ក្រុមចោរព័ត៌មានវិទ្យា ឬហេកគ័រ (Hacker) គាំទ្រដោយរដ្ឋវៀតណាម កំពុងប្រើប្រាស់វែបសាយរបស់កាសែតភ្នំពេញប៉ុស្តិ៍ ដើម្បីបើកការវាយប្រហារទៅលើអង្គការសិទ្ធិមនុស្សនានានៅក្នុងប្រទេសកម្ពុជា។ ក្រុមហ៊ុនសន្តិសុខបណ្ដាញអ៊ីនធឺណិតឈានមុខមួយ ឈ្មោះ FireEye មានមូលដ្ឋាននៅរដ្ឋធានីកង់បេរ៉ា ប្រទេសអូស្ត្រាលី ថ្លែងប្រាប់សារព័ត៌មាន ABC អូស្ត្រាលីថា ក្រុមចោរព័ត៌មានវិទ្យាឈ្មោះ APT32 ដែលគាំទ្រដោយរដ្ឋវៀតណាម កំពុងតែធ្វើសកម្មភាពវាយប្រហារ និងលួចយកទិន្នន័យតាមប្រព័ន្ធអ៊ីនធឺណិតពីបរទេស ដើម្បីបម្រើផលប្រយោជន៍នយោបាយឲ្យរដ្ឋវៀតណាម។
នាយិកាអង្គការឃ្លាំមើលសិទ្ធិមនុស្សលីកាដូ (Licadho) អ្នកស្រី ណាលី ពីឡូក (Naly Pilorge) ត្រូវបានសារព័ត៌មានអូស្ត្រាលី ABC ស្រង់ប្រសាសន៍ថា ម៉ាស៊ីនកុំព្យូទ័រជាច្រើនគ្រឿងក្នុងការិយាល័យរបស់អង្គការអ្នកស្រី បានក្លាយជាគោលដៅវាយលុកនៃមេរោគកុំព្យូទ័រ នៅពេលដែលបុគ្គលិកអង្គការអ្នកស្រី ចូលទៅបើកមើលគេហទំព័ររបស់កាសែតភ្នំពេញប៉ុស្តិ៍។ អ្នកស្រីថា អង្គការអ្នកស្រីបានចាត់វិធានការបង្ការនានារួចហើយដើម្បីទប់ស្កាត់មេរោគនេះ។
បន្ថែមពីលើនេះ ប្រធានផ្នែកស៊ើបអង្កេតអង្គការលីកាដូ លោក អំ សំអាត ថ្លែងប្រាប់អាស៊ីសេរីនៅថ្ងៃទី១៥ ឧសភា ថា រឿងរ៉ាវនៃការគ្រោងវាយប្រហារនេះ កើតមានឡើងតាំងពីថ្ងៃអង្គារ សប្ដាហ៍មុននេះមកម្ល៉េះ៖ «នៅក្នុងការិយាល័យរបស់លីកាដូយើង នៅពេលដែលយើងបើកប្រើប្រាស់អ៊ីនធឺណិតរបស់លីកាដូ ហើយយើងចូលវេបសាយ (Website) ភ្នំពេញប៉ុស្តិ៍ គឺគេព្យាយាមទាញយកអ៊ីមែលរបស់លីកាដូ។ យើងមើលទៅ វាហាក់ដូចជា មិនពិត ហើយវា មានការសង្ស័យ ក៏យើងអត់បានចូលទៅ ដាក់អ៊ីមែលយើងចូលទៅទេ។ ហើយយើងក៏សួរទៅអ្នកជំនាញ គេថាអ៊ីមែលហ្នឹងពីមុនមក គឺគេធ្លាប់ប្រើប្រាស់ក្នុងការ Hack ការបន្លំហ្នឹង»។
ក្រុមហ៊ុនសន្តិសុខបណ្ដាញអ៊ីនធឺណិតអូស្ត្រាលីឈ្មោះ FireEye បញ្ជាក់ថា ខ្លួនបានរកឃើញថា គេហទំព័ររបស់កាសែតភ្នំពេញប៉ុស្តិ៍ បានឆ្លងមេរោគរបស់ក្រុមចោរព័ត៌មានវិទ្យាឈ្មោះ APT32 នេះ តាំងពីខែវិច្ឆិកា ឆ្នាំ២០១៧ មកម្ល៉េះ។ ក្រុមចោរព័ត៌មានវិទ្យាឈ្មោះ APT32 នេះ បានប្រើប្រាស់វេបសាយល្បីៗ ដើម្បីជ្រើសរើសគោលដៅ ហើយបន្ទាប់មកបញ្ជូនមេរោគ Malware ទៅលើគោលដៅទាំងឡាយណាដែលបានចូលទៅបើកមើលទំព័រវេបសាយដែលបានឆ្លងមេរោគនេះ ប្រសិនបើអ្នកប្រើប្រាស់ ចុចបន្ត និងផ្តល់ព័ត៌មានដោយពុំបានប្រុងប្រយ័ត្ន។
យ៉ាងណាក៏ដោយ លោក អំ សំអាត បញ្ជាក់ថា ប្រព័ន្ធកុំព្យូទ័ររបស់អង្គការលីកាដូ ពុំបានរងគ្រោះពីគោលដៅនៃការវាយប្រហារនេះឡើយ។ លោកស្នើឲ្យបុគ្គលិកអង្គការមិនមែនរដ្ឋាភិបាលជាដៃគូនានា ឲ្យមានការប្រុងប្រយ័ត្នចំពោះបញ្ហានេះ៖ «យើងគ្រាន់តែសុំជម្រាបថា យើងត្រូវតែមានការប្រុងប្រយ័ត្ន ប្រសិនជាមាន ឃើញនូវសញ្ញាណអីមួយ ដែលយើងសង្ស័យថា ជាការវាយប្រហារ ឬការ Hack ចូលហ្នឹង សូមកុំឲ្យផ្ដល់ទិន្នន័យ ឬក៏កុំចូលទៅក្នុងវេបសាយហ្នឹងឲ្យសោះ ពីព្រោះវាអាចក្លាយជាហានិភ័យមួយសម្រាប់យើង ដែលងាយនឹងទទួលរងនូវការ Hack ចូល ឬក៏បំផ្លាញនូវទិន្នន័យរបស់យើង»។
កាលពីចុងឆ្នាំ២០១៧ កន្លងទៅ ក្រុមហ៊ុនសន្តិសុខព័ត៌មានវិទ្យា វ៉ូឡិចស៊ីធី (Volexity) ដែលមានមូលដ្ឋាននៅសហរដ្ឋអាមេរិក ធ្លាប់រាយការណ៍ថា ក្រុមចោរព័ត៌មានវិទ្យាឈ្មោះ ផ្កាឈូកសមុទ្រ អូស៊ីនឡូថិស (OceanLotus) ឬហៅថា APT32 នេះ ដែលគេជឿជាក់ថា មានប្រភពមកពីប្រទេសវៀតណាម កំពុងបើកយុទ្ធនាការតាមដានឈ្លបមើល និងវាយប្រហារលុកលុយតាមបណ្ដាញព័ត៌មានវិទ្យា សំដៅជាពិសេសលើប្រទេសប្រព័ន្ធផ្សព្វផ្សាយ ក្រុមអង្គការសិទ្ធិមនុស្ស និងសង្គមស៊ីវិល ក្នុងសហគមន៍អាស៊ាន។
ក្រុមហ៊ុនអាមេរិកាំងដដែលនេះ លាតត្រដាងថា ការបើកការវាយប្រហារតាមប្រព័ន្ធព័ត៌មានវិទ្យា ពីសំណាក់ក្រុមចោរព័ត៌មានវិទ្យា OceanLotus ឬហៅថា APT32 នេះ ធ្វើឡើងតាមរយៈគេហទំព័រ (Website) យុទ្ធសាស្ត្រមួយចំនួន ដែលក្រុមនេះលួចចូលទៅគ្រប់គ្រងបាន ដោយប្រើនូវវិធីសាស្ត្រ បច្ចេកទេស និងទម្រង់វាយប្រហារ ប្រកបដោយភាពស្មុគស្មាញ។ ក្រុមចោរព័ត៌មានវិទ្យា OceanLotus ដែលមានមូលដ្ឋាននៅប្រទេសវៀតណាមនេះ បានបើកប្រតិបត្តិការដោយជោគជ័យ ដោយពុំមានការចាប់អារម្មណ៍ពីសំណាក់មហាជន និងរដ្ឋាភិបាល ទៅលើគេហទំព័រល្បីឈ្មោះជាច្រើន ក្នុងតំបន់អាស៊ាននេះ ចាប់តាំងពីឆ្នាំ២០១៦ មកម្ល៉េះ៕