ក្រុមអ្នកស្រឡាញ់ភេទដូចគ្នា អ្នកស្រឡាញ់ទាំង ២ភេទ និងអ្នកប្ដូរភេទ ហៅកាត់ជាភាសាអង់គ្លេសថា អិល.ជី.ប៊ី.ធី (LGBT) នៅតែរងការរើសអើង ដែលជំរុញអោយពួកគេជួបការលំបាកទាំងនៅក្នុងការរស់នៅ និងប្រកបរបរចិញ្ចឹមជីវិត។ ការរើសអើងទាំងឡាយទៅក្រុមមនុស្សដែលស្រឡាញ់ភេទដូចគ្នា អិល.ជី.ប៊ី.ធី ត្រូវចាត់ទុកថា ជាការរំលោភបំពានលើសិទ្ធិជាមូលដ្ឋានក្នុងការរស់នៅរបស់ពួកគេ។
ករណីនេះក្រុមអង្គការមិនមែនរដ្ឋាភិបាល អ្នកស្រឡាញ់ភេទដូចគ្នា រួមទាំងអង្គការសហប្រជាជាតិផង ជំរុញអោយរដ្ឋាភិបាលកម្ពុជា ធានាសិទ្ធិសេរីភាពពួកគេអោយបានពេញលេញ។
តំណាងអ្នកស្រឡាញ់ភេទដូចគ្នាស្នើអោយរដ្ឋាភិបាលបង្កើតច្បាប់ពិសេស ដែលពួកគេចាត់ទុកថា ជាមធ្យោបាយល្អមួយអាចបញ្ចៀសរាល់ការរើសអើង និងកាត់បន្ថយការលំបាករបស់ពួកគេ។
ជាសកម្មជនអ្នកប្ដូរភេទ និងជានាយិកាប្រតិបត្តិនៃបណ្ដាញប្រជាជនកម្ពុជា សម្រាប់អភិវឌ្ឍន៍បុរសស្ត្រី អ្នកស្រី ស៊ូ សុធាវី មានប្រសាសន៍ថា ប្រសិនបើមានច្បាប់ការពារនោះអ្នកស្រឡាញ់ភេទ ឬប្តូរភេទដូចពួកគាត់ នឹងអាចទទួលបានសិទ្ធិពេញលេញដូចពលរដ្ឋទូទៅដែរ ក្នុងនាមជាមនុស្សជាតិ។
អ្នកស្រីបន្តថា កន្លងមកមានការអះអាងពីការទទួលស្គាល់ក្រុមអ្នកប្ដូរភេទដែរ ប៉ុន្តែក្នុងការអនុវត្តជាក់ស្ដែងនៅតែមានបញ្ហាចោទ៖ «សម្ដេចនាយករដ្ឋមន្ត្រីគាត់ស្រែកថា ពួកស្រលាញ់ភេទដូចគ្នាជាមនុស្ស មិនមែនជាសត្វទេ។ បានត្រឹមតែស្រែក ខាងក្រោមអត់គោរពផង ព្រោះអត់មានច្បាប់ការពារ...»។
អ្នកស្រី ស៊ូ សុធាវី មានប្រសាសន៍ទៀតថា ច្បាប់ការងារក៏ត្រូវតែធានាសិទ្ធិទទួលបានការងារសមរម្យរបស់ក្រុមអ្នកប្ដូរភេទដែរ៖ «ខ្ញុំបានជួបរដ្ឋមន្ត្រីក្រសួងការងារ សូមឲ្យមានច្បាប់កុំរើសអើង ពណ៌សម្បុរ ពូជ ភេទ។ គាត់បានយល់ព្រមជាមួយយើងហើយ គាត់កំពុងរៀបចំ...»។
កាលពីថ្ងៃ៣១ ខែមីនា ដែលជាទិវាអន្តរជាតិនៃអ្នកប្ដូរភេទ មជ្ឈមណ្ឌលសិទ្ធិមនុស្សកម្ពុជា បានចេញសេចក្ដីថ្លែងការណ៍បង្ហាញពីការលំបាករបស់ក្រុមអ្នកប្ដូរភេទ ឬអ្នកស្រឡាញ់ភេទដូចគ្នា នៅពេលដែលស្ថានភាពរបស់ក្រុមនេះនៅមិនទាន់មានការស្រាវជ្រាវជាក់លាក់នៅឡើយ។
មជ្ឈមណ្ឌលសិទ្ធិមនុស្សកម្ពុជា បានលើកឡើងថា អ្នកប្ដូរភេទជាច្រើននាក់ប្រាប់ថា ការរើសអើងចំពោះពួកគេនៅតែកើតមាន ហើយវាមិនមែនជារឿងចម្លែកដែរ ទាំងនៅក្នុងគ្រួសារ សាលារៀន និងនៅកន្លែងការងារ។
អ្នកសម្របសម្រួលនិន្នាការភេទ និងអត្តសញ្ញាណយេនឌ័រ នៃមជ្ឈមណ្ឌលសិទ្ធិមនុស្សកម្ពុជា លោក នួន ស៊ីដារ៉ា មានប្រសាសន៍ថា ការរើសអើងទៅលើអ្នកប្ដូរភេទបានចាប់ផ្ដើមតាំងពីគ្រួសារ។ នៅសាលារៀន ពួកគេភាគច្រើនសម្រេចចិត្តបោះបង់ចោលការសិក្សាដោយសារតែការរើសអើងពីមិត្តភក្តិ និងអ្នកពាក់ព័ន្ធដទៃទៀត៖ «ក្រុមគ្រួសារមួយចំនួនធំអត់គាំទ្រ ហើយសាលារៀនមិនបង្កភាពកក់ក្ដៅដល់គាត់ ដូចជាការប្រមាថ សម្លុតគំរាមកំហែងពីសំណាក់មិត្តភក្ដិ ពីគ្រូបង្រៀន អ៊ីចឹងសិស្សដែលស្រលាញ់ភេទដូចគ្នាមួយចំនួនគាត់បង្ខំចិត្តឈប់រៀន»។
នៅក្នុងសេចក្ដីថ្លែងការណ៍របស់មជ្ឈមណ្ឌលសិទ្ធិមនុស្សកម្ពុជា បញ្ជាក់ថា ការរើសអើងប្រឆាំងនឹងអ្នកប្ដូរភេទជាបញ្ហាដែលពិភពលោកព្រួយបារម្ភ។ នៅអឺរ៉ុបចន្លោះឆ្នាំ២០១១ ដល់២០១៤ បានរកឃើញថា ៤៨ភាគរយនៃអ្នកប្ដូរភេទដែលមានអាយុក្រោម ២៦ឆ្នាំ បានព្យាយាមធ្វើអត្តឃាត គឺខ្ពស់ជាងអ្នកដែលមានអាយុស្របាលៗគ្នា ប៉ុន្តែមិនមែនជាអ្នកប្ដូរភេទ។
របាយការណ៍របស់គណៈកម្មាធិការសិទ្ធិមនុស្សរបស់អង្គការសហប្រជាជាតិ ស្ដីពីការពិនិត្យស្ថានភាពសិទ្ធិមនុស្សនៅកម្ពុជា ដែលបានធ្វើឡើងកាលពីថ្ងៃទី១៧ ដល់ទី១៨ ខែមីនា ឆ្នាំ២០១៥ បានបង្ហាញកង្វល់ពីការរើសអើងប្រឆាំងអ្នកស្រឡាញ់ភេទដូចគ្នា អ្នកស្រឡាញ់ទាំង២ភេទ និងអ្នកកែភេទ ឬ អិល.ជី.ប៊ី.ធី ដែលកើតនៅកន្លែងការងារ និងនៅកន្លែងគាំពារសុខភាព។ បញ្ហានេះកើតឡើងដោយសារតែខ្វះចន្លោះផ្លូវច្បាប់ ដែលធានាមិនអោយមានការរើសអើង។
គណៈកម្មាធិការសិទ្ធិមនុស្សអង្គការសហប្រជាជាតិស្នើអោយរដ្ឋាភិបាលកម្ពុជា ដែលជារដ្ឋភាគីត្រូវពិនិត្យឡើងវិញនូវច្បាប់របស់ខ្លួន ដើម្បីធានាថា ការរើសអើងឈរលើទំនោរផ្លូវភេទ និងអត្តសញ្ញាណយេនឌ័រ ត្រូវបានហាមឃាត់។ លើសពីនេះត្រូវអនុវត្តសកម្មភាពផ្សព្វផ្សាយដើម្បីអោយមានការយល់ដឹង និងចូលរួមប្រយុទ្ធប្រឆាំងការរើសអើងក្រុម អិល.ជី.ប៊ី.ធី។
ឆ្លើយតបនឹងបញ្ហានេះប្រធានគណៈកម្មាធិការសិទ្ធិមនុស្សកម្ពុជា លោក ម៉ក់ សម្បត្តិ ដែលបានទៅឆ្លើយនៅក្នុងកិច្ចប្រជុំជាមួយគណៈកម្មាធិការសិទ្ធិមនុស្សនៃអង្គការសហប្រជាជាតិ មានប្រសាសន៍ថា ស្ថាប័នរបស់លោកនឹងពិចារណាសិក្សាស្រាវជ្រាវ និងប្រមូលព័ត៌មានចំពោះករណីនេះ៖ «យើងត្រូវសិក្សាមើលថាតើរឿងហ្នឹងធ្វើទៅប៉ះពាល់យ៉ាងម៉េចដល់មហាជនខ្លះ? តើមានអ្វីដែលគេរិះគន់? ...ការងារសិទ្ធិមនុស្សធ្វើម៉េចឲ្យមានការគោរពសិទ្ធិដូចគ្នា យើងមានគោលការណ៍ច្បាស់ហើយ យើងមិនព្រងើយកន្តើយទេ»។
ទាក់ទងដល់ការអប់រំផ្សព្វផ្សាយពីសិទ្ធិរបស់ក្រុម អិល.ជី.ប៊ី.ធី នេះក្រុមអង្គការមិនមែនរដ្ឋាភិបាលនឹងចាប់ផ្ដើមសកម្មភាពនានារបស់ខ្លួន ដោយរំពឹងថា នឹងអាចអោយការរើសអើងបានកាត់បន្ថយ។
លោក នួន ស៊ីដារ៉ា អ្នកសម្របសម្រួលកម្មវិធីនៃមជ្ឈមណ្ឌលសិទ្ធិមនុស្សកម្ពុជា មានប្រសាសន៍ទៀតថា អង្គការរបស់លោកនឹងចាប់ផ្ដើមការងារជាមួយក្រសួងអប់រំ យុវជន និងកីឡា ដើម្បីបង្កើតអោយមានកម្មវិធីសិក្សា ដែលអាចអោយសិស្សសាលាយល់ដឹងពីសិទ្ធិរបស់អ្នកប្ដូរភេទ។ តាមរយៈកម្មវិធីសិក្សាបែបនោះនឹងអាចជួយកាត់បន្ថយការរើសអើងក្នុងចំណោមសិស្សទៅលើអ្នកប្ដូរភេទ៖ «ក្រសួងកិច្ចការនារីគាត់បានដាក់បញ្ចូលអ្នកស្រលាញ់ភេទដូចគ្នាហ្នឹងទៅផែនការអភិវឌ្ឍន៍របស់នារីរតនៈទី៤...។ ខ្ញុំគិតថា បន្តិចទៀតនឹងចូលទៅដល់ក្រសួងអប់រំ...»។
ក្រៅពីនេះមជ្ឈមណ្ឌលសិទ្ធិមនុស្សកម្ពុជា នឹងធ្វើការងារជាមួយក្រុមកំប្លែងល្បីៗ ដើម្បីផ្សព្វផ្សាយពីសិទ្ធិរបស់អ្នកប្ដូរភេទ។
ចំណែកអ្នកស្រី ស៊ូ សុធារី ដែលធ្លាប់ទទួលបានពានរង្វាន់អ្នកការពារសិទ្ធិ អិល.ជី.ប៊ី.ធី មានប្រសាសន៍ថា បណ្ដាញអ្នកស្រីនឹងធ្វើយុទ្ធនាការមួយនៅថ្ងៃទី១០ ខែមេសា ទាមទារអោយមានច្បាប់ការពារពួកគេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។