្នកប្ដូរភេទជាស្ត្រីនៅកម្ពុជា ក្រៅពីធ្លាប់ត្រូវបានគេសម្លុត និងគំរាមកំហែង និងបំពានដោយពាក្យសម្ដី ក្នុងនោះ ៤៣% ក៏អះអាងថា ធ្លាប់រងអំពើហិង្សា ៣១% ធ្លាប់រងការបំពានផ្លូវភេទ និងរំលោភសេពសន្ថវៈ។ របាយការណ៍ក៏គូសបញ្ជាក់ថា ដោយសារការបំពានដោយពាក្យសម្ដីអ្នកប្ដូរភេទជាស្ត្រី ៣៤% ត្រូវបានបដិសេធទទួលយកឲ្យធ្វើការងារ និងចំនួន ២៥% ទៀត បានរាយការណ៍ថា ត្រូវបានបណ្ដេញចេញពីការងារដោយសារតែអត្តសញ្ញាណប្ដូរភេទរបស់ពួកគេ។
ការស្រាវជ្រាវនេះបង្ហាញផងដែរថា មានគ្រួសារជាច្រើនពុំបានដឹង និងមិនទទួលយកសមាជិកគ្រួសារជាអ្នកប្ដូរភេទក្រោយពេលពួកគេបង្ហាញអាកប្បកិរិយាចេញមកក្រៅដោយ ៤៩% នៃអ្នកឆ្លើយតបបានលើកឡើងថា ពួកគេធ្លាប់មានអារម្មណ៍ចង់ចាកចេញពីផ្ទះ ដោយសារតែអត្តសញ្ញាណប្ដូរភេទរបស់ខ្លួន។
ទាក់ទិននឹងរបាយការណ៍នេះ អ្នកស្ម័គ្រចិត្តប្រចាំអង្គការសុខភាពបុរសនៅកម្ពុជា ជាអ្នកប្ដូរភេទជាស្រី កញ្ញា ឈុន វី ប្រាប់ថា កញ្ញាក៏ធ្លាប់ត្រូវគេសើចចំអកដោយសារតែប្ដូរភេទទៅជាស្ត្រី និងត្រូវបានបដិសេធមិនផ្ដល់ការងារឲ្យធ្វើ៖ «ពិបាកណាស់ពួកខ្ញុំ ព្រោះពេលសុំគេធ្វើការទៅ គេអត់យកយើងទេ គេបដិសេធដោយសារគេប្រកាន់យើងថា ខ្ទើយ ប្រុសធ្វើស្រី កាត់សក់ខ្លី ពាក់សក់ ញ៉ិកញ៉ក់ អ៊ីចឹងបញ្ហានេះដោយនិយោជកគាត់អត់បានយល់ដឹងពីអារម្មណ៍ និងទឹកចិត្តយើង ហើយឪពុកម្ដាយខ្លះគាត់ស្អប់កូន អត់ចងឲ្យកូនធ្វើអ៊ីចឹងទេ ហេតុនេះនៅតែមានការមាក់ងាយ បំពានដោយសម្ដីជាដើម»។
នៅចុងបញ្ចប់នៃការសិក្សាស្រាវជ្រាវនេះ របាយការណ៍បានផ្ដល់អនុសាសន៍ថា រដ្ឋាភិបាលត្រូវតែដោះស្រាយបញ្ចប់រាល់ការរើសអើងលើអ្នកប្ដូរភេទជាស្ត្រីជាបន្ទាន់ ដើម្បីលើកកម្ពស់វប្បធម៌នៃការទទួលយក និងការអត់ឱនដល់អ្នកប្ដូរភេទ ហើយរដ្ឋាភិបាលកម្ពុជា គួរចាត់វិធានការជាបន្ទាន់ ដោយដាក់ចេញនូវច្បាប់ប្រឆាំងនឹងការរើសអើងយេនឌ័រ។
អាស៊ីសេរី មិនអាចសុំការឆ្លើយតបពីរដ្ឋលេខាធិការ និងជាប្រធានក្រុមព័ត៌មានរបស់ក្រសួងកិច្ចការនារី ជុំវិញរបាយការណ៍ស្រាវជ្រាវរបស់មជ្ឈមណ្ឌលសិទ្ធិមនុស្សកម្ពុជា បាននៅឡើយ នៅថ្ងៃទី២១ ខែកញ្ញា។
ទោះជាយ៉ាងណា របាយការណ៍របស់មជ្ឈមណ្ឌលសិទ្ធិមនុស្សកម្ពុជា ក៏បានបញ្ជាក់ថា អ្នកប្ដូរភេទដែលធ្លាប់រងការបំពានដោយសម្ដី ឬសើចចំអកដោយសារតែអត្តសញ្ញាណភេទអះអាងថា វាបានធ្វើឲ្យអ្នកទាំងនោះមិនទទួលបានឱកាសអប់រំ ការងារធ្វើ និងធ្វើឲ្យប៉ះពាល់ដល់សតិអារម្មណ៍ បញ្ហាផ្លូវចិត្ត ដែលរហូតដល់ពេលខ្លះអ្នកប្ដូរភេទជាស្ត្រីខ្លះត្រូវបានរាយការណ៍ថា បានប៉ុនប៉ងធ្វើអត្តឃាតទៀតផង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។