ក្រុមអង្គការសង្គមស៊ីវិល និងក្រុមយុវជន បានប្រតិកម្ម និងរិះគន់ចំពោះមន្ត្រីជាន់ខ្ពស់រដ្ឋាភិបាលដែលបានប្រកាសចាត់វិធានការតាមផ្លូវច្បាប់ ចំពោះអ្នកប្រើប្រាស់បណ្ដាញសង្គមតាមប្រព័ន្ធអ៊ិនធឺណិត (Internet) ដែលមន្ត្រីរូបនោះចាត់ទុកថា ជាជនអគតិ និងអសីលធម៌។
ការព្រមាននោះសំដៅដល់អ្នកដែលប្រើប្រាស់ប្រាស់ប្រព័ន្ធអនឡាញ (Online) ដើម្បីវាយប្រហារ ប្រមាថ និងបរិហារកេរ្តិ៍ទៅលើមន្ត្រីរាជការ និងថ្នាក់ដឹកនាំនៃរាជរដ្ឋាភិបាល។ សង្គមស៊ីវិល និងយុវជនចាត់ទុកថា នេះជាការរឹតត្បិតសេរីភាព និងជាសកម្មភាពបម្រើនិន្នាការនយោបាយប៉ុណ្ណោះ។
ការលើកឡើងរបស់អង្គការសង្គមស៊ីវិល និងក្រុមយុវជននៅពេលនេះ ធ្វើឡើងបន្ទាប់ពីមន្ត្រីជាន់ខ្ពស់នៃទីស្ដីការគណៈរដ្ឋមន្ត្រី លោក ផៃ ស៊ីផាន បានដាក់ពាក្យបណ្ដឹងផ្លូវការចំនួនពីរច្បាប់ទៅកាន់រដ្ឋមន្ត្រីក្រសួងមហាផ្ទៃ និងរដ្ឋមន្ត្រីក្រសួងប្រៃសណីយ៍ និងទូរគមនាគមន៍ ដើម្បីសុំឱ្យចាត់វិធានការតាមផ្លូវច្បាប់ចំពោះជនដែលប្រើប្រាស់ប្រព័ន្ធអនឡាញ ដើម្បីប្រមាថនិងបរិហារកេរ្តិ៍ទៅលើមន្ត្រីរាជការ និងថ្នាក់ដឹកនាំនៃរាជរដ្ឋាភិបាល។
ជាអ្នកដែលចូលចិត្តប្រើប្រាស់បណ្ដាញសង្គមហ្វេសប៊ុក (Facebook) ដើម្បីចែករំលែករឿងរ៉ាវនៅក្នុងសង្គម យុវជន ហេង ពិសិដ្ឋ បានលើកឡើងថា ការស្នើសុំរបស់លោក ផៃ ស៊ីផាន នៅពេលនេះ គឺកំពុងបំបិទសិទ្ធិសេរីភាពរបស់អ្នកប្រើប្រាស់បណ្ដាញសង្គម និងបង្ហាញថា ប្រទេសកម្ពុជា មិនទាន់មានលទ្ធិប្រជាធិបតេយ្យពិតប្រាកដ។
យុវជន ហេង ពិសិដ្ឋ បន្តថា មន្ត្រីរដ្ឋាភិបាល ឬថ្នាក់ដឹកនាំរដ្ឋាភិបាល គឺជាបុគ្គលសាធារណៈ ដូច្នេះសាធារណជនមានសិទ្ធិរិះគន់ស្ថាបនាដើម្បីផលប្រយោជន៍ជាតិ៖ «ខ្ញុំគិតថា ការបញ្ចេញទស្សនៈ ឬមតិរបស់បុគ្គលណាម្នាក់ទៅលើបុគ្គលសាធារណៈ ឬជនណាមួយ ពួកគាត់គួរតែទទួលយកការរិះគន់ដើម្បីអភិវឌ្ឍខ្លួនគាត់ឲ្យកាន់តែប្រសើរឡើង»។
ស្របជាមួយគ្នានេះ យុវជនដែលនិយមប្រើប្រាស់បណ្ដាញសង្គមហ្វេសប៊ុក ម្នាក់ទៀត យុវជន ជា ស៊ីដេត យល់ថា រដ្ឋាភិបាលកំពុងតែចាត់វិធានការរឹតបន្តឹងសេរីភាពអ្នកប្រើប្រាស់ប្រព័ន្ធអ៊ិនធឺណិត ឬអនឡាញ ពិសេសអ្នកនិយមប្រើប្រាស់បណ្ដាញសង្គម។
យុវជន ជា ស៊ីដេត យល់ថា រដ្ឋាភិបាលគួរតែផ្ដល់ឧកាសទូលំទូលាយក្នុងការប្រើប្រាស់ប្រព័ន្ធអនឡាញ ឬបណ្ដាញសង្គម ព្រោះថា បើងាកទៅមើលប្រព័ន្ធផ្សព្វផ្សាយនៅក្នុងស្រុក មិនបានផ្សព្វផ្សាយរឿងពិតជាក់ស្ដែងនៅក្នុងសង្គមបានទូលំទូលាយដូចប្រព័ន្ធអនឡាញនោះទេ៖ «ខ្ញុំសូមស្នើទៅកាន់មន្ត្រីរដ្ឋាភិបាល ពិសេសលោក ផៃ ស៊ីផាន ព្រោះខ្ញុំគិតថា ប្រព័ន្ធព័ត៌មានសង្គម ជាពិសេសហ្វេសប៊ុក វាផ្ដល់ផលប្រយោជន៍ទៅកាន់រដ្ឋាភិបាលវិញទេ ដើម្បីឲ្យដឹងពីគុណសម្បត្តិ និងគុណវិបត្តិរបស់ខ្លួននៅក្នុងដំណើរការអភិវឌ្ឍប្រទេស»។
ចំណែកឯយុវជន ម៉ា ចិត្រា បាននិយាយថា ការស្នើឲ្យចាត់វិធានការចំពោះអ្នកប្រើប្រាស់ប្រព័ន្ធអនឡាញ គឺជាការបង្ហាញពីការរើសអើងនយោបាយ និងបង្ហាញថា មន្ត្រីរដ្ឋាភិបាលកំពុងតែប្រកាន់ខ្លួនមិនឲ្យមានការរិះគន់ពីសំណាក់សាធារណជន។ យុវជនរូបនេះស្នើទៅកាន់រដ្ឋាភិបាលគិតពិចារណាចំពោះវិធានការនេះឡើងវិញ និងសូមឲ្យអ្នកប្រើប្រាស់ប្រព័ន្ធអនឡាញ ឬបណ្ដាញសង្គមទាំងអស់ គិតពិចារណាពីក្រមសីលធម៌ក្នុងការប្រើប្រាស់៖ «ខ្ញុំយល់ថា លិខិតដែលចេញនៅពេលនេះ គឺជាការរើសអើងនិន្នាការនយោបាយ និងអាងខ្លួនជាមន្ត្រីរាជការប៉ុណ្ណោះ»។
ស្របពេលដែលមានវិធានការរបស់មន្ត្រីជាន់ខ្ពស់រដ្ឋាភិបាលនៅពេលនេះ ក្រុមអង្គការសង្គមស៊ីវិល និងក្រុមយុវជន ក៏បានសម្ដែងការព្រួយបារម្ភចំពោះសេចក្ដីព្រាងច្បាប់ស្ដីពីឧក្រិដ្ឋកម្មអ៊ីនធឺណិត និងទូរគមនាគមន៍ ដែលរដ្ឋាភិបាលគ្រោងចេញនៅពេលឆាប់ៗខាងមុខនេះថា អាចប៉ះពាល់ដល់សិទ្ធិសេរីភាពជាមូលដ្ឋានរបស់បុគ្គលផងដែរ។
ប្រធានផ្នែកស៊ើបអង្កេតសិទ្ធិមនុស្សនៃសមាគមអាដហុក (Adhoc) លោក នី ចរិយា បានចាត់ទុកថា ការចេញលិខិតរបស់មន្ត្រីរដ្ឋាភិបាលឲ្យចាត់វិធានការចំពោះអ្នកប្រើប្រាស់ប្រព័ន្ធអនឡាញ គឺជាការគំរាមកំហែងដល់អ្នកប្រើប្រាស់ប្រព័ន្ធព័ត៌មានសង្គម កុំឲ្យធ្វើអ្វីប៉ះពាល់ដល់រដ្ឋាភិបាល និងជារឿងនយោបាយប៉ុណ្ណោះ។
មន្ត្រីឃ្លាំមើលសិទ្ធិមនុស្សរូបនេះលើកឡើងទៀតថា នៅក្នុងប្រទេសដែលអភិវឌ្ឍ និងមានលទ្ធិប្រជាធិបតេយ្យពិតប្រាកដ គឺបើកសិទ្ធិទូលាយដល់ប្រជាពលរដ្ឋបញ្ចេញមតិ៖ «ខ្ញុំគិតថា កាលណាប្រទេសមួយ សេរីភាពបញ្ចេញមតិត្រូវបានបំបិទសិទ្ធិ គឺសបញ្ជាក់ថា ប្រទេសនោះមិនមានលទ្ធិប្រជាធិបតេយ្យនោះទេ ហើយខ្ញុំយល់ថា នេះការបញ្ចេញមតិរិះគន់គឺជា មាស ជា ពេជ្រ សម្រាប់ឲ្យអ្នកដឹកនាំប្រទេសយកទៅកែច្នៃ ដើម្បីធ្វើឲ្យប្រទេសមួយទៅរកភាពរីកចម្រើន»។
ចំណែកឯអ្នកនាំពាក្យគណបក្សសង្គ្រោះជាតិ លោក យ៉ែម បុញ្ញឫទ្ធិ មានប្រសាសន៍ថា នៅពេលបច្ចុប្បន្ននេះ លោកសង្កេតឃើញថា ពលរដ្ឋខ្មែរចាប់អារម្មណ៍ប្រើប្រាស់បណ្ដាញសង្គមដើម្បីចែករំលែកព័ត៌មានពិតទៅវិញទៅមក ប៉ុន្តែក៏មានជនមួយចំនួនប្រើប្រាស់រូបភាពខុសក្រមសីលធម៌ផងដែរ។ បើទោះជាយ៉ាងណាលោកចង់ឃើញរដ្ឋាភិបាលបើកទូលាយលើការប្រើប្រាស់ប្រព័ន្ធព័ត៌មានសង្គម៖ «ខ្ញុំគិតថា រដ្ឋាភិបាលត្រូវតែពង្រីករបៀបនៃការប្រើប្រាស់បណ្ដាញព័ត៌មានសង្គមដល់ក្មេងជំនាន់ក្រោយឲ្យបានទូលំទូលាយ មិនគួរបំបិទសិទ្ធិនោះទេ ដើម្បីប្រយោជន៍ជាតិ»។
ឆ្លើយតបនឹងការប្រតិកម្មរបស់សង្គមស៊ីវិល និងក្រុមយុវជនអ្នកនាំពាក្យនៃទីស្ដីការគណៈរដ្ឋមន្ត្រី លោក ផៃ ស៊ីផាន បានបញ្ជាក់ថា ការដាក់ពាក្យបណ្ដឹងនេះមិនមែនបំណងប្រឆាំងនឹងក្រុមទិតៀនណាមួយឡើយ។
លោកថា តែនេះជាការការពារកិត្តិយស សេចក្ដីថ្លៃថ្នូររបស់មនុស្សដែលទទួលបានការការពារ ដែលទទួលរងការជេរ ប្រមាថ និងបរិហារកេរ្តិ៍ ពីសំណាក់ជនអគតិតាមបណ្ដាញសង្គមហ្វេសប៊ុកប៉ុណ្ណោះ៖ «ពាក្យបណ្ដឹងនេះ គឺចង់ឲ្យមានការអន្តរាគមន៍ចំពោះជនអគតិ ដែលកាត់តរូបភាពអាក្រាត កាត់តរូបភាព ដូចជា ខ្លួនឆ្កែក្បាលមនុស្សជាដើម ដែលជនទាំងនេះធ្វើឲ្យប៉ះពាល់សេចក្ដីថ្លៃថ្នូរនៅក្នុងសង្គម»។
ពាក្យបណ្ដឹងពីរច្បាប់ជាផ្លូវការដែលមានខ្លឹមសារស្រដៀងគ្នា ចុះថ្ងៃទី២១ ខែឧសភា ឆ្នាំ២០១៥ ទៅកាន់រដ្ឋមន្ត្រីក្រសួងមហាផ្ទៃ និងរដ្ឋមន្ត្រីក្រសួងប្រៃសណីយ៍ និងទូរគមនាគមន៍ លោក ផៃ ស៊ីផាន បានលើកឡើងថា ក្នុងរយៈពេលថ្មីៗនេះ លោកបានសង្កេតឃើញជនមួយចំនួនប្រើប្រាស់ប្រព័ន្ធសង្គម ដោយប្រើពាក្យអសុរោះ ប្រមាថមាក់ងាយ បំផ្លើស ទាំងអត្ថបទ និងរូបភាព ព្រមទាំងបានវាយប្រហារ បរិហារកេរ្តិ៍ដល់មន្ត្រីរាជការដែលជាថ្នាក់ដឹកនាំមួយចំនួន។ លោកបន្តថា ពាក្យទាំងនោះមានចែងនៅក្នុងក្រមព្រហ្មទណ្ឌកម្ពុជា និងមានទម្ងន់ទោសជាធរមានស្រាប់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។